Ŋwàʼ Jov 38 - ŊWÀʼ NYÙY

Kisúŋnìn ke Nyùy Tàr wùn à kimaysì ké kinyò ki 38–42 kéʼ kisúŋnìn kfə́

¹ Kee shooy ki shaà, Nyùy Tàr nèn a suŋnín e Jov fo mvə̀m kinsəm, a dzər sho jii:

² «À dzə̀ ké ji la, e bó a moònìn vinyo ve m yii mo kiìn mo, a bó jí se à súŋnin si yòʼ kér nsàv?

³ Kúr ndzə̀y sí, é sí táv moo lumèn. M yíi a dzətí vinyo e wò, áà wáa naàrì.

⁴ Mò‑oò tuuy kitú ke nsay e wun kinsə̀ŋ, aà dzə̀ feé? Naàrìi, aà fèn kì jeéyjeéy fó vinyò.

⁵ Yì‑iì sìysì la kitú ke nsay, e lèm mo mfìʼ si kér fó a dzə? Yì‑iì sàŋrì la virə́ʼ, e fìʼ mo ví kér fó a dzə? A dzə̀ wò, la à yòʼ mèŋ.

⁶ Vé‑eè fàr vitóm ve kinsə̀ŋ a dzə̀ e ka kí? Yì‑iì neèr la tíy ye yí tóm kinsə̀ŋ?

⁷ Ndzə lóo ran e kijàvndzə foo fèy, mejiy mè wàa yiì mo yov wíri luŋ e mfòn, a nsheèlav sém sidzə̀m si kwá mo e kishéʼrì ki.

⁸ «Rìbà ndzə̀v‑iì meè, e sə̀ kitú ke nsay, gíŋ la fo wù wáa mee e kwaʼ?

⁹ Kù‑uù sə̀tí mo rìbà ndzə̀v e mbàʼ mo wìr màʼ ndzə̀y, e sùm e ndzə ye sənér, kù mo á boòtí wán é ndzə̀y,

¹⁰ e gwàr bìíy rìbà ndzə̀v, e nèn bòm akfə̀m ve á wáa kìŋsìn fo wù wáa mee e kwaʼ.

¹¹ M ló, e tìnén e rìbà ndzə̀v tínén jii, ‹À yíi a leŋ, a seéy a dzə̀ fen, a bó yòʼ dzə̀ à kfə̀n bàŋrìn, a kù dzə̀ sá fo kinsəm ki yíi lòo tsəy wò, à lóo liy e yuv kitávín, áà ku sèéy.›

¹² Jov, mo vé‑eè dzəən wò, wò‑oò yiì ne fò sáʼ ji á mo kijàvndzə ki yiì jì á? Wò‑oò yiì ne kàn ndzə ye yì sí káʼá ji yì keʼ kishiíy ke fíy ki á?

¹³ Wò‑oò yiì ne yiì ji rán yee kijàvndzəə du kitú ke nsay kidzə̀m, é wír ve á méŋ Nyùyi wáa nyeŋ rán yee shooy, a lìr a?

¹⁴ Ndzə ráné, yì yiì, agwan wùn à viwoóy ví yènsín, e yènsín moo vikúm ve wìr koorin, a yensín moo kisəəm ke á dònèn e nsay mbóm.

¹⁵ Ndzə ráné, yì jìvír antaŋ wìr ve á méŋ Nyùy jívírín, la áwune yòʼ dzə́ə a ker vitaáví vé a way nyár e wírí wùn.

¹⁶ «Wò‑oò yiì ne dù fo ntòŋ sé rìbà ndzə̀v sí dzəə̀n á? Wò‑oò yiì ne ghàn é sar rìbà ndzə̀v, a wù sə́n ji cùm a?

¹⁷ Wìr‑iì yiì ne dìn shúu kày wo wú nəə aàŋkfəə́ wòŋ e wò a? Wò‑oò yiì ne ghàr sə́r sày a?

¹⁸ À kiíy ne mo mbvə̀ʼ kitu ke nsay dzəə̀n á? Aà kì, à naàrì ri.

¹⁹ «À kù yòʼ kì fo ráne lo a, e kìíy fo ndzə ye sənér lo a?

²⁰ Kí bo à kì yíi dìn fo a dzə̀ vifá vìn vi wàa dù, e dìn dzə́ə ye ví wáa kfən sho fo ví kì loòn.

²¹ A dzə̀ à mèŋ rú é le, a yì‑iì dzə̀ é ghan fóo fèy, aá dzəə́ ne wò, aà dzə̀, a bó yòʼ dzə̀ á tàŋ viyá vé, e tòʼ.

²² «À nə̀ə́ ne e kitàv ké kintòn ke kí yii gbu moo mbàʼ à? À yèn ne fo m lem mentíy me wuú lóo lo, mè wàa gbù à?

²³ Vifá vìn ve m lemè, shiy ghán sé ŋgeʼ sho, kishiíy ke wíri wíy a fùnèn vindzəʼ, a màʼ rə́r.

²⁴ A dzə̀ à dù fo m yii yii, é bo kishèv ki wáa ŋwàŋ, kìn fo shwér woo fo shùy yii tóo lo, e bó a ghanén e kitu ke nsay à?

²⁵ «Gwàr la nshwàn wo kishèv ki wáa wamkír, a ŋwàŋkìr, a shaà sho? Fèr la ŋwàn wo kiŋkò ke wuu kí wáa cuùrìn fo fo.

²⁶ Yí kù cuurì e nsay ye bó wìr yòʼ fə̀m dzə́ sho. Wóʼ, a wìr yòʼ kum fo.

²⁷ A yí ló bèy, bórir nsay wòʼ, yii ji vikwiíy ví wáa fəə, a tèʼ sho.

²⁸ Wuú yii kér kitàr á? Yì‑iì dzə̀ə́ la ŋweʼ ye yí gbu?

²⁹ Kidzə́r kí yii kér kiyìy a? Yì‑iì dzə̀ə́ la kintòn ke kí sə́y fo yuv?

³⁰ Kintòn ke kí yiìn, mendzə́v mè kfə́n é tiy, e yiì, mendzə́v meé rìbà ndzə̀v mè távtí yúv yúv.

³¹ «Pleyades dzə̀ kikámkám ké mejìy ke mò‑oò kurin, a dzə̀ à kùr á? Ké Orion kee kikámkám, a dzə̀ à bvə̀r á?

³² Ké mejìy me mè yii din mo kiyá ki kúvsinè, à dzə̀ à yiì, mè lò á? A dzə̀ à dànèr kikámkám ke á yoŋ ji *Bear, e dànèr ke kuʼùn kí, e dànèr ke terí kí á?

³³ À kì nsər se vikaʼày veé yuv ví yii yúninè a? A dzə̀ à lì nsər see shooy, sí lìm é nsay fèn a?

³⁴ «A dzə̀ à fò sáʼ e mbàʼ seé yuv sí, ji sí yii, é wuú cuuri fó yuv, e sə̀tí wò a?

³⁵ A dzə̀ à tùm kishèv ji kí du, e kfə̀n é bàm, e bìnèr e wò ji wun və̀ne a?

³⁶ Yiì la, é bo mbàʼ kiíy ji dzə̀ yì wàa fo wuú? A lò fò la vifií e mbàʼŋkfəə́mé ji yì wáa gbù?

³⁷ Wìr wo wù kiìn féyì móo taŋ mbàʼ dzə̀ la? A dzə̀ jèér la mbìʼ seé yuv, wuú wàa cuùrì fo fo,

³⁸ é nsay kibvə̀r kfə́n é kishàʼàr, a tàŋ ji tsə̀ʼ.

³⁹ «A dzə̀ à koò nyám, e fò e bvərə̀ʼ á? A dzə̀ à yìír wón bvərə̀ʼ, á kùr á?

⁴⁰ Wón bvərə̀ʼ, aá lir aáwuné mbvə̀ʼ si, néŋ e virə̀ʼ vé kilìr, téʼ kifá.

⁴¹ Yii yiir la kiŋaʼ? Kiŋaʼ, a wón vəə́ tóŋ e Nyùy ji wù sə́ áwune, a jìŋ kfə́r ne, á wáa ŋaàyì ŋaàyìn.»