Ŋwàʼ Jov 32 - ŊWÀʼ NYÙY

Visúŋnìn ve Elihu woo tókíshwáŋ 32–37

¹ Á bèy, mo Jov‑iì kiìn kfə́ ji wun dzə̀ là jay, Elifar wùn à Bilda, à Tsofar nèn mèy kfə̀nkfə́n fó a bìʼ kinyo wùn à Jov.

² Yii bèy, Elihu nèn tò fó. Wù‑uù dzə̀ wan Barakel woó Bus, a wù ló a dzə̀ fó kfəə Ram. Elihu wáa shwiíy kilòŋ wùn Jov, bìʼ fo Jov‑iì li kitú kfə́ ji wun dzə̀ á là njò, e nèn a bashí a dzə̀ Nyùy.

³ Wù wáa shwiíy sa kilòŋ wùn à ŋkar se Jov see sitaár si, bìʼ fo áwune‑eè roomè Jov, yii bèy, e làa yòʼ a suúy kinyo sho ke kí kér mvə́m,

⁴ mo áwune‑eè dzəə̀n ŋgày sé wìr fo wun. Elihu nèn kù màʼtì ji áwune súŋnín e Jov, é bo wun súŋnín á sho.

⁵ Wù yiì yèn ji kinyo ke kí kér mvə́m ki yoʼ fəə̀ á fo áwune vee ataár vìné shuù, dòʼshwíiy və ku nèn ŋàʼáy.

Elihu sáʼ Jov wùn à ŋkar sə́ sí

⁶ Wun woo Elihu woo wan Barakel nèn kèʼ a suŋnín, a suúy jii: «M dzə̀ə́ kém wánlè, a vèn dzə́nkír ne, e kòŋrí. Bìʼ bey, m nén a fàn, e làa yòʼ kfə̀n a mùm ji m suúy á mo m kwaʼtì.

⁷ M kì rə̀m jii, kí bòŋ áàránsísii súŋnín, e bòŋ, é wír ve á yenen ne vishiíyí yéʼéy kibér vifií.

⁸ Yii bèy, wìr dzə̀m kù kér vifií ve wù kwaʼtì vinyo sho, Ŋgaà Vitaàví Vidzə̀m yoy e wìr wùn, ŋgaàŋ nèn kù lì vifií fó fo.

⁹ Yòʼ yii yii viyá ve wìr yenen ne, é bo ŋgaàŋ wáa ker vifií, a bó yòʼ dzə̀ sá ghán sidzə̀m se dzə̀ aránsisii kìíy móo tinén kinyo e nsànloŋ.

¹⁰ Bìʼ bey, m nén a suúy jii, ‹Vèn yuúrí, é m fer sá kinyo ke m kwaʼtì.

¹¹ M kù kì dzə́ ji nyaáŋ, yuúri kinyo ke vèn kì suuyì. Vèn kì tar vinyo vée suúy e Jov, a m kù yuúri dzə́ə ye vèn kwaʼtì vinyo sho.

¹² M lo wày vifií e věn wùn, a bó wìr fo vèn yoʼ lò dìn fo Jov jayin, a bó wìr yoʼ fə̀m lò bìnèr kinyo kfə́.

¹³ Vèn wáa yen fóo lò, a dzə̀v nsaŋ ji vèn sì afií. Kù kér fóo wìy bìnèr Nyùy kinyo ke Jov, bó yòʼ lò wìr bìnèr.

¹⁴ Jov kì súŋnin a dzə̀ e vèn, wù yoʼ lò a suŋnín e mò. Yii bèy, bó yòʼ dzə̀ m wàa bìnèr kinyo sho là mvə́m moo ven.

¹⁵ Vèn lò ne, e wèʼ wèʼèn, aá yòʼ dzəə́ binèr kinyo. Jí si mày ne fo věn shuù.

¹⁶ Vèn kì yíi gòʼ kisə́sə, lóo tiynín, lóo buú kinyo kée suúy, é m ku gòʼ, a shìy à?

¹⁷ M lo, e fo sa yém yee binèr, e naàrì sa kinyo ke m kwaʼtì.

¹⁸ M kér vinyo vigháʼán ve dzə̀ m sùúy, a ví kù kív mo ji m suúy.

¹⁹ Rúrú, m dzə̀msí ne, e kfə̀n e fur moo shiluʼ she á sə̀mèn, a shí sí lo, e waa kitém.

²⁰ M kù‑úù súŋnín, kìn shwéri‑íì tó e wìr wùn. M kù‑úù súŋnín, e bìnèr kinyo ke Jov.

²¹ Bó m yòʼ yíi bìn kinyo, e fo e wìr ji woo jeéy, a bó m yòʼ yíi a leèrì wír e shúu.

²² M yòʼ fə̀m kì mó a leèrì wír. A m mùm, bo Ŋgaà Mbóm wom kù‑úù laar mo láarin.› »