Ŋwàʼ Jov 29 - ŊWÀʼ NYÙY

Jov máysí kisúŋnìn kee kùm nsaʼ rə 29–31 Jov kuúmé vijuŋ və́ vee fó mbìy

¹ Á bèy, Jov ku shaà fo mbìy e wun kisuŋnìn, a sham wún jii:

² «Éè mò, la m kù sí ri kfə̀n a dzə mo mò‑oò dzəə̀n fó mbìy à vèné, e ghan se mò‑oò dzəə́ dzə́, a Nyùy leey fo mò.

³ Dzə̀ ghán se wù‑uù yii, a kikaʼày kfə́ kí bán e mǒ kitu, kaʼày mo, a m ghán, shaa fo mesənér.

⁴ Mò‑oò dzə́, kù túy shwín, a wú táví, a Nyùy koŋ mo, kiŋsìn láʼ yém.

⁵ Yì‑iì dzə̀ é ghan sin, a Nyùy woo Ŋgaà Vitaàví Vidzə̀m dzə̀ə́ vèr wun, a wón vémé kaárí mo, e tàr.

⁶ Nyám sém sí fáŋkír, a m kám vín e kuʼùn, nyeŋ meŋgvə́r me oliv, a mè léŋ, fəə́ nyanyày.

⁷ M fəə́sin fo atǎr wòŋe tínen vinyo veé wòŋ, m dzə̀ʼə̀m vèr áwune é ŋgèŋgèr.

⁸ Wónlě nsùme yén, a m wiyì, á wàa lìr. M mee, ŋgày sé wìr si lòkìr, a tiynín e yuv.

⁹ Atǎr laʼa shèr kisúŋnìn, a ker wó e shùu shuù.

¹⁰ Áwune dzə̀ʼə̀m, kisúŋnìn ki kfə̀n é bvə̀m, e dzə̀ʼə̀m, shúu tàŋ áwune.

¹¹ «Wìr yú kisúŋnìn kém, wù kù bùrí mo búrín. Wìr yén mo, wù kù a binsí, a kwa kwaán.

¹² Mò‑oò dzə́, yú tóŋ aghéʼncey, fəər áwune fó ŋgeʼ, sə́ wón tsə̀, wón, aá yòʼ kér ŋgaà benben.

¹³ Wír ve vé‑eè toóme sə́r sàyi kù‑uù wáy mendzə́v e mǒ wo, a vikǐy ŋkfəə yú vijuŋ bìʼ sə́ ye mò‑oò rə́si sə́ áwune.

¹⁴ Mò‑oò lì ne yii ye juŋe é wùn mo wìr màʼ ndzə̀y. Kikúm wùn à tán yémé kù‑uù sì kinyo ke mò‑oò yii là kiloʼ.

¹⁵ Yì‑iì caacà mo amfìr, a kù‑uù dzə̀ mo shwín antèŋ.

¹⁶ Mò‑oò dzə̀ tàr fó aghéʼnceyí. Lo, m tìím mbìy e wìr kinyò, a m yòʼ fə̀m kì ŋgaàŋ.

¹⁷ Mò‑oò kotì sóŋ fo wìr wo wù méŋ Nyùy shuù, boyìr wír wo ŋgaàŋ nəʼsì.

¹⁸ «Mò‑oò kwaʼtì ji m kù wíy shiíy bèn, e koŋrí, e neèm e mǒ lav bèn, e kpu ji nyaáŋ.

¹⁹ Mò‑oò dzə̀ moo kicí ke á bìyìn é ghaa ndzəv, a ŋweʼe tíy e vàv si wó vitsə́ʼ vifur.

²⁰ Wíri yòʼ‑oò lo yàr fó a ghvəm mo, a vitaáví vém ví kù kúy kuyín.

²¹ M lóo fo ntir, wíri bònen fò vituʼùr, a yuurí kisə́sə, lóo tir, á wàa yuurí kinyo ke m suuyì e mbòŋén.

²² M suuy kinyo, la wìr yòʼ kfə̀n kàr, jí sém sí bònen nə̀ə́ aáwuné wùn mo wuú nə̀ə́ e nsay ye yumér.

²³ Áwune lo, á wàa shìy mo mo wíri shìy wuú, a sə jí sém é shií mo nsay ye yumér sə̀ wuú.

²⁴ M bvər vishí vém vèr áwune, kí kù ghàʼ áwune ghaʼán ji sà ghìnsín a. M ŋwaŋè, áwune lì é shií mo dzə̀ kifá keé kilùm.

²⁵ Mò‑oò dzə̀ kilìmbìy kév, a yì‑iì din mo dzə́ə aáwune. Mò‑oò dzə́ aáwuné mvəm mo fòn yii kér vé rər və́. Kinyo ki du gháʼ áwune, wù tòm.»