Ŋwàʼ Jov 28 - ŊWÀʼ NYÙY

Nsùyrì Nyùy làm woo kùm vifií

¹ «Dzə̀ suuyrú, bií dzə̀ shó fo á yii túŋ *kisha ke mbàm ke fəvír kí, a kirə́ʼ kí dzə̀ shó fo á yii sheŋrì kisha ke mbàm ke baar kí.

² Á yii túŋ kisha a dzə̀ fó nsay, reŋ kisha ke kí baaŋè baàŋèn kee *kopa a dzə̀ fó tiy.

³ Wír ve á túŋ tíy kishàa nəə e bii e vikaʼày ví, á wàa tàʼ tíy kishàa, a dù kwaʼda mo vitaáví vév ví dzəə̀n, a tàʼ, a virə́ʼ ví sə́n ji cùm, beéme.

⁴ Áwune lo, á dù a dzə̀ é tím kwaʼ, e bó a tuŋ. Kirə́ʼ féyì, a bó kiwuú ké wìr ki yòʼ fə̀m yii bav fo. Wìr lo, wù lèv, e sə̀y é bii a dzə̀ é kfəə̀, a tuŋ wun wun, là kikum ke wìr.

⁵ Nsay yee fó yuv rəsìn, fəər a dzə̀ viyíkìr, yii bèy, a mvə̀m nsay shwí kfə́ mo á tòn tònèn e və́yí.

⁶ Tíy yee fóo dzə̀ fo á yii fəər *síbaŋ yee safiri, a tíy yee shooyi kér ŋkfəə̀rì se kishà ke mbàm ke baar kí.

⁷ Shinə́n shí yòʼ dzə̀ shó she shí kiìn kirə́ʼ kin, a fə̀m dzə̀ kilùŋ kiné kí, bo kí yòʼ‑oò yiì ne yèn fó.

⁸ Nyàm kwaʼ ye yì ghaamen é shiliv yóʼ ne fə̀m làʼ kiwuú kfə́ fó, a fə̀m dzə̀ bvərə̀ʼ wo wù nyamkìrì, bo wù yóʼ ne yàʼáy fó.

⁹ A wìr wo wù túŋ tíy, səə kfə́ sáylúm sə́ən e vitaáví və́ ví, túŋ agwan fo sar fo sar, binèrì.

¹⁰ Wù lo, wù səə̀ dzə́ə sí, sí tòsín vilán, a saáy tíy e dzə̀m ji wun sà‑áà yén yeé kilùm a.

¹¹ Lo yímóʼó, wù dù é ntòŋ sé ndzəv, a sù síy, su su, saayì, kisha ke mbàm ke kí kì laynìn kí yènsín.

¹² Yii bèy, a dzə̀ ké vifii, wìr tàʼ, e yèn a dzə̀ feé? A kiíy yee kiíy jeéyjeéy fó vinyòo dzə̀ kfə́ a dzə̀ feé?

¹³ «Bó wìr msòŋ yòʼ fə̀m kì mo a dzə̀ káv vifii, wú wàa dzə, a bó yòʼ dzə̀ á wáa tàʼ vifií a dzə̀ fo wír ve tiné wòŋ, á yèn.

¹⁴ Ndzə́v yeé loònsayi tún feyì ji bó vifií ví yòʼ dzə̀ á fo wun dzəə̀n, a rìbà ndzə̀v sháʼnin ji ví yòʼ dzə̀ á fo wun dzəə̀n.

¹⁵ A bó yòʼ dzə̀ á yùn e mbàm si, kìn dzə̀ e kisha ke mbàm ke baar kí, kìn e ke fəvír kí.

¹⁶ Aá fə̀m fìʼ kisha ke mbàm ke baar keé Ofir e le, kìn *síbaŋ yee oniks, kìn yee safir, bo yòʼ dzə̀ yí yùn.

¹⁷ Kisha ke mbàm ke baar kí, à síbaŋ ye yí rán moo kileèyi, bó yòʼ dzə̀ á lì, a fìʼsìn sho, a bó yòʼ dzə̀ á kùvsín e vifá ve sùsù vi, vifá aá fér e kisha ke mbàm ke baar ke sheŋrìn kí.

¹⁸ Káv vifií kùy, e shaà kfə́ə saàkìnshìy e dzə̀m, a bó yòʼ dzə̀ á lì, a fìʼsìn e *síbaŋ yee koràa, kìn e síbaŋ ye yí rán moo kileèyi.

¹⁹ Síbaŋ yeé Etiopia yee topari yoʼ mèʼ vifií, a bó yòʼ dzə̀ á fìʼsìn e kisha ke mbàm ke baar kee wúntí kíwun ki.

²⁰ «Bo dzə̀ ji vifií ví‑iì lò fó gha féyì? A kiíy yee kiíy jeéyjeéy fó vinyòo dzə̀ kfə́ a dzə̀ feé?

²¹ Vifií ví dzə̀ é kilìr feyì fo kifá ke ŋeʼèn kí kidzə̀m, a bó yòʼ fə̀m dzə̀ menə́n me mè féŋ e shwer mè yèn.

²² Kirə́ʼ ké ŋgeʼ wùn à woŋ aŋkfəə kù suuy jii, ‹Ké vifii, vèr kù‑uù yù a dzə̀ leŋ və́.›

²³ «Kù kì Nyùy dzə́ə ye yì du fo vifií ví dzəə̀n. Kù mày wun wo wù kiìn fo ví dzəə̀n.

²⁴ Nyùy lo, wù wàa leéy virə́ʼ, a dù, a meé fo kitú ke nsay ki ndzə̀yìn, a yen kifá kidzə̀m ke kí dzəə̀n é sar shùy,

²⁵ e nèn a fìʼ vidzəəsì vé shwer, a sìysì vikuʼùy vé rìbà ndzə̀v.

²⁶ Mo wù‑uù lèmèn nsər ji á mo wuú wáa lo, e dìn dzə́ə ye kishèv ki wáa ghan sho,

²⁷ e nèn yèn vifií, e fìʼ vidzəəsì və́, e kàʼày kijuŋ feyì, e nèn bìnsí.

²⁸ «Á bèy, Nyùy nèn yòŋ e wìr msòŋ jii, ‹Rúrú, wìr lóo ghvəm Nyùy, bo sì vifií bey, lóo bìn ndzə̀m é kinyò ke bi kí, bo wù sí kiiy jeéyjeéy fó vinyò.› »