Ŋwàʼ Jov 24 - ŊWÀʼ NYÙY

Jov yén kfə́ ji Nyùy yór a vinyo ve wíri yórín

¹ Ŋgaà Vitaàví Vidzə̀m yòʼ lem ghán se wù tínen nsaʼ wìr ve bií ji ka? Yiì ka la wír ve á yú Nyùyi yòʼ a yen, a wù maʼ ŋgeʼ e wír ve á méŋ wuné kitu?

² Ámóʼ vee wíri lo, á kùvsín bìíy se sum, lo, á faàsì ŋgoo se nyàm fo anjoó, a tatí sév shó.

³ Á lo, á kùvrì vimbèʼbìy vé wón ŋkfə, e koò mbòŋ wiiy ŋkfə e kaa.

⁴ Áwune yén ŋgaà kitàn, á kìír kiirín fó dzəə, vé kitàne yú áwune, á wàa lìr lìrìn.

⁵ Rúrú, áwune vee aŋgàa kitàne lo, á fəə̀, a siy vifá ve yi síyín ji á sà‑áà koóy kifá ke wùn à wóné luŋ fó fo a? A ghan, a tàʼ moo vimbèʼbìy veé kwaʼ ve ví ghán a dzə̀ é virə̀ʼ vé woʼ ví.

⁶ Áwune ghán e kwaʼ, kweʼrì súm sé wíri, síy vifá fo aŋgàa mbàmé sum sé vitiír vé *vayin.

⁷ Áwune shiiy kinshóʼ ŋkuuŋkùŋ, a kidzə́r kí yúy áwune, a bó á yòʼ fə̀m kér shifarìn shée taár e wùn.

⁸ Wuú ló áwune áàgwan, tín aáwuné kitu, aá nèn nyéŋ, kúʼti a dzə̀ é sar se vilála ji kibeey.

⁹ Vé mbàm ámóʼó foor vé kitàne mbàm. Á dzə́r, sí buu, á nèn kòy wón tsə̀ fó vin ji tiír.

¹⁰ Á lo, á kweèy ndzə̀y fo vé kitàné wùn, á wàa ghan kinshóʼ ŋkuuŋkùŋ. Kù búʼ vé kitàne saár vé mbàme, a bó yòʼ dzə̀ wìr biìmé, á lùʼ sí e shuù.

¹¹ Áwune nyeŋ meŋgvə́r e vé mbàmé sum, nyeŋ báŋ se vayin se á fəər meluʼ fo fo, yii bèy, kù kpú kilòŋ ke yumén kí kpuún.

¹² Wír ve vé mbàme yiìn, á wáa kìʼ kpúu sí kónsi fo mvə̀mlaʼ, a ve áwune lemeriné tóŋ ji Nyùy ku sə̀ á áwune. Yii bèy, a bó Nyùy yòʼ sáʼ vé mbàme bìʼ njiìn wov.

¹³ Wír ve bií ban ndzə ye ranén bánen. Á yòʼ fə̀m kì dzə́ə se á yii ghán sho e shùy. Á ján janén, fəə́ fo dzəə.

¹⁴ Njuyrìwìr lo, wù tùm é yuv, a ndzə yóʼ ne kàʼ, e yùyrí vé kitàn wùn aàghéʼnceyí. Ndzə sə́né, wù wàa dzə moo shóŋ.

¹⁵ Wìr wo wù li vikǐy wíri kù shiy kfə́ a dzə̀ meraaràŋ, shiyì, sévti ji yíi yen la mo, sévti bèy, litì sí.

¹⁶ Ndzə sə́n, laŋsìnè, ashóŋé wàa kivtí lav se wíri, lóo dzə e shùy, á lìr, a neŋnín e melav. Bó áwune yòʼ kì kinyo ke kí shaa e shùy.

¹⁷ Ndzə ye ranén kù dzə̀ fo áwune moo ye yì sə́n beéme. Aá kù koó viŋkar a dzə̀ wùn à ndzə ye sənér, shóʼ virom, a wíri fan áwune.

¹⁸ Yii bèy, áwune kù dzə̀ moo kifá ke kí léŋ shaa e kitu ke ndzəv ji ghàár. Á shòv ne kirə́ʼ ké nsay ke áwune kérí, a bó wìr yòʼ dzəə́ tiir kiwuú aáwuné sum sé vitiír vé vayin.

¹⁹ Mo shùy wùn à lume lo, yí yùmér ndzə́v kintòne, bo kù dzə̀ réŋréŋ mo sayi lo, yí mèy aŋgàa yìi vinyò ve bi ví.

²⁰ Ayìy véví ku làysìn áwune, é séʼ si ku là wún wóv nyom nyom, é yír yéví lay láyin. Á ku laàr áwune láarin moo kicí ke á bàʼàn, e sàn.

²¹ Áwune lo, á wàa shwìv wiíy woo kár, a bó wù yòʼ kér wán wo wù bin kinyo kfə́, a bó áwune yòʼ yii kinyo ke juŋ kímóʼ kí e wiiy ŋkfə.

²² Yii bèy, Nyùy lo, wù sə̀ŋ áwune e vitaáví və́ ví, e dù sho. Lo, túmninè, bo dzəʼə̀m wìr ve bií kù mayì.

²³ Wù lo, wù kìŋsìn áwune fó shintàm, aá kù yéʼti a dzə̀ shó, yii bèy, a wù kù wáy sí aáwuné wùn.

²⁴ Wír ve bií lo, á wàa dzə, a kùʼkìr, e bǎm shintàm, á nèn kù ŋeèmé, e lày. Á kù kiir áwune kiírín mo á kiir ámóʼó vee wíri, aá nèn kù yúm, bvə́ʼəy moo vitú ve saàr.

²⁵ Á mo kí yii dzə́. A dzə̀ dìn la ji m bóʼti bòʼtín? Wìr wóo yiì, é kisúŋnìn kém kí wáa dzə là mvə́m dzə̀ la?