Ŋwàʼ Jov 23 - ŊWÀʼ NYÙY

Jov ndzə́y ji bo wun kì yèn á Nyùy

¹ Á bèy, Jov nèn a bìnèr e Elifas, a suúy jii:

² «Fə̀m e to lán, ndzə́kír ye m ndzə́kir e Nyùyi kù távkir tàvkín, mo m fə̀m kónsi e ŋàŋ, Nyùy kù dzəsì ŋgeʼ sém dzə́sin.

³ La m kù sí ri kìíy fo dzə̀ m yèn Nyùy a? Ji m du, e yèn wun fo wù dzə́, tínen nsaʼ.

⁴ M du, é m neer yéem yee nsaʼ e wun si, neerì, é m mvəʼ sár wóm vito e dzə̀m, a tunér kitú kém.

⁵ M túnerì, é m wáa yuurí, a səə̀m kfə́ə jì se wù yíi a bìnèr, a gwàrìr kinyo ke wù yíi a suúy e mò.

⁶ A m kì yèn Nyùy, wù lì vitaáví və́, a kìŋnìn vèr wun à? Bó m yoʼ yèn bey, a dzə̀ wù kù a yuurí a dzə̀ ke m suuyì.

⁷ Vèr wun yíi tar fo, é wù ku yuùrí kinyo kém, bìʼ fo m dzəə̀n wir suuyrú, yuúri, é wun woo Nyùy wo wù tínen nsaʼ yem tínén, e fò e mò, é m boy ŋkuuŋkùŋ.

⁸ «Yii bèy, m du mbìy, leey Nyùy fo shùy yii tó, a wù yòʼ dzə̀ fó, kfə́n e bàm, leey fo yì yii nəə, e làa yòʼ a yen.

⁹ A wù fə̀m lim lim a dzə̀ fó kùy, bo bó yòʼ dzə̀ m yèn wun, a wù fə̀m lim a dzə̀ fó tsən, bo bó yòʼ dzə̀ m shòv wun e si.

¹⁰ Ke m kiìn kí dzə̀ jii, wù kì dzə́ə ye m shoʼon, a ghan sho, a wù yíi tàr kinyo kém, é m fəə́sín moo *kisha ke mbàm ke baar kí.

¹¹ M kù ghán a dzə̀ e wun mbòv shilív shém shidzə̀m, a m ghàr ne kiwúu kfə́ féyì, a tiy sho shilív shimòʼón.

¹² M yoʼ bìn ndzə̀m é nsər ye yì fəə́ fo wun shuù. M lèm ne jí se sí fəən fo wun shuù, a sí dzə̀ fo mò é shií, e shaà viyíkìr.

¹³ «Yii bèy, Nyùy kù dzə̀ ji wun. A dzə̀ bìnèr la vifií və́? A wù wày ji wun‑éè yii kinyo, bo wù kù‑úù yii a dzə̀ kíwun.

¹⁴ A wù yii kinyo e mò a dzə̀ ke sìysìn wun, kér antaŋ vee bey, ve wù baan ne, e lèm bìʼ mo anín.

¹⁵ Bìʼ bey, m lóo gwàrìr vinyo və́, m wàa fàn, lóo kwàʼtì vinyo vìn, wúné wàa yàʼ mo yáʼan.

¹⁶ Wun woo Nyùy yiì ne, m wáa dzə njàʼshìlìv. Wun woo Ŋgaà Vitaàví Vidzə̀m lo, wù wàa bemér mo.

¹⁷ Yii bèy, bó yòʼ dzə̀ m sə̀tí shuu wóm ji virə́ʼ ví sə́n, beéme, fə̀m mo ví sənen, e làŋsìn, la m yòʼ a yen kirə́ʼ.»