Ŋwàʼ Jov 21 - ŊWÀʼ NYÙY

Jov bínér e Tsofar ji wír ve á méŋ Nyùyi sà yén ŋgeʼ e ghàn ka á?

¹ Á bèy, Jov nèn a bìnèr e Tsofar, a suúy jii:

² «Yuúri kisúŋnìn kém kí kijuŋ. Ku yuùrí, é shilív shém shí fiʼ rə̀sìn.

³ Fó mo kilíŋ, é m súŋnín. M súŋnin, maysì, à koŋ, à wàa sheʼ mo.

⁴ «Fo kém kí, ndzə́kír yémé kù yòʼ dzə̀, a dzə̀ vèr wìr msòŋ á? A kí kì dzə̀ bey, la m yòʼ a yaŋyáŋ à?

⁵ Vèn ku kàʼày kinyo ke kí kooyin mo kí, é kí jívír ven, é shuu wóné má.

⁶ Mómò, m fə́m lóo kuumé, m wàa fàn, wúné wàa yàʼ mo yáʼan e dzə̀m.

⁷ «A dzə̀ wír ve á méŋ Nyùy, bo á rə́si shiiy e ŋàŋ, dzən, kóŋri, tsəətìn e bùʼ bìʼ ka?

⁸ Áwune dzə́, yén mo wón véví baʼrì aáwuné ghaŋ, kù dzə́, yén mo ŋgwàʼ yee áwuné vito kúyí.

⁹ Áwune dzə́ aáwuné melaʼ, là kinyo ké a fàn, a bó Nyùy yòʼ maʼ ŋgeʼ aáwune.

¹⁰ Ambòŋ véví kù koor nyám ghán sidzə̀m, a bó nàʼ wov yòʼ tìím bvəm, wù kàr.

¹¹ Wón véví lo, á wàa mèʼèm, a fəə fo laʼ moo ŋgoo njiì, a dzən kidzə́n, a baa kibaá.

¹² Á lo, á wàa kùm lúŋ nshì wùn à nshùm sí, a yòv. Lo yímóʼó, á wàa toŋ loŋ, a yu vijuŋ.

¹³ Wír vìne kù néŋ a dzə̀ é mvə̀m fùʼ kishiíy kidzə̀m, kù bey, kù bey, e dù meé mo kpúu yíi lì áwune ji nyaáŋ.

¹⁴ «Á lo, á wàa te lám e Nyùy jii, ‹Kíŋrí fo věr ghaŋ, bó vèr yòʼ kér shií fóo kiíy mo à taʼ ji vèr wáa yiì.›

¹⁵ Á té lám bey, ŋwáy jii, ‹Nyùy woo Ŋgaà Vitaàví Vidzə̀m dzə̀ la, é bo vèr wáa ghvəm wun? A vèr lò, a bùnrì wun, bo séʼ wor yíi a dzə ka?›

¹⁶ Á ŋwáy Nyùy bèy, a m kì kijuŋ jii, Vikuʼùy vé wìr ve á méŋ Nyùy vìn vi yòʼ lo a dzə̀ fo áwune, a bó yòʼ dzə̀ féyì m yuùrí ntir yev.

¹⁷ «Yii bèy, wír ve á méŋ Nyùyi kù yòʼ lo, á sàsìn, e gbù, e kpù á? Vishí vi kù yòʼ lo, ví wàa bir áwune á? Nyùy kù yòʼ lo, wù shwìíy kilòŋ, e màʼ ŋgeʼ aáwune á?

¹⁸ Áwune kù yòʼ dzə̀ rú moo kisáŋsáŋ ke shwéri li, du sho a? Á kù yòʼ dzə̀ moo mvə́y se kinsəm ki feer feèrín á?

¹⁹ «Vèn yoŋ kén ji Nyùy yii li kinyo ke bi ké wìr, siir a dzə̀ e wón ŋgaàŋé kitu. Nyùy kì yíi màʼ ŋgeʼlàʼ a dzə̀ e wìr wo wù méŋ wun kitu, é wù yéʼéy kinyo.

²⁰ Nyùy kù kì yíi yiì, é ŋgaàŋ yén ŋgeʼ ye yì toomen wun, e yutí mo Ŋgaà Vitaàví Vidzə̀m yii shwiiy kilòŋ, kí wàa kìʼ.

²¹ A dzə̀ wù kfə̀n a ci ka fó kinyò ke kí wíy siíy, a koóy kfə́ə rə́, a dzəʼə̀m rəə́ ndzə́y ne?

²² «Yii bèy, wìr dzə̀ shó wo dzə̀ wù yèʼéy Nyùy, e dzə̀sì vifií və́ á? Dzə̀ wun woo Nyùy wo wù sayrì vifá vidzə̀m, fə̀m à veé yuv ví shó.

²³ Wìr wùmòʼ lo, wù kpù, a wù kì ghán, gar gàrìn, yén ji vinyo və́ ví ghán e mboʼ, a dzəʼə̀m rəə́ dzə̀ e kiŋsìn.

²⁴ Wù wàa kpu, a wún vəə́ dzə̀ fóm fóm, a vighvə́r ví dzə̀ə́ e wùn wó ji ŋkǒŋ.

²⁵ Wùmòʼ woo wír lo, wù kpù, a yúy nyár ye yí ton shilív sə́, a bó wù yòʼ‑oò yiì ne yù vijuŋ ve kifa kímóʼ kí gheéy.

²⁶ À vəné, à vəné, wìr dzə̀m kù kpú, aá dzəəmè, dzəəmè, a séʼ si diy yév shó.

²⁷ «Ké ru kí, m kì kwaʼtì yén e dzə̀m, a m kì mo vèn wóŋ ji á ku lòr á kinyo e mǒ wùn.

²⁸ Vèn té lám e mǒ wùn jii, ‹A taà saʼ bùŋ fo wo bi, láʼ rəə́ dù é vifə̀m à? Táv wo wír ve á méŋ Nyùyi shiiy shoo kfə̀n dzə̀ə́ à?›

²⁹ Bó vèn yoʼ dzə̀tí e wír ve á ghán e yuví a? Bó vèn yòʼ kì vinyo ve áwune rə́si ghán, yén, ferì à?

³⁰ Kí á fer ji ŋgeʼ si gbu, sí jaàmè wír ve á méŋ Nyùy jáamen. Nyùy lóo shwiíy kilòŋ, lóo màʼ ŋgeʼ e wòŋ, áwune kù bòy kév bóyin.

³¹ Wìr wo wù nyaysì liì wìr wo wù méŋ Nyùy yòʼ dzə̀. Wìr wo wù siir ŋkfə́tír e wun bìʼ kinyo ke bi ke wù yiìn yòʼ dzə̀.

³² Wù wíy kpu, aá li wun ji nyaáŋ, e dù dzəə̀mè, é wíri wáa rəsí e wun kitu ke sày, a dìy wun e mbòŋén.

³³ Màŋgòŋ wíy a mèʼèm, a wìy kpú rə́, é wù wáa neŋ e sày bèn ji dèʼ.

³⁴ «A dzə̀ vèn ghàn é le, e bó a rəə̀r mo e jí si, a sí dzə̀ là mvə́m. Kinyo ke a dzə̀ vèn bìnèr e mò kí yòʼ dzə̀, e shaà kimboʼtì.»