Ŋwàʼ Jov 20 - ŊWÀʼ NYÙY

Tsofar súŋnín e Jov fo akàŋ vee abaà

¹ Á bèy, Tsofar woo wír woó Naamat nèn a bìnèr, a suúy jii:

² «Kinyo ke à kì suuyin kí sə̀ʼsì ne kwaʼtì yém, a m kù‑úù súŋnín. Kisúŋnìn ki kív mo kívín.

³ M yù ne mo à sáʼ mo, kí wáa tinsín mo é ŋàŋ. Kiíy ye m kiiy jeéyjeéy fó vinyòo ku nèn a dòmsì mo ji m biner.

⁴ «Bó à yòʼ kì mo kí‑iì dzəə̀n féyì fo yàŋgùʼ, e kèʼ mo Nyùy‑iì bomen wír, e lèm e nsay à?

⁵ Bó kí yòʼ‑oò dzə̀ ji vijuŋ ve wìr wo wù méŋ Nyùy vi yòʼ yii tíytiyì, a shéʼe yòʼ yii laáti e wír ve bií shuù à?

⁶ A kiŋkoʼòrwùn ké wìr wo bi kí fə̀m yiì, wù dar, e kòʼ, e kùm yúv, kitú kfə́ kí fəm kòʼ, e tàŋ mbàʼ,

⁷ bo wù kù wíy lày kisáŋ moo jáŋ ye wù nye, é wír ve vé‑eè kiìn wune wáa dzətí ji wù bèé a?

⁸ Wù kù wíy shaà ji ghaàr moo njèm, a bó yòʼ dzə̀ wìr kfə̀n yèn wun. Rúrú, Nyùy kù wíy laàr wun, é wù ŋeémé, e lày moo vinjeenjèm.

⁹ Wìr wo wù‑uù rə́si yén wun yòʼ kfə̀n dzəə́ wìy a yen, a fə̀m dzə̀ wír vee wun kfəə, bo wìr wo wù kfə̀n wíy shov wun yòʼ kfə̀n dzə̀.

¹⁰ Wón vəə́ kù wíy a beè a dzə̀ vé kitàne, e bó a lùŋ, a wúnwun kitú kfə́ kù wíy siìr bùʼ wo wù‑uù rə́si faasì.

¹¹ Wù dzə̀ə́ wir wàʼbìn, a vighvə́r ví dzə̀ə́ e wùn wó ji ŋkǒŋ, yii bèy, a wù wíy lì vinsùm və́ vin, e dù, a neŋ sho e sày.

¹² «Mo kighèʼ ki dzəə̀n fo wun moo kifá ke wìr nyóŋ, a kí nyomè, a wù rə́ʼti e sar kiliimé, fo kí táv, e mày,

¹³ fə̀m mo kí nyom wun e ŋàŋ fo wù maʼti é kí du, a wù kù kér kerín é shuù,

¹⁴ bo nyome kù nəə e bvə̀m wo, e kway kwayín, e kfən ji ndzəʼ búv e wùn wó.

¹⁵ Wù sum mbàm, kù mo wìr mèy vifá ve yi, a sí yòʼ yíi ndzə̀ytì e bvə̀m wo, Nyùy kù yíi yiì, é wù suʼ sidzə̀m.

¹⁶ Wù kù yíi nyoŋ ndzəʼ búv, é yì yúy wun, kù mo búv tè wun teén.

¹⁷ Bó wù yòʼ wíy shov vijuŋ e wòŋ fo wù dzə́, woŋ wo vilu wùn à vín nyàme tsəətìn fo moo mendzə́v.

¹⁸ Wù yíi siìr kifá kidzə̀m ke wù gisin, e kèŋ, a bó wù yòʼ wíy luʼ kimòʼón e shuù. Wù yòʼ wíy yu vijuŋ ve séʼ wo wù kavnin wáy, e kòóy.

¹⁹ Bó yòʼ dzə̀ wù yù, bìʼ fo wù nyavrì e vé kitàne, táy áwune, faasì lav si, a bó yòʼ fə̀m‑eè bòm wun.

²⁰ Bvə̀mkúʼ və yòʼ fə̀m biíme ji shilív shí neem wun e nsay, a bó yòʼ dzə̀ féyì wù wìy yù fóo bavtí kifá ke wù kér shií shó.

²¹ Bó kfəʼ kifa yoʼ kfə̀n bèr ye dzə̀ wù yì. Bìʼ bey, bó vijuŋ və́ ví yòʼ dzəə́ wìy tiytíy.

²² Wù wíy lòo yi kitú, é ŋgeʼ si sasin, e gbù, e gbù feyì, e rəʼə́y wun rə́ʼə́yín.

²³ Wù wíy lò ji wun yíkír, e kùr, é kilòŋ kí shwiíy Nyùy, é wù maʼ ŋgeʼ e wun kitu. Wù lóo yikír, é dòʼshwiiy Nyùy sum wun.

²⁴ A wù fə̀m bàʼàr kifá ke kileemé ké kishà ki, bo mvən ye á fèrìn e kisha kee *brons ki kù‑úù té wun, e tòsín.

²⁵ Á səŋè, é yí fəə́sín fó ndzə̀m, ké ru kí, a mbìv menshev tóʼ ne bay, e meèsín, é fane sum wun súmen.

²⁶ Bùʼ wo wù kérí wíy rèŋ e dzə̀m. Wù wíy shwi e və̀y wo bó yòʼ tònèn wir msòŋ. Və́yí wíy səʼsí wir dzə̀m wo wù berin e wun laʼ.

²⁷ Yúví wíy sàr vinyo və́ ve bi ví vidzə̀m, é nsay binkir, e kìʼ wun.

²⁸ Bùʼ woo wun lav e dzə̀m wíy səʼsí, kilòŋ kí shwiiy Nyùy e kishiíy fó, é kéŋ rəə́ léŋ e dzə̀m.

²⁹ «Á kinyo ke Nyùy lèmèn ji ké wìr wo wù méŋ wun, kitsə́ʼ ke Nyùy‑iì sìysìn féyì, e tà mban sho ji kfə́.»