Ŋwàʼ Jov 17 - ŊWÀʼ NYÙY

¹ M yén kém ji kém kí yòʼ kfə̀n dzə̀ə́, a vishiíy vém ví ndzə̀y ne. M kù sí kiʼ a dzə̀ say.

² Rúrú, wír ve á jaʼ moó gìŋ ne mo, e tàr, a m kù yén e sí yémé mo á té lám e mǒ wùn.

³ Éè Nyùy, kù dzə̀ tìím wò mbìy e mǒ kinyò, wówò kitú ké, ku tìn mo. M yòʼ kfə̀n kér wùmòʼ woo wír.

⁴ À sə̀tí ne vifií vé wìr ve á jaʼ mo vin fo á wáa kiíy jeéyjeéy fó vinyò, kí nén a dzə ji à ku sə̀r áwune sə́rin fo á gháʼ mo.

⁵ Á yii maʼ ŋgàn jii, a wìr fiìnè ŋkar sə́ ji wun fiʼ kòóy rə́ə yee mbìv, bo wón vəə́ kù wíy teèsì kirev.

⁶ Áwune bìnèr ne ŋgàn rə̀n, a te a dzə̀ e mǒ wùn, m kfə́n ji kifá ke nshéʼmé ki, wíri wáa shaà, a sam mentíy e mǒ si.

⁷ M kù sì mendzən mendzən, a síi sí səə́ne mo səənén, m yúm, a shwinín ŋgay kifa.

⁸ Wír vee tìítiy fo shiliví leey mo m yén ŋgeʼ, wúné wàa beemé áwune, aàbaàmènjòó leey mo m yén ŋgeʼ e wír ve á méŋ Nyùyí wo, kí waà tínsin áwune.

⁹ Yii bèy, wìr wo wù yúnin Nyùy kù yòʼ wíy a tiy a dzə̀ e wun mbòv, é wo wù yòʼ wáy kiwó e kinyò ke bi kí wáa kuy kuyín e wun liì.

¹⁰ «Ven vee aŋgàa ntir, vèn kfən wìy rì, e rùvtí kisúŋnìn ke vèn‑eè súŋnin e mò kiy, é m yén. M kì ji bó m yòʼ fə̀m yíi yen fií e věn mvəm.

¹¹ «Vishiíy vém ví mày ne, antaŋ vémé bvəə́rí, e bvəə̀rí adzə̀m, à kinyo ke shilív shém shí tíy sho ki.

¹² Lóo dzə vitsə́ʼə́, ŋkar sém sí wàa yòŋ ji dzə̀ á e shùy, ndzə lóo sən, á wàa faŋ shuu ji wiy a rán.

¹³ M sí yén ji woŋ aŋkfəə kù sí lo, a dzə a ji láʼ yém, é m wáa yìy kikún kém a dzə̀ fó mesənér,

¹⁴ m kù sí lo, a suúy e sayi ji à sì tàr wor, a yòŋ séʼ ji yè wor, kìn jemèr yem,

¹⁵ a kí kòóy rú bey, bo kinyo ke m tiir vifií shó ki bèé lèn? Bo a dzə̀ yèn la kinyo ke m tiir vifií shó e síi?

¹⁶ Bo dzə̀ ji kinyo ke m tiir vifií shó ki sə̀y ne aàŋkfəə́ wòŋ, vèr tátí, e sə̀y, a meèmè e sày.»