Ŋwàʼ Jov 14 - ŊWÀʼ NYÙY

¹ «Á dzəə wír, bo vishiíy və́ ví kù dzə̀ é kitu ke nsay shishàr, a ví kù dzə̀ ŋgeʼ ŋgeʼ.

² Wìr kù kúy moo kibuushì, wù nèn ŋeèmé, e lày. Wù nyéŋ moo kindzə̀ə́ndzəm, dzəʼə̀m rəə́ nèn kù ndzə̀y.

³ Éè Nyùy, à leey ka fo woo bey woo wír, e bóo fə̀m a way wun e kibàʼ ke nsaʼ?

⁴ A dzə̀ fə̀ə́r la kifá kee là *kifàn fo ké kifàn kí mvəm? Bó wìr yòʼ dzə̀ shó.

⁵ À lèm ne vishiíy ve a dzə̀ wìr bèʼrí é kitu ke nsay, e lèm, à ŋwee si shó. À sàáy ne fo a dzə̀ dzəʼə̀m wìri mèé, a bó yòʼ dzə̀ wù kfə̀n yàʼáy.

⁶ Kù bòŋ ji à maʼti wun nyaáŋ, e làa yòʼ a leéy kinyo kfə́, é wù wáa sheʼrí moo ŋgaà lìm wo wù lìmèn lim, e sə̀ vilaámé é kishiíy.

⁷ «Aá bàʼ kicí, a dzə̀ kí kfə̀n tòkír, a kuy, a bó yòʼ dzə̀ ke kí tókir ki kfə̀n kfə̀yìn.

⁸ A gháŋé fə̀m kòŋrí e mvə̀m nsay, kinyè ké kici kin ki foy,

⁹ bo shindzə́v shí yíi kùm, é kí ku nèn tòkír, a kuy ji wan kicì, a fo tám si.

¹⁰ «Yii bèy, wìr kpú, bo vitaáví və́ ví kù mày ne. Kiyoy ke wìr ki mayì, bo ké ŋgaàŋ ki kù mày ne.

¹¹ Mo kibáŋ kí lo, kí wàa shùŋrìn, ndzə́ví shuŋrìnè, lo fo bàm, yí yùm,

¹² bo kù dzə̀ sá réŋréŋ mo wìr kpú, bo wù gòʼ ne e ŋòròʼ, a bó yòʼ dzə̀ wù fəə̀ fó kpu, e meé mo ndzə wíy mày, a bó yòʼ dzə̀ wìr səʼsi wun, wù kfə̀n nànèn.

¹³ «Éè Nyùy, la à kú sí ri lìtì mo aàŋkfəə́ wòŋ à? La à kú sí ri lìtì mo lítin, é dòʼshwiiy wò may ŋkuŋén a? Yiì ka féyì, fo à liti mo, e sìysì ghán se à wíy kuumé mo.

¹⁴ A wìr kpù, wù kfə̀n fəə̀ fó kpu, a ghan à? M kù‑úù wáa yen ŋgeʼ, a leéy a dzə̀ fó mbìy, mo kishiíy ke à wíy kuumé mo kí‑íì gheén.

¹⁵ Kí gheenè, áà wáa jàŋ mo, é m wáa biimé, áà wáa dìn shií wo à kér fo mò, mo wo wò‑oò bomen e wó yée.

¹⁶ Bo à yíi a leéy fo mò, a geʼsín sho, e làa yòʼ dzə́ə a shìy shìyìn ji m sà‑áà jáy kinyo a.

¹⁷ À yíi a teʼ ajay ve m jayin adzə̀m, a sətí kinyo kém ke bi kí kidzə̀m.

¹⁸ «Yii bèy, mo gwan lo, wù keèsì, kilán ki meènè, e dù gbù,

¹⁹ ndzə́ví wàa woʼ tíy, kúŋ wàa kuúy nsay, a dù sho, bo kù dzə̀ sá réŋréŋ mo à yii bvəər kwaʼtì wìr msòŋ.

²⁰ À lo, à bvə̀ʼə́y vitaáví vé wìr msòŋ, wù kù nèn dù ŋkuuŋkùŋ. Wù wàa kpu, à wàa yiì, vishí və́ ví wàa nəʼtí. Kfə́ kí kù nèn lò, e mày bèy.

²¹ Aá fə̀m wìy sìíy, e kòʼór antaʼ won və́, bo bó wù yòʼ kfə̀n kì, aá sèn áwune fó antaʼ, bo bó wù yòʼ kfə̀n kì jeéyjeéy fó kinyò.

²² Wù wàa kpu, a wù kù sí yú kfə́ a dzə̀ mo və́ woo wúné ghvəʼə̀, a kpu, a wù sì kfə́ wír wo wù diy rə́ yee kpú.»