Ŋwàʼ Jov 13 - ŊWÀʼ NYÙY

Jov taʼ ji bo wun kì tùnér kitú kfə́ a dzə̀ e Nyùy

¹ «Á bèy, sí yémé yèn ne vinyo vìn vidzə̀m, vituʼùr vém ví yú, e kìíy mo ví dzəə̀n.

² Kidzə̀m ke vèn kiìn, kù dzə̀ ke m kiìn sá. Lá vèn yòʼ a lì mo moo wír wo wù yòʼ kiìn fo shùy tó.

³ M taʼ ji m súŋnín á vèr Nyùy woo Ŋgaà Vitaàví Vidzə̀m. M yár jíŋ ji m ku tuùné kitú kém a dzə̀ e wun.

⁴ Ven vin, vèn sə́ti suuyrú e kimboʼtì ki. Ven adzə̀me dzə̀ ben, a dzə̀ vé kiloʼo.

⁵ A vèn lòo dzə, e sə̀tí shuu wón, bo vèn dìn ne ji vèn dzə̀ á afií.

⁶ «Vèn yuúrí lèn mo m lo, a saʼ nsaʼ yem. Vèn fó vituʼùr ví, e yuùrí mo m túner kitú kém.

⁷ Vèn ghàn kén é le, e bóo teʼ Nyùy e si, a boʼtí kimboʼtì. Vèn ghàn kén é le, e bóo teʼ wun e si, a levtí wíri.

⁸ Vèn téʼ Nyùy e si, din medzə̀jeéy ji ka? A dzə̀ vèn sə̀ rú nsaʼ rə, a saʼ a?

⁹ Nyùy kù yòʼ yíi lòo tàr kinyo kén, é vèn rán á? Mo vèn yíi boʼtí wun mo á bòʼtí wir msòŋ á?

¹⁰ Rúrú, wù kù wíy dìn jay won, a vèn fèn woóne, din medzə̀jeéy.

¹¹ Vikuʼùy və́ ví yòʼ yíi a beemé ven a? Fan rəə́ yòʼ yíi sùm ven a?

¹² Ŋgàn se vèn maʼ si yòʼ dzəə́ kér nsàv, sì kibvə́. Jí se vèn túner kitú kén shó si dzə̀ là mvə́m, sí dzə̀ kfə́ ji ŋkeè woo kibvə́ŋrín ki.

¹³ Vèn sə́tí shuu wóné, é m súŋnín, é kíwun ke kí kooy mo kí koóy.

¹⁴ «Òó mbaà, m ghàn é le, e bóo lì dzəʼə̀m yém, a baa kibaá sho e kitu ke koŋ? M yèe, e bóo lovtí e dzəʼə̀m yémé, a dzə mo koŋ mo?

¹⁵ Rúrú, a Nyùy lò, a yuyrí mo, bo m kù‑úù wáa yeʼtí a dzə̀ é wùn wó. A wù lò a yuyrí, bo m kù‑úù tiím é si wo, e bóo tunér kitú kém.

¹⁶ Á kinyo ke a m yiì, kí yiì lùŋèr mo, bìʼ fo m kiìn ji bó yòʼ dzə̀ mbuʼŋgàŋ yù fóo koʼtí e Nyùy si.

¹⁷ Vèn fó vituʼùr ví, e yuùrí jí sém sí kijuŋ, é kinyo ke m baʼtin kí bónén, e nə̀ə́ e věn vitùʼùr é mbòŋén.

¹⁸ Vèn leéy, e yèn, m bàʼtí ne vinyo ve m yíi a saʼ nsaʼ yem shó, a m kì ji Nyùy kù yíi tinén nsaʼ, e fo e mò.

¹⁹ A dzə̀ fo wìr, bo wìr wo a dzə̀ wù sàʼ nsaʼ yem, e dìn jay wom dzə̀ la? A kí kòóy ji nsaʼ koó mo, bo m kù‑úù sə́tí shuu, e biìmé kpú.

²⁰ «Nyùy, m kù lón a dzə̀ vinyo vibaà cáʼ. Aà biìmé, é m yiì a koʼtí e wò si là fan.

²¹ Ku yàr fó a màʼ ŋgeʼ e mò, e tsə̀ʼ fan yé fo yí wáa bemér mo.

²² À tsəʼə̀, áà nèn a dzər kinyo e mò, é m wáa bìnèr, m dzə́r kém, áà biner.

²³ Vinyo vém ve bi ví dzə̀ visìʼín? Dùŋrì ó e mò, é m kiíy ji jay wom sà dzə̀ ka á?

²⁴ Nyùy, à tsə́mri rə́r wòsò ji ka? À lì mo ji ŋgaà wò vibàn bìʼ ka?

²⁵ M yùm, e mày moo vav kifa, à kfə́n a bemér mo a? Shwéri jum mvə́y fo mvəy, aà jum ji wò‑óò koó, bìʼ ka?

²⁶ «À sàŋ ne rə́mrə́m sé vinyò, a saʼ mo fó fo, fə̀m vinyo ve mò‑oò yiìn, a m dzə̀ə́ wir wàʼbìn.

²⁷ À wày ne kibur e mǒ wuù. À kù shwéʼ mo ghán yémé dzəə̀n, m du fèé, à kù a dzə̀ kiwuú kém.

²⁸ Bó dzəʼə̀m wìr msòŋé yòʼ kù bvəʼ moo kimfòy ke kifa bèy à, bó yí yòʼ kù sheʼèy moo ndzə̀y se séʼ si laan ne à?»