Ŋwàʼ Fəə 7 - ŊWÀʼ NYÙY

¹ Nyùy Tàr nèn sùúy e Mooser jii, «Yén mbà, m yiì ne, à wáa dzə moo Nyùy bèy fo Farao, Aaron woo fər wò wáa dzə ŋgaà ntum wò.

² Kinyo ke m suuy e wò kidzə̀m, à yíi fèr e Aaron woo fər wò, é wù suúy e Farao ji wù maʼti á wír veé Isray, aá lo á fo wun wòŋ.

³ Yii bèy, m yíi yiì, é Farao wáa tav kitú. A dzə̀ jii, m yíi yiì vinyo vinín e wòŋ Ejiv ve ví wáa dìn vitaáví vém, e kfə̀n yiì viŋgaʼnìn ve vinyò vímóʼ ví vinín,

⁴ a bó yòʼ dzə̀ Farao yiì yù kinyo kén. Wù téné, é m nèn màʼ kiwó kém e wír veé Ejiví kitu, é ŋgeʼ ye tavín nəə́ áwune, é bo m fəə́r màŋgòŋ wom woo wír veé Isray fo wòŋ Ejiv.

⁵ M yíi màʼ kiwó kém e wír veé Ejiví kitu bèy, fəər wír veé Isray fo áwuné mvəm, é wír veé Ejivi nèn kìíy ji m dzə̀ á Nyùy Tàr.»

⁶ Mooser wùn Aaron ku nèn yiì réŋréŋ mo Nyùy‑iì suuyin aáwune.

⁷ Mooser‑iì dzə̀ kiyá mwaamé, a Aaron dzə̀ kiyá nshòv sitaár e mwaamé e ghan se áwune‑eè suŋnin e Farao sìn.

Mbàŋ Aaron bínkír é yò

⁸ Nyùy Tàr nèn sùúy e Mooser wùn Aaron jii,

⁹ «A Farao lòo dzə, e sùúy ji vèn din kiŋgaʼnìn ke kinyò ki ji tùm rú á mo ven, à nèn yòŋ, é Aaron li mbàŋ rə, e màʼ e Farao si, é yì binkir é yó si.»

¹⁰ Mooser wùn Aaron nèn dù, e yèn Farao, e yiì réŋréŋ mo Nyùy Tàr kì suuyin. Aaron màʼ mbàŋ rə e Farao wùn à vé saʼ vəə́ si, yì bìnkìr e yò.

¹¹ Farao nèn tòóy akiíy wùn à vé ŋgàŋ vəə́, á yiì sa réŋréŋ, e dzəə ye áwune yii sénin sə́m sho.

¹² Áwune màʼrì mbàŋ sév fó nsay, sí bìnkìr e yò. Ye Aaron yee mbàŋ nèn mèyrì sév.

¹³ Yii bèy, Farao kú a tav a dzə̀ kitú, e làa yòʼ yu Mooser wùn Aaron, kù mo Nyùy Tàr kì suuyin bey.

Virom ve mensə

¹⁴ Nyùy Tàr nèn sùúy e Mooser jii, «Farao tàv ne kitú, e tèn fó màʼtì wíri ji á wáa dù.

¹⁵ Ndzə bvəə́shi javì, à dù, e yèn Farao e ghan se wù fəə́, a dù e ndzəv yee Naay. À lóo dù, à lì mbàŋ yè ye yì‑iì bìnkìn é yò rə̀y e kiwo, e dù, a shìy wun e shùu ndzəv fóo fèy.

¹⁶ Wù wiyì, à yòŋ e wun jii, mo woo Nyùy Tàr, Nyùy wìr veé Hibru tùm á wò ji à yoŋ e wun a ji wù maʼti á wír vém, aá du, e cù mo é kirə̀ʼ ké woʼ kí. M yòŋ ne, e yòŋ ntéŋ, a bó wù yòʼ waà yú.

¹⁷ Wù leéy á kinyo ke m lo yiì lèn, é wù nèn kìíy ji m dzə̀ á Nyùy Tàr. Sùúy a mo woo Nyùy Tàr. À tiísi bèy, à nèn lì mbàŋ ye yì dzəə̀n e wò kiwo, e dzə̀v ndzə́v yee Naay sho, é yí nèn bìnkìr e mensə.

¹⁸ Sə́ si kpúkirì, ndzə́ví lóo shàŋ, é wír veé Ejivi nèn bùú mendzə́v mé a no.»

¹⁹ Nyùy Tàr kfən sùúy e Mooser ji wù suúy e Aaron a ji wù li á mbàŋ rə, e ràmsì e kitu ke ndzəv yeé Ejiv e dzə̀m. Wù ramsi á e kitu ke ye leŋéné wùn à ye liiné, à ye tiyíné, à visə̀m ví, é yí binkir, a dzə a mensə́ mensə́. Mensə́ mè yíi a dzə woŋ Ejiv e dzə̀m, fə̀m á mbìʼ se á semen a dzə̀ vicí wùn à mbìʼ se á semen a dzə̀ tíy sí.

²⁰ Mooser wùn Aaron nèn kù yiì mo Nyùy Tàr kì suuyin. Aaron nàn mbàŋ, a Farao wùn à vé saʼ vəə́ leeyì, e dzə̀v ndzə́v yee Naay, yí nèn bìnkìr e mensə.

²¹ Sə́ se sí‑iì dzəə̀n é Naay si nèn kpù, ndzə́ví wáa rə̀m, a shàŋ, la wír veé Ejivi yòʼ dzəə yù fóo no. Woŋ Ejiv e dzə̀me kù‑uù sì mensə́ mensə́.

²² Vé səm veé Ejivi yén bey, e kù nèn yiì sa kinyo kee shooy e dzəə ye áwune yii sénin sə́m sho. Farao nèn kfə̀n tàv a dzə̀ kitú, e làa yòʼ yu Mooser wùn Aaron, kù mo Nyùy Tàr kì suuyin ne.

²³ Farao nèn lì sa kin kee kinyo fo tèr, e bìnkìr, e kfə̀n é bàm e wun ntoʼ.

²⁴ Wír veé Ejiv adzə̀me nèn a tuŋ meshávtí me Naay, e bó a koóy mendzə́v mé a no, bìʼ fo bó yòʼ‑oò dzə̀ áwune dzəə nò mendzə́v fó ndzəv yee Naay.

Virom ve vishàm

²⁵ Vishiíy ví ku nèn shaà saàmbà, kèʼ mo Nyùy Tàr‑iì bìnèrìn ndzə́v yee Naay, yí kfə́n ji mensə́.