Ŋwàʼ Fəə 6 - ŊWÀʼ NYÙY

¹ Nyùy Tàr nèn sùúy e Mooser jii, «Lèn, à yíi yen kinyo ke m yíi yiì e Farao. Bìʼ vitaáví vém, wù yíi fəə́r ven, lóo fəə́r bèy, é wù wáa jùm jùmèn fo wun wòŋ.»

Nyùy kfən tùm Mooser

² Nyùy kfən sùúy e Mooser jii, «M dzə̀ Nyùy Tàr.

³ Mò‑oò dìn kitú kém e Abraham wùn à Aysi, à Jakov ji Nyùy woo Ŋgaà Vitaàví Vidzə̀m, yii bèy, e làa yòʼ yiì, aáwune kiíy yír yém yee Yahweh.

⁴ Mò‑oò gwàr *mensaŋ vèr áwune ji m wíy fo nsay Kanan fo vé‑eè dzə́ moo viŋgwìy ji yéev.

⁵ M dzə̀, a m yú ndzə́kír ye wír veé Israyi ndzə́kir mo á reŋ vikwàn fo wír veé Ejivi. M nen kuùmé mensaŋ me mò‑oò gwàrìn vèr áwune.

⁶ Suúy ri e wír veé Israyi ji m dzə̀ á Nyùy Tàr. M yíi səʼə́r kibeʼèy ké wìr veé Ejiv fo věn kitu, e fəə́r ven fó vikwàn. M yíi nàn kóy, e màʼ ŋgeʼlàʼ ye tavín e wír veé Ejiví kitu, e nen tin ven fó ŋgeʼ.

⁷ M yíi lì ven ji wír vém, a m yíi a dzə Nyùy won, é vèn nèn kìíy ji m dzə̀ á Nyùy Tàr woo Nyùy won, wo wù fəərin ven fó mvə̀m vikwàn veé Ejiv.

⁸ M wíy dànèr ven, e dù sho e nsay ye mò‑oò kàʼàn Abraham wùn à Aysi, à Jakov sho, e kfə̀n lìʼ. M wíy fo e vèn ji sì á nsay yen. Suuy mo woo Nyùy Tàr.»

⁹ Mooser tiísí vinyo vìn e wír veé Israyi, la áwune yòʼ yuùrí kinyo ke wù‑uù suuyì, bìʼ fo melív mev mè‑eè seèmèn ne, bìʼ ŋgeʼ ye tavín ye áwune‑eè dzəə̀n shó.

¹⁰ Nyùy Tàr nèn sùúy e Mooser jii,

¹¹ «Dù, e yòŋ e Farao woo fon woó Ejiv ji wù maʼti á wír veé Isray, aá fəə́ á fo wun wòŋ.»

¹² Yii bèy, Mooser suúy e Nyùy Tàr jii, «Shuu wómé yoʼ càʼ e kisuŋnìn. Mo bó wír veé Israyi yòʼ fə̀m yú mo, bo dzə̀ Farao yiì ghàn kfə́ é le, e bóo yu mo?»

¹³ Nyùy Tàr nèn yòŋ Mooser wùn Aaron lèn, e tìír kinyo aáwuné wùn ji á du, e yèn á wír veé Isray, e kfə̀n yèn á Farao woo fon woó Ejiv, e fə̀ə́r wír veé Isray fo fo.

Kfə́ə Mooser wùn Aaron

¹⁴ Atǎr kfəə wìr veé Isray ámóʼó wùn à kfə́ə sév sí vìne. Ruben woo wan Isray mbìy‑iì kér wón vee vilum, aá dzə̀ jii, Hanok wùn à Pallu, à Hesron, à Karmi. Á mo kfə́ə Rubene‑eè ràmèn.

¹⁵ Wón Simeon vee vilume wáa dzə ji Jemuel wùn à Jamin, à Ohad, à Jakin, à Tsohar, e lì Shaul wo yè wov dzəə̀n wan wìr woó Kanan. Á mo kfə́ə Simeone‑eè ràmèn.

¹⁶ Levi‑iì dzə̀ʼə̀m kiyá nshòv saàmbà e mtaár e wiì (137). Yír sé wón Levi vee vilum, à sé won vév sí sìne. Levi‑iì kér wón, aá dzə̀ ji Gershon wùn à Kohat, à Merari.

¹⁷ Wón Gershon vee vilume wáa dzə Libni wùn Shimeyi, à rám sév sí.

¹⁸ Wón Kohat vee vilume wáa dzə ji Amram wùn à Ishar, à Hebron, à Ussiel. Kohat‑iì dzə̀ʼə̀m kiyá nshòv sitaár e mtaár e wiì (133).

¹⁹ Wón Merari vee vilume‑eè dzə̀ Maali wùn Mushi. Á mo kfə́ə Levìi‑iì ràmèn é lav sí lav si.

²⁰ Amram‑eè kòóy wiíy a dzə̀ jemèr tàr wov yee Jokebed, wùn wun dzəə́ Aaron wùn Mooser. Amram‑eè dzə̀ʼə̀m kiyá nshòv saàmbà e mtaár e wiì (137).

²¹ Wón Ishar vee vilume‑eè dzə̀ Kora wùn à Nefeg, à Sikri.

²² Wón Ussiel vee vilume wáa dzə Mishael wùn à Elsafan, à Sitri.

²³ Aaron‑eè kòóy Elisheba ji wiíy, a dzə̀ wan Amminadav, a kfə̀n dzə̀ jemèr Naashon. Wùn wun dzəə́ Nadav wùn à Abihu, à Eleasar, à Itamar.

²⁴ Wón Kora vee vilume‑eè dzə̀ Assir wùn à Elkana, à Abiyasav. Á mo kfə́ə Koràa‑aà ràmèn.

²⁵ Eleasar woo wan Aaron‑eè kòóy wiíy a dzə̀ fo wón Putielí mvəm. Wùn wun dzəə́ Finehas. Á mo atǎr kfəə vee Levi ramé dzəə̀n é lav sí lav si.

²⁶ Aaron wùn Mooser vìne‑eè dzə̀ ve Nyùy Tàr‑iì suuyin aáwune jii, «Vèn fəə́r wír veé Israyi fó Ejiv, aá lo é ŋgoo sí ŋgoo si mo kfə́ə sév sí dzə̀kìn.»

²⁷ Nén a dzə Mooser wùn Aaron vìn ve vé‑eè suuyin e Farao woo fon woó Ejiv ji wù maʼti, aáwune li á wír veé Isray, e fəə̀ shó a fo Ejiv.

Nyùy túm Mooser wùn Aaron

²⁸ Waá dzə e kishiíy ke Nyùy Tàr‑iì súŋnin e Mooser e Ejiv,

²⁹ wù wáa suúy e wun jii, «Dzə̀ mo Nyùy Tàr. Yòŋ kinyo kidzə̀m ke m suuyin e wò ki e Farao woo fon woó Ejiv.»

³⁰ Yii bèy, Mooser bìnèr e Nyùy Tàr jii, «À kì ji bó shuu wómé yoʼ càʼ e kisuŋnìn, bo Farao yíi ghan e le, e bóo yuurí kinyo kém?»