Ŋwàʼ Fəə 21 - ŊWÀʼ NYÙY

Nsər see kùm akwàn ve dzəə̀n wír Hibru

¹ Nyùy Tàr nèn sùúy e Mooser jii, «Nsər si síne se dzə̀ à kù wày ji wír veé Israyi wáa tinén nsaʼ si shó.

² «Wìr lóo yun kwàn woo lumène wo dzəə̀n wir Hibru, wù wàa kiíy jii, wú wíy lìm fo wun kiyá ntuùfú, lóo dzə e kiya kee saàmbà, bo wù kù kér fó màʼtì kwàn woo shooy, é wú wáa dù, a bó wú yòʼ kfə̀n laʼ kifá.

³ A wú‑uù wiy, a wú dzə̀ koy, bo wú kù yíi kfən e bàm wùn mòʼón. Yii bèy, a wú‑uù kér wiíy, bo wú yíi a kfən wùn wiíy.

⁴ A tàr wov lìm nə̀ə́ wiíy, e fò shó, wùn wun dzəə́ wón vee vilum, kìn vee vikìy, bo wiíy wùn à wóné goʼ wùn à tàr wov lìm, é kwàné wáa dù e sí rə́ kituu.

⁵ Yii bèy, a kwàné sùúy ji wun koŋ a tàr wov lìm, kfə̀n koŋ wíiy və wùn à wóné, a bó wun yòʼ koŋ e lò,

⁶ bo tàr wov lìm kér fóo lì wun, e dù sho e kirə̀ʼ ké cù, e tiír e nshìy, kìn é mboòmè shùu lav, e tòʼ kituʼùr kfə́ e kinto ki. Á bèy, bo sì kwàn və́ bey, e dù, e mày.

⁷ «Wìr fiine wán və woo wiíy ji kwàn, bo wú yòʼ wíy màʼtì tàr wov lìm moo kwàn woo lumène bey.

⁸ A wìr yùn ji wíiy və, e lò yèn, a bó wú yoʼ ghèén wun, wù màʼtì, aá tín fo wun. Bó wù yòʼ dzəə́ kér vitaáví vée fiìnè e wìr woó ndzə, bìʼ fo wù shoʼorin ne ŋkàʼmé wo wùn wun‑eè kérí.

⁹ Wìr yún kwàn, e fò e wan və woo lumèn ji wiíy, bo ŋgaàŋ kér fó fo wun ghay moo wó wan və woo wiíy bèy.

¹⁰ A wìr sí kér kwàn ji wíiy və, e lò nə̀ə́ wiíy, bo bó yòʼ dzə̀ wù fàr kifá fo wiíy woo kwàn. Wù kù kér fó a fo wun vifá ve yi wùn à ndzə̀y sí, e kfə̀n a shiíy sho.

¹¹ A wù dzə̀ là fó a yiì vinyo vee vitaár vìn, bo dzə̀ wiíy woo kwàn màʼtì wun, é la ŋgaàŋ yòʼ dzə̀r kifá sho.

Kitáŋnìn wùn à kinjuyrìwìr ki

¹² «Wìr dzəv wír, wù kpú, á yùyrí ŋgaàŋ.

¹³ Wáa dzə, a bó wù yoʼ yùyrí e kúmé, a kì yiì ne mo woo Nyùy ji kí koóy bey, bo dzə̀ wù lèʼ, e dù e kirə̀ʼ ke m yíi dìn e vèn.

¹⁴ Yii bèy, a wìr shwèʼtí dzə́ə, e yùyrí wùmòʼ e kúmé, vèn yùyrí, wìr li ka, a wù léʼ, e dù beè *kíy cù wóm.

¹⁵ «Wìr dzəv tàr wov, kìn yè wov, á yùyrí.

¹⁶ «Wìr shóŋ wír, á koó, a wù dzə̀ə́ wùn ŋgaàŋ, kìn a wù fiíné ne, á yùyrí ŋgaàŋ.

¹⁷ «Wìr kuu tàr wov, kìn yè wov, á yùyrí wun.

¹⁸ «A wíri lò a taŋnín, wùmòʼ fun shúu wùmòʼ e tíyí, kìn e kiwó ki, la wù yòʼ kpù, wù wáa neŋ neŋén,

¹⁹ e yiì lò nànèn, a ghan e mbàŋ, bo wìr wo wù kì dzə̀vìn wun və̀y bòy ne. Yii bèy, bo wù kù kér fó làʼ wír wo wù kì lemen və̀y, bìʼ ghán sə́ se sí kì làyìn, e kfə̀n a leéy fo wun ji wù maysi, e bònén a kijuŋ.

²⁰ «A wìr dzə̀v kwàn və́ woo lumène, kìn woo wiíyi e mbàŋ, wú kpú é kisəəné, bo á fó wun ŋgeʼlàʼ.

²¹ Kí koóy ji lá kwàné yòʼ kpù é bǎm kishiíy, kìn dzə̀ é bǎm vishiíy vibaà, bo bó á yòʼ dzəə́ fó wun ŋgeʼlàʼ, bìʼ fo kwàn vəə́ dzəə̀n mbàm sə́.

²² «A wíri lòo fùnèn, e tsə̀y wiíy woo bvə́me, á táŋ wiíy woo shooy táŋén, la kileémé kímóʼ kí yòʼ kfə̀n a dzə, bo wìr wo wù kì tsəyin wun kér fó làʼ mo lum wiíy yòŋèn, atǎr nsaʼa biímé.

²³ Yii bèy, a kileémé kímóʼ kí kfə̀n dzə̀sì wún, bo á kù siir ŋkfə́tír réŋréŋ. Wáa dzə ji wìr kpú, bo á yúyri ŋgaà jay.

²⁴ Wáa dzə sí, bo ŋkfə́tír dzə̀ sí, wáa dzə sóŋ, bo dzə̀ sóŋ, wáa dzə kiwó, bo dzə̀ kiwó, wáa dzə kiwuú, bo dzə̀ kiwuú.

²⁵ Wìr ton wír, á tòn wun, wìr lémér wír, á lèmér wun, wìr sor kirə́ʼ ké wìr, á sòr kfə́.

²⁶ «A wìr dzə̀v sí kwàn və́ woo lumène, kìn woo wiíyi, e bìvír, bo wù kér fó màʼtì, é wú wáa dù bìʼ sí rə́.

²⁷ A wù tsə̀y sóŋ kwàn və́ woo lumène, kìn woo wiíyi, yí shóʼóm, bo wù kù kér fó màʼtì, é wú wáa dù bìʼ sóŋ rə́.

²⁸ «A nàʼ sə̀r lumèn, kìn wiíy, e yùyrí, bo á tsə́mri nàʼ woo shooy e tíyí, é wù kpú, é la á yòʼ kfə̀r nyam nàʼ woo shooy. Yii bèy, é la ŋgaà nàʼ yòʼ làʼ.

²⁹ A lòo dzə, a nàʼ woo shooy‑iì sí sərnìnè, aá kù suuy e ŋgaà nàʼ, la wù yòʼ wày é kày, wù yúyrí lumèn, kìn wiíy, bo á kér fó tsəmrí nàʼ woo shooy e tíyí, e yuyrí, e yuyrí sa ŋgaà nàʼ.

³⁰ Yii bèy, aá dzə̀r ji wù laʼ á mbàm, e tìn á dzəʼə̀m rə́, wù koŋ, wù làʼ mbàm se á dzərin e wun, e fíʼ tin dzəʼə̀m rə́.

³¹ Nàʼ woo shooy sər wan wìr woo lumèn, kìn woo wiíy, bo nsər yee shoon kúr sa ŋgaà nàʼ réŋréŋ.

³² Wù sər kwǎn wìr woo lumène, kìn woo wiíyi, bo ŋgaà nàʼ kér fó làʼ ŋgaà kwàn kisha ke mbàm ke fəvír kí *ashekel mtaár, aá tsə́mrí nàʼ woo shooy e tíyí, é wù kpú.

³³ «A wìr mvə̀ʼ bií, e lèm e rə́, kìn wù tùŋ bií e làa yòʼ sətí, kí koóy ji nàʼ, kìn kimbèʼbìy kí gbu shó,

³⁴ bo ŋgaà biì kér fóo lày kilày. Wù laʼ ŋgaà nyàm, e nèn yòv kimkpú ke nyàm.

³⁵ «A nàʼ wìr sòv nàʼ wìr wùmòʼ, wù kpú, bo á lo, e fiìnè wo tin, e jàv mbàm, e kfə̀n jàv sa wo kpuún.

³⁶ Yii bèy, a vé‑eè kìíy ne ji nàʼ woo shooy waà sərnìnè, la ŋgaà nàʼ yòʼ wày é kày, bo ŋgaà nàʼ kù laʼ nàʼ wo wù kpuun e nàʼ, e nèn yòv kimkpú.