Ŋwàʼ Fəə 20 - ŊWÀʼ NYÙY

Nsər se Nyùy see ghvə̀m

¹ Nyùy Tàr nèn a suŋnín jí sìn, a suúy jii,

² «M dzə̀ Nyùy Tàr woo Nyùy won, wo wù‑uù fəərin ven fó Ejiv fo vèn‑eè reŋ vikwàn.

³ «Lá vèn yòʼ a ker anyùy ámóʼó, e shaà mo.

⁴ «Lá vèn yòʼ fèr shibvə̀m ji á wáa ghvəm, a fə̀m dzə̀ é njà kifa keé yuv, kìn keé nsay, kìn keé ndzəv yeé loònsay.

⁵ Lá vèn yòʼ a ghvəm, lá vèn yòʼ a cù mebvə̀m mee shooy, bìʼ fo mo woo Nyùy Tàr woo Nyùy won dzəə̀n Nyùy wo wù kíyri ven é ŋàŋ. M yii maʼ ŋgeʼ e wóné wùn à wón woné, à wón wón woné, bìʼ ban ye atàr véví ban mo.

⁶ Yii bèy, a m din koŋ yém e wóné, e ŋgwàʼ sí ŋgwàʼ si, e dù, e meé nsə̀kì, bìʼ koŋ ye atàr véví koŋ mo, lem nsər sém.

⁷ «Lá vèn yòʼ yòŋ yír Nyùy Tàr woo Nyùy won kisáŋ, bìʼ fo mo woo Nyùy Tàr wayin ji wír wo wù yoŋ yír yém kisáŋ kù li njò.

⁸ «Vèn kuúmé kishiíy kém ké bam ki, e lèm ji kishiíy kee jeéy kí.

⁹ Vishiíy vee ntuùfú ví dzə̀ ve vèn wáa lìm lim yén,

¹⁰ a ke kí meen ji saàmbà ki dzə̀ kishiíy ké bam ke Nyùy Tàr woo Nyùy won. Lóo dzə e kishiíy fen, lá wìr yòʼ yiì lim. Kìn dzə̀ ŋgaà lav, kìn wán və woo lumèn, kìn woo wiíy, kìn kwàn və́ woo lumène, kìn woo wiíyi, kìn nyám rə, kìn kiŋgwìy ke kí dzəə̀n e wun laʼ, lá á yòʼ lìm lim, a fə̀m dzə̀ rəné,

¹¹ bìʼ fo mo woo Nyùy Tàr‑iì bomen yúv wùn à nsay, à rìbà ndzə̀v, à vifá vidzə̀m ve ví dzəə̀n é virə̀ʼ fen vi vishiíy ntuùfú, e nèn meèmè e kishiíy kee saàmbà. Á kinyo ke kí‑iì yiìn, é bo m səəvi kishiíy ké bam ji kishiíy kém kee jeéy kí.

¹² «Ghvə́m tàr won wùn yè won, áà fiʼ wìy dzə̀ʼə̀m ntàmda e nsay ye Nyùy Tàr woo Nyùy won sí fó e vèn.

¹³ «Lá wìr yòʼ yùyrí wír.

¹⁴ «Lá wìr yòʼ lì wiiy wìr, kìn ji wiíy wáa ghan viŋkar.

¹⁵ «Lá wìr yòʼ a shoŋ vishóŋ.

¹⁶ «Lá wìr tìím vinjen ve kisaŋ vi, e tòy wír e kinyò.

¹⁷ «Lá wìr yòʼ siìmé kifá ke dzəə̀n ké wìr wùmòʼ. Lá wù yòʼ siìmé wiiy ŋgaàŋ, kìn kwàn və́ woo lumène, kìn woo wiíyi, kìn nàʼ və, kìn kimbèʼbìy kfə́, kìn ka ke dzəə̀n ké ŋgaàŋ.»

¹⁸ Nyùy wáa suŋnín bèy, wìr dzə̀m kú a yen mo kishèv ki bavkìrì, a yu mo kí báykirì, e kfə̀n a yu mo á tóŋ sóŋ, a yen kindzə́ʼ, a kí dzəm fo gwan, áwune wáa fàn, a yàʼ, a tiy kwaʼda.

¹⁹ Á nèn sùúy e Mooser jii, «Kù yíi a suŋnín wò e vèr, é vèr wáa yuurí. Lá à yòʼ màʼtì, é wáa suŋnín Nyùy e vèr, fo kpúu li ver.»

²⁰ Mooser nèn sùúy e wíri jii, «Lá vèn yòʼ a fàn. Nyùy wìy ji vèn kiíy mo wù koó, é fan Nyùyi fíʼ a dzə e věn meliv, é la vèn yòʼ dzəə yiì jày kinyo e wun.»

²¹ Wíri ku gòʼ kév, a tiy kwaʼda, Mooser wáa koʼtí e mentsə̀m me kirə̀ʼ ke kí‑iì sə́n ji cùm, fo Nyùy‑iì dzəə̀n.

Mebvə̀m wùn à kíy se cù si

²² Nyùy Tàr nèn sùúy e Mooser jii, «Suúy e wír veé Israyi jii, ‹Vèn yèn ne e sí yéné ji súŋnin a mo e vèn fó yuv.

²³ Lá vèn yòʼ fèr mebvə̀m ji vèn fíʼ a cù mo á yii cu mo, kìn dzə̀ me á fèrìn e kisha ke mbàm ke fəvír kí, kìn ke baar kí.

²⁴ « ‹Vèn bóm *kíy cù wómé e nsay si. Dzə̀ fó, fo vèn wíy a cù mo e nyám sén see anjiì si, kìn bvə́y si, kìn anàʼ. Lóo dzə cu ye tonèné, á tòn fó, lóo dzə yé kikòŋnìn, á seè fó. Kirə́ʼ kidzə̀m ke m yíi dìn ji vèn cu mo shó, m yíi wìy, e səə̀vì ven, é vèn wáa yu vijuŋ.

²⁵ A vèn lò, a bom kíy cù wóm a dzə̀ e tíyí, lá vèn yòʼ a bom e tíy ye á naŋsin nee, bìʼ fo a vèn kùm tíy e kifá ke lìm ki, bo vèn bìvír ne fo yí wáa dzə e mǒ kirə̀ʼ.

²⁶ Lá vèn yòʼ bòm kíy cù wóm, e kfə̀n bòm dzə́ə ye seʼtìn ji yì kóʼ fó, fo taà cù yiì lòo koʼ, é kinshóʼ kfə́ kí wáa yensín.› »