Ŋwàʼ Fəə 2 - ŊWÀʼ NYÙY

Á dzəə́ Mooser

¹ Yì‑iì dzə̀ é ghan fen, wìr kfəə Levi wùmòʼ dù, e kòóy wiíy kù fó lav yìmòʼ yeé kfəə foo fèy.

² Wiíy woo shooy bóŋ bvəm, e dzə̀ə́ wán lumèn. Wù yén, a wàn bóŋ, wù nèn lìtì ŋwee e taár.

³ Wù lòo yen, a kí gháʼ ne fo wù wáa lìtì wán, wù koóy ŋkaà ye á fèrìn e vikwiíy ve á yoŋ ji papirur vi, e teè e nə̀ne wùn à kiláy kí, e wày wán shó, e tìír e mvə̀m vikwìíy é ghaa meshavtí me ndzə̀v.

⁴ Jèmèr wàn wáa tiy kwaʼda, a leéy ji sà yíi koóy ka wán á.

⁵ Wan Farao woo wiíy nèn sə̀y é ndzəv ji wun su a wún, a wón və́ lìme ghán e ghaa ndzəv. Wù lòo nàn sí, e yèn ŋkaà e mvə̀m vikwìíy, e sùúy e wan və lìm wùmòʼ ji wù li, e wìy a sho.

⁶ Wù mvə̀ʼ ŋkaà, e yèn wán shó, a wù tóŋé. Wù wáa ker mendzən fo fo, a suúy jii, «Və̀n fèn dzə̀ wan wìr *Hibru wùmòʼ.»

⁷ Jèmèr wàn kóʼtí, e dzə̀r e wàn Farao jii, «A dzə̀ m dù, e tàʼ wir Hibru woo wiíy, wo wù wáa nyoór wán və̀n, e fòo wò a?»

⁸ Wù biímé ji wù du á rì, e tàʼ. Jèmèr wàn nèn dù, e jàŋ yìy à wàn, wù wìy.

⁹ Wàn Farao suúy shó jii, «Kò wán və̀n, a nyoór, e fò e mò, é m wìy làʼ wò.» Á bèy, wiíy və̀y nèn sə̀ wán, e lìy.

¹⁰ Wàn kúy, wù lì, e dù, e fò e wan Farao və̀y, wù nèn lì ji wán və, e shù yír ji Mooser, shu bèy, suuy jii, «Mò‑oò fə̀ə́r wun fo ndzəv.»

Mooser léʼ, e dù e Midian

¹¹ Mooser kúy, wáa dzə e kishiíy kímóʼ kí, wù dù fo wír vəə́ wùn, e lèéy mo áwune túŋ akwiiròn. Wù yén, a wìr woó Ejiv dzəv wir *Hibru wùmòʼ, a dzə̀ wir à Mooser feyì,

¹² wù leéy mbìy, e lèéy bám, e làa yòʼ yen wír, e nèn yùyrí wir Ejiv və̀y, e lìtì e mvə̀m siy.

¹³ Ndzə bvəə́shí, e ràn, wù fəə́, e yèn wír veé Hibru abaà, aá funènè, wù dzə́r e wo wù‑uù kér jay jii, «À dzəv fər wò bìʼ ka?»

¹⁴ Wù bìnèr jii, «Lèm la wò ji à wáa dzə kitú kér, e kfə̀n a tinén nsaʼ sér? À taʼ e yuyrí mo mo wò‑oo yuyrin wír woó Ejiv à?» Mooser nèn a fàn, a rə̀m jii, «Ábáy, á kìíy ne kinyo ke mò‑oo yiìn.»

^15-16 Kinyo kìy ki tó e Farao kitùʼùr, wù nèn a jwimér Mooser ji wun yúyrí. Mooser léʼ, e dù, a dzə e wòŋ Midian. Taà cù wùmòʼ wáa dzə fo, a wù kér wón vee vikìy saàmbà. Lòo dzə e kishiíy kímóʼ kí, Mooser dzə̀ʼə̀m e ghaa ndzəv ye tuŋén yímóʼó, wón víyi nèn lò, e wìy, a tu mendzə́v, a way e nyám sí vikoŋ ji nyám se tàr wov sí wàá nó.

¹⁷ Anshìy bvəy ámóʼó nèn wìy, a jùm áwune fó fo. Mooser ŋáʼáy, e dù, e sə̀ áwune, e nòór nyám sév.

¹⁸ Wón vee vikìy víyi kfə́n é bàm, tàr wov Ruel dzə́r jii, «Vèn ghàn é le, e bóo tav kfən e bàm lán bèn?»

¹⁹ Áwune bìnèr jii, «Wìr woó Ejiv kì sə̀ ver fo anshìyí wo, e kfə̀n tù mendzə́v, e nòór nyám sér shó.»

²⁰ Wù nèn dzə̀r e wón vəə́ jii, «Wù bèé? Vèn màʼtì wun fo ji ka? Vèn jaŋ, é wù wiy, e yìkír.»

²¹ Mooser wìy, e nèn yiì lò, a koŋ fó a dzə wùn wìr woo shooy. Wù nèn fò wán və woo Tsippora ji wíiy və.

²² Tsippora koóy wán lumèn, Mooser shù yír ji Gershom, a wù shu bèy, suuy jii, «M sì kiŋgwìy e kitum ke sən kí.»

Nyùy yú tóŋ wìr veé Isray

²³ Ghán sí dàrnìn, fòn woó Ejiv nèn lày, a wír veé Israyi kù dzəə́ shwíkir shwìkín é vikwàn ve vé‑eè reŋè. Áwune wáa toŋ ji Nyùy ku fə̀ə́r a áwune fó vikwàn.

²⁴ Nyùy yú ndzə́kír ye vé‑eè ndzə́kir e mvə̀m vikwàn, e kuùmé *mensaŋ me wù‑uù gwàrìn wùn à Abraham, à Aysi, à Jakov,

²⁵ mendzən me wìr veé Isray mè wáa rər wun.