Ŋwàʼ Fəə 18 - ŊWÀʼ NYÙY

Jetro dú, e ghàn Mooser

¹ Jetro wo yì‑iì dzəə̀n taà cù woó Midian, a kfə̀n dzə̀ sá tàr à wiiy Mooser yú vinyo vidzə̀m ve Nyùy yiìn e Mooser, e kfə̀n yiì sa e wír və́ veé Israyi mo wù‑uù fəərin áwune fó Ejiv.

² A Jetro‑oò dzə̀ wùn Tsippora woo wiiy Mooser mo Mooser‑iì tsənsin wùn à wóné fo Jetro wùn.

³ Wóné‑eè dzə̀ abaà vilum vilum, a yír wo mòʼóne dzə̀ Gershom. A Mooser‑iì shu bèy, suuy jii, «M dzə̀ kiŋgwìy e nsay ye bó yòʼ dzəə̀n yéer.»

⁴ Wù kfə̀n‑eè shù yír wùmòʼ ji Elieser, shu bèy, suuy jii, «Nyùy Tàr wor sə̀ ne mo, m bóy, la fòn woó Ejiv yòʼ yùyrí mo.»

⁵ Jetro woo tàr à wiiy Mooser nèn lò, e lì wón Mooser vee abaà vin, wùn à ye wov, a dù sho e woʼ fo Mooser‑iì shiiyì e Gwan Nyùy.

⁶ Wù‑uù du, a wù tsə́nsí ne ntum e Mooser jii, «Mo woo Jetro woo sə́ wò wiy vèr à wiiy wò, à wón vé vee abàá.»

⁷ Á meé, Mooser fəə́, wùn sə və tárnín, wù tsə́m ndzəə́, e làʼ kitú fo nsay e si wo, e lò, e baàmé wun. Wùn wun shàʼnìn, e nèn nə̀ə́ e Mooser kibàn.

⁸ Mooser nèn fèr e tàr à wiiy və kinyo kidzə̀m ke Nyùy Tàr yiìn e Farao wùn à wír veé Ejivi bìʼ wír veé Isray. Wù kfən fèr sho mo wíri‑iì yén ŋgeʼ e dzəə, e naàrì mo Nyùy Tàr‑iì səən áwune fó ŋgeʼ foo fèy.

⁹ Jetro yú vinyo ve juŋ vi vidzə̀m ve Nyùy Tàr‑iì yiìn e wír veé Israyi, e fə̀ə́r áwune fo wír veé Ejiví wo, wúné bòŋ wun,

¹⁰ wù wáa suúy jii, «Búríi wáa dzə fo Nyùy Tàr. Wù‑uù fə̀ə́r ven fo fòn wùn à wír veé Ejiví wo, wír vəə́ bóy fó vikwàn ve vé‑eè reŋ e wír veé Ejiví wo.

¹¹ M kìíy ne lèn ji Nyùy Tàr kùʼ e shaà anyùy ve wíri cu adzə̀m, bìʼ fo wù yiìn ne, wír vəə́ bóy fo wír veé Ejiví wo ve vé‑eè ŋaʼ, táy áwune.»

¹² Jetro woo sə Mooser nèn tòn nyám si, a cù Nyùy Tàr shó. Aaron wùn à vilìmbìy ve wìr veé Isray vi wìy, wùn áwune wáa yi kibán e kirə̀ʼ ké cù.

Mooser lèm wír ve á kwaŋrì nsaʼ si

¹³ Ndzə bvəə́shí, e ràn, Mooser dzə̀ʼə̀m, a tinén nsaʼ se wíri, á wáa tiy, a leéy wun, e kèʼ fo kijàvndzə, e dù, e meé e ŋkuùr.

¹⁴ Jetro yén kinyo kidzə̀m ke Mooser‑iì yii e wíri, e nèn a dzər sho jii, «Ke à lim fo wíri ben ki dzə̀ ka? À yii kee shoon vèn mòʼón bìʼ ka, a wíri tíy e wò si, e kèʼ fo kijàvndzə, e dù, e meé e ŋkuùr?»

¹⁵ Mooser bìnèr e sə və jii, «M yii bèn, bìʼ fo wíri lo, á wìy, e yèn mo ji á yú á kinyo ke Nyùy taʼ ji á wáa yiì.

¹⁶ Áwune lóo ker ntàŋntàŋ, á nèn wìy, e neèr e mǒ si. M nəə aáwuné kinyò, tínenè, m nèn naàrì áwune nsər se Nyùy wùn à ntir sə́ sí.»

¹⁷ Jetro suúy e Mooser jii, «Kinyo ke à yii kìn ki yòʼ dzə̀ tìítiy.

¹⁸ À kù yíi a màyìr vitaáví vé máyirin, é wíri kfə́n a dor sa. Lim rə̀ne kùʼ feyì fo à wáa yiì vèn mòʼón.

¹⁹ Yuúrí, é m fó wò ntir ye juŋ, é Nyùy yiì a dzə vèn wun. À kù yíi a dzə ké ji wír wo wù li kilíŋ ke wíri e Nyùy si, é wáa lì wò nsaʼ sév, a bi Nyùy sho,

²⁰ é kfə́n a yeʼéy wò áwune nsər se Nyùy, a naàrì ntir sə́, aá fiʼ kìíy mo dzə̀ á wàa ghan, e kfə̀n a kiíy kinyo ke dzə̀ á wàa yiì.

²¹ Kiiyì, áà nèn nə̀ə́ e wìr dzə̀m mvəm, e shòʼtí wír vee jwáʼ ve á fan Nyùy, suuy suuyrú, kfə̀n ban yíkísáŋ, e lèm, aá wáa dzə vilìmbìy ve wíri. À shóʼti, áà javti é viliŋ viliŋ, é kilìmbìy kimòʼón kimòʼón fo kiliŋ kímóʼ kí wáa saʼ wír nsə̀kì nsə̀kì, é veé kiliŋ kímóʼ kí wáa saʼ wír wií wií, é vee kímóʼ kí wáa saʼ wír mtàn mtàn, é vee kímóʼ kí wáa saʼ wír e ghvə̀m ghvə̀m.

²² Lèm áwune, aá wáa tinén nsaʼ se wíri ghán sidzə̀m. Áwune li nsaʼ se tavkín sí, aá wiy, e yèn wò sho, lóo dzə see fó tèr, aáwune wáa saʼ. Á bèy, aáwune nèn fàr kibeʼèy ké, é líme caár fo wò wùn.

²³ Aà yii mo Nyùy suuyì, mo m naàrìn ben, áà nèn yù fó a yiì lim rə̀n, é wír vìne nèn a dùkìr aáwuné melav ji nyaáŋ, bìʼ fo nsaʼ sév sí siìn sitínmén.»

²⁴ Mooser yú jí se sə və Jetro, e yiì kinyo kidzə̀m mo wù‑uù shu,

²⁵ e nèn shòʼtí vilum vee jwáʼ fo wír veé Israyí mvəm, e lèm ji vitú ve saʼ ve wíri. Vímóʼ ví wáa saʼ wíri nsə̀kì nsə̀kì, vímóʼ ví wií wií, vímóʼ ví mtàn mtàn, e lì ve ví‑iì sáʼ wír e ghvə̀m ghvə̀m.

²⁶ Áwune ku nèn a saʼ nsaʼ se wíri ghán sidzə̀m. Á li nsaʼ se tavkín sí, á dù, e yèn Mooser sho. Lóo dzə see fó tèr, áwune wàa saʼ áwune áwune.

²⁷ Mooser yiì lò, e tsəə̀né sə́ və Jetro, wù kfə́n é bàm e wun wòŋ.