Ŋwàʼ Fəə 16 - ŊWÀʼ NYÙY

Vifá ve yi ve Nyùy‑iì foon é woʼ

¹ Wír veé Isray adzə̀me yiì lò, e ŋàʼáy fo Elim, a dù e woʼ yee Sin, ye yí dzəə̀n é ntìntìn Elim wùn Sinay, e mèé fo e kishiíy kee nshòv sitàn e ghvə̀m fo ŋwee wo wú‑uù meen ne ji baà, kèʼ mo vé‑eè loòn fó Ejiv.

² Wíri nèn lò, a bashí Mooser wùn Aaron,

³ a suúy aáwune jii, «Yì‑iì bòŋ ke Nyùy Tàr yúyrí ver é Ejiv fo vèr‑iì dzə́, yí kibán e nyàm, a bvəm yérí kúrí, e shaà ke vèn li ver, e wìy sho fèn, e màʼtì ji màŋgòŋ və̀n e dzə̀m kpú jíŋ.»

⁴ Á bèy, Nyùy Tàr nèn sùúy e Mooser jii, «Lèn, m yíi a səʼə́r viyíkìr vén wír adzə̀m fo yuv. Wír veé Israyi kù yíi a fəə kishiíy kidzə̀m, a baʼtí ve a dzə̀ á yì é kishiíy fó. E dzəə fen, é m nèn mùm áwune, e yèn ó ji á sà yíi a jùmrì nsər sém moo ŋgáŋ á?

⁵ Lóo dzə e kishiíy kee ntuùfú, aá báʼtí vifá ve yi, é ví wáa dzə moo veé vishiíy vímóʼ ví virə́ʼ vibaà, e nèn fèr.»

⁶ Mooser wùn Aaron nèn sùúy e wìr dzə̀m woó Isray jii, «Yíi lòo dzə e ŋkuùr lán, é vèn nèn kìíy ji dzə̀ á Nyùy Tàr wo wù‑uù fəərin ven fó Ejiv.

⁷ Bvəə́shi lòo dzə kijàvndzə, é vèn yén mo vikuʼùy vé Nyùy Tàr ví dzəə̀n. Nyùy Tàr yù ne ghvəʼ ye vèn ghvəʼ wun. Bó vèn yòʼ ghvəʼ a dzə̀ ver. Vèr dzə̀ kér ala?»

⁸ Mooser wáa dzə̀sì, a suúy jii, «Nyùy Tàr yù ne mo vèn ghvəvrì wun. Wù yíi fo ven nyám e ŋkuùr, e kfə̀n fo kibán kijàvndzə, é vèn yí, é ví gháʼ. Vèn ghvəvrì a dzə̀ wun, vèn yòʼ ghvəvrì ver. Vèr yòʼ siì dzə̀ kér ji ala?»

⁹ Mooser nèn sùúy e Aaron ji wù yoŋ á e wìr dzə̀m woó Isray ji áwune kóʼtí á fo mentsə̀m, e tìím e Nyùy Tǎr si. Wù yù á ne ghvəvrì ye áwune ghvəvrì.

¹⁰ Aaron dù, e lòo suŋnín e wìr dzə̀m woó Isray bèy, á nèn bìnkìr, a leéy wóʼ, e lò yèn, a rán Nyùy Tàrí fəə́sín é mvə̀m mbàʼ.

¹¹ Nyùy Tàr suúy e Mooser jii,

¹² «M dzə̀ a m yú ghvəvrì ye wír veé Israyi ghvəvrì mo. Suúy aáwune jii, yíi lòo dzə e meraaràŋ, aá wáa ker a nyám yé a yi. Lóo dzə kijàvndzə, aá wáa ker a kibán mo áwune koŋè. Á bèy, aáwune nèn kìíy a ji mo woo Nyùy Tàr, dzə̀ á mo wo dzəə̀n Nyùy wov.»

¹³ Wáa dzə e ŋkuùr, menə́n mee búmér mè nèn wìy, e gbù fo wír veé Israyi‑iì dzə́, e sə̀tí virə́ʼ. Kfə́n a dzə kijàvndzə, ŋweʼe gbù fó e dzə̀m.

¹⁴ Ŋweʼe yuúmé, kifá kímóʼ kí wáa neŋ e woʼ kilàsir, a kí shwínin sèke kiban.

¹⁵ Wír veé Israyi yén, e làa yòʼ kiíy, e nèn a dzə̀rnìn jii, «Kin ki dzə̀ ka?» Mooser nèn sùúy aáwune jii, «Dzə̀ kibán ke Nyùy Tàr foon ji vèn wáa yi.

¹⁶ Nyùy Tàr suuy a ji wìr dzə̀m wáa baʼtí a mo dzə̀ wù yì. Wìr kú a lì a e kighín kighin fo wìr mòʼón mòʼón mo wíri dzəə̀n e wun lav.»

¹⁷ Wír veé Israyi ku nèn yiì bèy. Wír ámóʼó báʼtí kikuʼùn, ámóʼó báʼtí shishàr.

¹⁸ Á lòo fìʼ e kighín kighin, la ké wìr wo wù kì baʼtin kikuʼùn kí yòʼ kùʼ e shaàsìn, la ké wìr wo wù kì baʼtin shishàr ki yòʼ dòrnín. Wìr‑iì báʼti mo wù baʼtin, ví kù ghèén mo a dzə̀ wír vee wun lavi yì.

¹⁹ Mooser nèn sùúy aáwune jii, «Wìr wáa yen fóo màʼtì, é kímóʼ kí meé kibvəə́shí.»

²⁰ Yii bèy, la wír ámóʼó yòʼ yù Mooser, e nèn lèm kibér ji kee kibvəə́shí. Dzə́r si nèn nə̀ə́ sho, kí wáa rə̀m, Mooser wáa shwiíy kilòŋ wùn áwune.

²¹ Á ku nèn a baʼtí vifá ve yi kijàvndzə kidzə̀m, a wìr báʼti, kù mo wíri dzəə̀n e wun lav. Shùy lumè, kibér ki nèn yaàné fo nsay.

²² Lòo dzə e kishiíy kee ntuùfú, á báʼtí vifá ve yi vilíŋ vibaà, a dzə̀ ji vighín vibaà vibaà fo wìr mòʼón. Vilìmbìy vév ví nèn dù, e bì kinyo kìn e Mooser.

²³ Wù nèn sùúy aáwune jii, «Nyùy Tàr yoŋ a ji kibvəə́shí kí dzə̀ á kishiíy ké meèmè. Dzə̀ kishiíy ké bam ke Nyùy Tàr, a dzə̀ á kishiíy kee jeéy kí. Vèn wàá náŋsín á vifá ve yi ve vèn baʼtin lán, e tòn ve tonèn ví, e nàá ve naán ví. Vèn lóo yi, á bèr á vee kibvəə́shí.»

²⁴ Áwune ku nèn yiì mo Mooser kì suuyin, e lèm kee kibvəə́shí, kí bvəə́shi e làa yòʼ rə̀m, la dzə́r si yòʼ nə̀ə́ sho.

²⁵ Mooser suúy jii, «Vèn yí kee shoon ki lán, bìʼ fo lán dzəə̀n kishiíy ké bam ke Nyùy Tàr. Bó vèn yòʼ yíi yen kímóʼ kí, a kí gbú lán.

²⁶ Dzə̀ mo vèn kù wíy a baʼtí e vishiíy vee ntuùfú. Lóo dzə kee saàmbà, bo dzə̀ kishiíy ké bam, a bó yòʼ dzə̀ vèn yèn kímóʼ kí é kishiíy fóo fèy.»

²⁷ Wù suúy bey, wír ámóʼó ku fəə̀ é kishiíy kee saàmbà kìn ji á du, e bàʼtí. Á dù, e làa yòʼ yen, fə̀m à shishàr sho.

²⁸ Nyùy Tàr nèn sùúy e Mooser jii, «Vèn wíy ten fó a lèm nsər sém wùn à ntir sém sí, e wìy dù, e meé e le?

²⁹ Vèn wáa kuumé ji fò á mo woo Nyùy Tàr ven kishiíy ké bam. Á kinyo ke kí yiìn, é bo m wáa fo ven viyíkìr veé vishiíy vee vibaà é kishiíy kee ntuùfú. Vèn goʼ é melav e kishiíy kee saàmbà, é la wìr yòʼ fəə̀ kishwáŋ.»

³⁰ Á bèy, wíri ku nèn a meèmè e kishiíy ke dzəə̀n kee saàmbà.

³¹ Fo ké vifa ve yi ve vé‑eè báʼti vìy, wír veé Israyi yòŋ yír ji manna. Ví‑iì fə́r moo ŋgoòy kifa ye fəvír bey, kfə̀n nyom moo kifá ke á tovin e meŋkfəŋ mè wùn à vilu vi, e bóo tòn.

³² Mooser suúy jii, Nyùy Tàr yoŋ a ji á lem á kímóʼ kí é kighin, é ŋgwàʼ yen wìy sìíy, a yen e dzə̀m. Dzə̀ á kibán ke wun‑eè yiir a atàr vév shó e woʼ, e ghan se wun‑eè fəərin áwune á fo wòŋ Ejiv.

³³ Wù yòŋ bèy, e sùúy e Aaron jii, «Lì mbìʼí, e fìʼ kighín ké manna ki, e wày shó, e tìír e Nyùy Tǎr si, é kí wáa dzə fo, bìʼ ŋgwàʼ ye yì wíy siíy, a wìy.»

³⁴ Aaron ku nèn yiì mo Nyùy Tàr kì yòŋèn e Mooser bèy, e lì kibán kìy, e tìír e mbìy ŋkùv mensàŋ ji kí wáa dzə fo kilemèn.

³⁵ Wír veé Israyi‑iì yì vifá ve yi ve á yoŋ ji manna vìy kiyá mkweè, e dù mèé mo vé‑eè nəən fo vé‑eè dzə̀ʼə̀mèn. Vé‑eè ghàn, e dù mèé e bìíy yeé Kanan fo vé‑eè dzə̀ʼə̀mèn, aá kù yí a dzə̀ manna.

³⁶ Vighín ve vé‑eè fiʼ manna və̀n sho vi dzə̀, a dzə̀ ví nə̀ə́ e ghvə̀m e kigátí.