Ŋwàʼ Fəə 14 - ŊWÀʼ NYÙY

Á túm Rìbà Ndzə̀v wo Baar

¹ Á wáa dzə e Etam bèy, Nyùy Tàr lò, e sùúy e Mooser jii,

² «Suúy, é wír veé Israyi kfə́n é bàm, e beè e mbìy Pi‑Hahirot e kintìntìn ke Migdol wùn à Rìbà Ndzə̀v wo Baar. Áwune yíi beè e ghaa ndzəv jwáʼjwáʼ e ŋkìʼnìn Baal‑Sefon.

³ Á yii bèy, é Farao yiì a kwàʼ ji wír veé Israyi sí ghán, jiŋ a jìŋèn é kwaʼ, aá lày a ne e woʼ.

⁴ M yíi yiì, é Farao kfən tàv kitú, e shèm e věn bàm ji wun koó ven. A m yíi so wun wùn à vé rər vəə́, é búrí ye kuʼùné yiì a dzə yém, é wír veé Ejivi nèn kìíy ji m dzə̀ ben, a m dzə̀ á Nyùy Tàr.» Wír veé Israyi ku nèn yùnín Nyùy Tàr, e kfə̀n é bàm, e tùy táv sév fo wù‑uù suuyin.

⁵ Mo wír veé Israyi loòn, á nèn bùn fon woó Ejiv ji wír vìyi lèʼ á ne. Wùn aàtǎr ntoʼ vəə́ nèn kfə̀n kùvsín kwaʼtì ye vé‑eè kér bìʼ wír veé Isray, e yòŋ jii, «Vèsən mùm kee ben a dzə̀ ka? Vèsən ghàn é le, e bóo màʼtì wír veé Isray, aá léʼ, é vèsən búŋ akwàn?»

⁶ Fòn nèn bàʼtí kiténtén kfə́ ké rər wùn à və́ vé rərí.

⁷ Wù kfən tàr *viténtén vé rər vee jeéy ví ghií ntuùfú, e bóo lì sa veé Ejiv vidzə̀m wùn aàmfòómé véví.

⁸ Nyùy Tàr ku kfə̀n yiì, Farao woó Ejiv kú a tav kitú, e shèm fó bàm, a jùm wír veé Isray ve vé‑eè loòn, a dù, a wàrkìr moo wír ve á soon rə́r.

⁹ Vé rə́r Farao adzə̀me ku nèn a jùm áwune. Ve á dzə́ e vitentén ve səŋ nyám si, ve á kóʼ nyám si koʼón, à ve á ghán e kiwuú kií kú a jùm, e dù, e kòóy wír veé Isray e ghaa *rìbà ndzə̀v fo vé‑eè tamen táv sév é Pi‑Hahirot e mbìy Baal‑Sefon.

¹⁰ Wír veé Israyi lòo màʼ sí, e yèn a Farao wùn à wír vəə́ sí méʼ áwune, kindzə́m kí gwàr áwune, á wáa toŋ, a kàn Nyùy Tàr.

¹¹ Áwune dzə́r e Mooser jii, «Dzə̀ ji yì‑iì bùŋ say si fó Ejiv, bo à li ver ji vèr wiy, e kpùkír e woʼ fen à? Yì‑iì yiì ka, é bo à fəə́r ver fó Ejiv?

¹² Kí dzə̀ kinyo ke vèr‑iì suuy e wò, aá dzə̀ə́ e Ejiv ji à maʼti ver fó, é vèr wáa rèŋ vikwàn fo wír veé Ejivi. Bo vèr‑iì lim fo áwune ji akwàn, e shaà fó wìy, e kpukír e woʼ.»

¹³ Mooser bìnèr e wíri jii, «Lá vèn yòʼ a fàn. Vèn kúr tímé, é vèn yiì yèn mo Nyùy Tàr yíi lùŋèr ven é kishiíy ké lán ki. Wír veé Ejiv ve vèn yén lán vìn, vèn yòʼ dzəə́ wìy yen e kishiíy kímóʼ kí gheéy.

¹⁴ Nyùy Tàr yíi màʼ rə́r sén, kù dzə̀ cáʼcáʼ ji vèn tiím á ji nyaáŋ.»

¹⁵ Nyùy Tàr nèn sùúy e Mooser jii, «À tóŋ, kan mo ji ka? Suúy, é wír veé Israyi wáa dù fo mbìy.

¹⁶ Nàn kiwó ké ki, e ràmsì mbàŋ e kitu ke rìbà ndzə̀v, é wù javsin, é wír veé Israyi fiʼ nə̀ə́, e tòsín e nsay ye yumér.

¹⁷ Fo kém kí, m yíi yiì, é wír veé Ejivi táv kitú, e shèm aáwuné bàm. M yíi tòn Farao wùn à mànjòŋ və e dzə̀m, woó vitentén wùn à woó nyàm se ŋkoʼ, e nèn a ker viwìr.

¹⁸ M yíi tòn Farao wùn à viténtén və́ ví, à vé nyàm se ŋkoʼo, é wír veé Ejivi nèn kìíy ji m dzə̀ á Nyùy Tàr.»

¹⁹ E ghan sin, nshìylav Nyùy ye yì‑iì ghán e wír veé Israyí mbìy nèn kfə̀n áwune fó bàm, mbàʼ yeé njà kitom rə̀y nèn lò sa fo mbìy, e kfə̀n, e tìím aáwuné bàm,

²⁰ e nèn a ghan e wír veé Ejiv wùn à veé Israyí kintìntìn. Mbàʼ‑aà yiì, wír veé Ejivi wáa dzə e ndzə ye sənér, a veé Israyi kér rán, la wír veé Ejivi yòʼ yù fó meʼ veé Isray vitsə́ʼ vifur.

²¹ Mooser nèn ràmsì mbàŋ rə é kitu ke rìbà ndzə̀v, Nyùy Tàr yiì, shwér wo tavíné wìy fo mbìv ye shùy yii tó fo fo, a shaà vitsə́ʼ vifur. Shwér woo shooyi yiì, ndzə́ví jàvsìn, e kfə̀n é bàm. Rìbà ndzə̀v yúm, fóo kfə́n ji nsay ye yumér.

²² Wír veé Israyi nèn nə̀ə́ e rìbà ndzə̀v, a shaà e mvəm wó a dzə̀ é nsay ye yumér, a ndzə́ví sə́r wún fó kùy wùn à fó tsən moo virə́v vé lav bèy.

²³ Wír veé Ejivi shém fó bàm, a jùm áwune é mvə̀m rìbà ndzə̀v wùn à nyám se ŋkoʼ se Farao si, à viténtén və́ ví.

²⁴ Ndzə yiì lòo kaʼ, Nyùy Tàr màʼ sí fo mvə̀m kitom ke dzəə̀n mbàʼ wùn à və́yí, e lèéy màŋgòŋ woó Ejiv, e nèn yiì, áwune wáa fàn, a tùʼtìn.

²⁵ Wù kfən nə̀ʼə́y kár se vitentén, la ví yòʼ dzə́ə a dù kijuŋ. Áwune suúy jii, «Vèsən lo fo wír veé Isray vìné bàm, bìʼ fo Nyùy Tàr sí funèn vindzəʼ vév, aáwune só vèsən.»

²⁶ Nyùy Tàr nèn sùúy e Mooser jii, «Ràmsì kiwó ké ki é kitu ke rìbà ndzə̀v, é ndzə́ví fiʼ kfə̀n é bàm, e sùm wír veé Ejiv wùn à viténtén vév ví, à vé nyàm se ŋkoʼ véví.»

²⁷ Mooser ku nèn ràmsì kiwó kfə́ é kitu ke rìbà ndzə̀v, ndzə́ví kfə́n é bàm, a ndzə sí javì. Wír veé Ejivi nèn a leʼ, yii bèy, Nyùy Tàr yiì, yí leér áwune.

²⁸ Ndzə́ví‑iì kfə̀n é bàm bey, e sùm shúu rə́r Farao e dzə̀m wo wú‑uù jùmrìn wír veé Isray, e nə̀ə́ e rìbà ndzə̀v wùn à viténtén ví, à vé nyàm se ŋkoʼo. Wìr fo áwune yòʼ‑oò lo fəə̀, fə̀m e mòʼón.

²⁹ Yii bèy, a wír veé Israyi kù kì tòsín kév a dzə̀ é nsay ye yumér, a ndzə́ví tíy moo virə́v vé lav fo mbìv kùy wùn à fó mbìv tsə̀n.

³⁰ Nyùy Tàr nèn bòyìr wír veé Isray fo veé Ejiví wo e kishiíy fóo fèy, wír veé Israyi wáa yen mo dzə́n sé wìr veé Ejiv si néŋnin e meshavtí.

³¹ Mo wír veé Israyi‑iì yenen kiŋgaʼnìn ke kinyò ke Nyùy Tàr yiìn, e laàr wír veé Ejiv bèy, á nèn a fàn Nyùy Tàr, e wày shilív e wun wùn, e kfə̀n wày sá e Mooser woo ŋgaà lìm və́ wùn.