Ŋwàʼ Fəə 12 - ŊWÀʼ NYÙY

Nyùy naárí Mooser wùn Aaron vinyo ve Ŋkǎʼ Yáʼayshaà

¹ Nyùy Tàr kfən lò sùúy e Mooser wùn Aaron, aá dzə̀ə́ e Ejiv jii,

² «Kèʼ fo lèn, ŋwee və̀ne dzə̀ wo wú wíy a kèʼ kiyá e liì Isray.

³ Fó sáʼ rə̀ne e wìr dzə̀m woó Isray jii, lóo dzə e kishiíy kee ghvə̀m fo ŋwee fèn, wìr mòʼón mòʼón tày wan bvəy mo lav rə dzəə̀n.

⁴ Lav dór e ŋàŋ ye bó yòʼ dzə̀ yì kfə̀r wan bvəy e fur, wìr yèn ŋgaà və shuù lav, é wùn wun jav wan bvəy wo wù gheenen mo wíri dzəə̀n, aá jav mo dzə̀ wìr mòʼón mòʼón yì.

⁵ Wàn bvəy və̀n kú a dzə woo lumèn, a dzə là ndzə́m. Vèn tar fo věn mvə̀m njiì, kìn fó mvə̀m bvəy se loŋ,

⁶ e lèm, a leéy fo fo, a shìy kishiíy kee nshòv sikweè e ghvə̀m fo ŋwee fèn. Á kishiíy ke wír veé Isray adzə̀me kù wíy see wón bvəy e meraaràŋ.

⁷ Á seé bèy, á lì mensə́ memoʼ mè, e yòʼ é mboòmè se shuù se lav see fó yuv wùn à see fó ghaŋ si e lav ye á yíi kfər wan bvəy sho.

⁸ Wíy lóo dzə vitsə́ʼ vee shooy, á tòn nyám tónen, e nèn a yi wùn à *kibán kee là nyaà kí, à vikwiíy ve shiʼirín ví.

⁹ Lá vèn yòʼ kfə̀r kifá fo fo, a kí dzə̀ kikó, kìn kinaán. Á kú a tòn tònèn wùn à kitú ki, à vikoy vi, e kfə̀n a tòn sa vifá veé bvə̀m.

¹⁰ Lá vèn yòʼ bèr kifá, é kí meé kijàvndzə. A kifá ki bèr, ndzə lòo jàv, á tòn, é kí shwí.

¹¹ A dzəə̀ ye vèn yíi a yi sho dzə̀ jii, vèn yíi a yi cércér, aá báʼtí ne, e kùr vikuúví, e wày alábáʼ, a ker mbàŋ sén é wo. Kin ki dzə̀ cu *Ŋkǎʼ Yáʼayshaà ye á ghvə́m Nyùy Tàr shó.

¹² «M wíy shaà e Ejiv vitsə́ʼ vee shooy, e yuyrí wón wíri, e yuyrí vé nyàm si adzə̀m ve dzəə̀n dzə́ə mbìyi, a kfə̀n dzə̀ vilum, e kfə̀n siì màʼ ŋgeʼ se tavkín sí aànyùy veé Ejiví kitu. Dzə̀ mo Nyùy Tàr.

¹³ Fo kén kí, mensə́ me vèn yoʼon é shuù se lav mè yíi a dzə kisəəm ke kí din lav se vèn dzəə̀n shó. M yíi yén, é m nèn yàʼáy, e shaà, e làa yòʼ dzə́ə màʼ ŋgeʼ e věn kitu e ghan se m yíi a màʼ ŋgeʼ ye tavín e wír veé Ejiví kitu.

¹⁴ Kishiíy kin ki dzə̀ ke vèn kù wíy a kuumé, a lèm ji ŋkǎʼ Nyùy Tàr, é wáa dzə nsər ye á wíy a lèm e ŋgwàʼ sí ŋgwàʼ si, e dù, e mày.

Naarì yee kùm Ŋkǎʼ Kiban kee là Nyaà

¹⁵ «Vèn kù kér fó yi kibán kee là nyaà kishiíy saàmbà. Lóo dzə e kishiíy ké mbìy ki fó vishiíy fóo fèy, vèn fə̀ə́r nyaà fo věn melav. A wìr lòo dzə, e yì kifá ke nyaà dzəə̀n shó e mvə̀m vishìíy vee saàmbà vìy, bo á kù fəər ŋgaàŋ fo wír veé Israyí mvəm.

¹⁶ Lóo dzə e kishiíy ké mbìy ki wùn à kee saàmbà ki, vèn nèn bàʼtí kirə́ʼ kimòʼón, e yiì bunrì. Lá wìr yòʼ lìm kifá e vishiíy fóo fèy, é ku jòʼsì vifá ve yi ve a dzə̀ á fèr ji wìr dzə̀m yí.

¹⁷ Á mo vèn wíy a lèm kiŋkàʼ ké kiban kee là nyaà kin, bìʼ fo dzəə̀n kishiíy kin ke mò‑oò fəərin ven fó wòŋ Ejiv e ŋgoo sí ŋgoo si. Vèn kù wíy a lèm kishiíy kin, a sì nsər e ŋgwàʼ sí ŋgwàʼ si, e wìy dù, e mày.

¹⁸ A dzə̀ jii, kèʼ fo ŋkuùr kishìíy kee nshòv sikweè e ghvə̀m, e dù, e meé e ŋkuùr kishìíy kee nshòv mòʼón e mbaà fó ŋwee mbìyi, vèn wíy a yi a dzə̀ kibán kee là nyaà.

¹⁹ Fo vishiíy vee saàmbà vìn, lá á yòʼ wìy yèn nyaà e věn melav. A wìr wìy yì kibán ke nyaà kí, bo á fəər wun fo wír veé Israyí mvəm, kìn ŋgaàŋ dzə̀ wan nsay kìn dzə̀ kiŋgwìy.

²⁰ Lá vèn yòʼ wìy yì kifá e nyaà shó. Vèn kù wíy a yi a dzə̀ kibán kee là nyaà e věn lav si sidzə̀m.»

Mooser naárí vinyo ve kiŋkàʼ ke Yáʼayshaà e kfə́m seé Isray si

²¹ Mooser lò, e kùm vilìmbìy ve wìr veé Isray, e sùúy aáwune jii, «Vèn du, e tàr wón njìi mo lav sén sí dzə̀kìn, aá nèn seè, e fíʼ yi Ŋkǎʼ Yáʼayshaà sho.

²² Vèn li kiŋkur ke *hisov ki, e sə̀ʼ mensə́ sho fo kighin, e yòʼ mboòmè se shuù se lav si shó fo yuv wùn à fó ghaŋ si, é la wìr fo vèn, fə̀m e mòʼón yòʼ fəə̀ shúu lav, e meé mo ndzə yíi jàv.

²³ Nyùy Tàr yíi lòo shaà, lóo yuyrí wón veé Ejiv vee vilum, yén mensə́ e mboòmè si, é wù nèn yàʼáy shúu lav woo shooy, e làa yòʼ dzə́ə biimé é ŋgaà laàr nəə́, e yùyrí wón vén.

²⁴ «Vèn à rám yéné kù wíy a lèm ntò se kinyò kìn ji nsər, e wìy dù, e mày.

²⁵ Vèn wíy du, mee e wòŋ wo Nyùy Tàr wíy fo e vèn mo wù‑uù kàʼàn, vèn kù a yiì vinyo vìn.

²⁶ Wón véné wíy lóo dzər ji nsàv kinyò kìn sà dzə̀ kaá,

²⁷ vèn bìnèr ji cu ye vèn seé nyám, cu Nyùy Tàr shó rə̀ne dzə̀ á Ŋkǎʼ Yáʼayshaà, aá yii bèy a, bìʼ fo wù‑uù yaʼayin lav sén, aá dzə̀ é Ejiv e ghan se wù‑uù laar wón wìr vee fó, e bàvtí a ven.» Mooser màysì sùŋnín, wír veé Israyi nèn gvə̀ʼə́r vitú vév, e ghvə̀m Nyùy Tàr,

²⁸ e nèn dù, e yiì réŋréŋ mo Nyùy Tàr‑iì suuyin e Mooser wùn Aaron.

Kpú won vee vilum vee dzə́ə mbìyi

²⁹ Yiì lòo dzə e tím vitsəʼə́, Nyùy Tàr laàr wón vee vilum vee dzə́ə mbìyi veé Ejiv, e kèʼ fo wo Farao wo wù dzə́ e kàvàʼ, e dù, e meé e wo wìr sháŋ wo wù néŋ e ŋòròʼ, e lì sa wón nyàm vee dzə́ə mbìyi adzə̀m.

³⁰ Wìr dzə̀m woó Ejiv túm é yuv, à Farao, à vé saʼ vəə́ shó. Tóŋ ye tavíné wáa dzə woŋ Ejiv e dzə̀m, bìʼ fo kpúu yòʼ‑oò lo nyàʼ lav yìmòʼ.

³¹ Fòn nèn tòóy Mooser wùn Aaron vitsə́ʼ vee shooy, e sùúy aáwune jii, «Vèn à wír vén veé Israyi fəə́ fo wír vémé mvəm. Vèn du, e cù Nyùy Tàr mo vèn‑eè suuyì.

³² Vèn li bvə́y sén wùn à nyám sén sí, a dù sho mo vèn‑eè suuyì. Vèn lón ji Nyùy Tàr ku səə̀vì saa mo.»

³³ Wír veé Ejivi nèn kù a gìtì, a fəə́r wír veé Isray fo wòŋ, fəər bèy, suuy jii, «Aáwune dzə̀ là fó lò fo wòŋàn, bo vèr sì aŋkfə.»

³⁴ Wír veé Israyi nèn lì meŋkfəŋ e vighin me vé‑eè tovin, a bó á yóʼ ne wày nyaà shó, e boò é njav, e lì e mbèʼ.

³⁵ A vé‑eè yiì ne kinyo ke Mooser‑iì yòŋèn, e dzə̀r ndzə̀y e wír veé Ejivi wùn à vifá ve á fèrìn e kisha ke mbàm ke baar kí, kìn e ke fəvír kí.

³⁶ Nyùy Tàr yiì, wír veé Ejivi ghvə́m wír veé Isray, e fò áwune kifá ke vé‑eè dzərin. Á mo wír veé Israyi‑iì kuuyin bùʼ wìr veé Ejiv bèy.

Wír veé Israyi ló fó Ejiv

³⁷ Wír veé Israyi‑iì lò fó Rameses, e ghàn, e dù, e mèé e Sukkot, a vilum ve tavkíné‑eè dzə̀ moo nsə̀kì ghií ntuùfú (600,000) bey, e bóo lì vikìy wùn à wóné.

³⁸ Vintaà kfəə vímóʼ ví‑iì lò aáwuné bàm vinín, bóo lì sa ŋgoo se bvəy wùn à sé nyàm si.

³⁹ Áwune‑eè ghán bèy, ton ntuʼ se kiban kee là nyaà e meŋkfəŋ me vé‑eè tovin, e lò sho fo Ejiv mè, a vé‑eè tòv là nyaà, bìʼ fo vé‑eè sí jum áwune júmen, la á yòʼ a ker ghán sée dzə̀ʼə̀m, e fèr viyíkìr vév.

⁴⁰ Wír veé Israyi‑iì dzə̀ʼə̀m é Ejiv kiyá kishóv mtaár e ghiì kweè (430).

⁴¹ E kishiíy ke viyá vee kishóv mtaár e ghiì kweè vìn vi‑iì màyìn, màŋgòŋ Nyùy Tàr e dzə̀m nèn lò fo Ejiv e ŋgoo sí ŋgoo si.

⁴² Mo Nyùy Tàr‑iì shìyìn wír veé Isray vitsə́ʼə́, e bóo fəə́r áwune fó Ejiv e kishiíy fóo fèy, kí nén a dzə jii, wír veé Isray adzə̀me kù sí wìy a dzə e yuv, a kìʼ vitsə́ʼ vee shooy, e fíʼ ghvəm Nyùy Tàr mo ŋgwàʼ sév sí wíy a dzə.

Nsər Ŋkǎʼ Yáʼayshaà

⁴³ Nyùy Tàr suúy e Mooser wùn Aaron jii, «Nsər se Ŋkǎʼ Yáʼayshaà si síne: «Lá kiŋgwìy ki yòʼ wìy yì ŋkàʼ vən.

⁴⁴ Yii bèy, a dzə̀ kwàn e dzə̀m wo vèn yunen, e kfə̀n sàŋ mbèʼ sə́, wú yì.

⁴⁵ «Lá beèshaà, kìn wir lìm wo á laʼ làʼàn yòʼ yì.

⁴⁶ «Á kù wíy a yi e mvə̀m lav, é la wìr yòʼ mùm, e lì kintín, e fəə̀ shó e ndzə. Lá wìr yòʼ bèʼ sá kighvə́r.

⁴⁷ Wìr dzə̀m woó Isray kù wíy a lèm ŋkàʼ vən.

⁴⁸ «Kiŋgwìy ki wáa dzə e věn mvəm, a kòŋ ji wun wáa lèm ŋkàʼ vən, e fíʼ a ghvəm Nyùy Tàr, á kù tòmbìy sàŋ mbèʼ se lùmèn e dzə̀m woó lav foo fèy, é wù nèn a ker ghay wó a lèm. Á bèy, bo wù sí yiì a dzə wan nsay. Lá wìr mùm, e yì ŋkàʼ vən, a bó á sáŋ mbèʼ sə́.

⁴⁹ Nsər kù dzə̀ e mòʼón, aá sayrì wir dzə̀m sho, kìn dzə̀ wan nsay, kìn dzə̀ kiŋgwìy ke kí dzə́ vèn áwune.»

⁵⁰ Á bèy, wìr dzə̀m woó Isray‑iì lo yiì vinyo vidzə̀m ve Nyùy Tàr‑iì suuyin e Mooser wùn Aaron.

⁵¹ Nyùy Tàr nèn kù fə̀ə́r áwune é kishiíy fóo fèy fo nsay Ejiv e ŋgoo sí e ŋgoo si.