Ŋwàʼ Fəə 10 - ŊWÀʼ NYÙY

Virom ve ŋguùmé

¹ Ké mentiy ki lòo shaà, Nyùy Tàr kfən sùúy e Mooser jii, «Kfən dù, e yèn Farao. Kù yiì mo ji Farao wùn à vé sáʼ vəə́ wáa tav a kitú. A m yiì bèy, ji m fiʼ yiì a viŋgaʼnìn vém vé vinyò aáwuné mvəm,

² é vèn fiʼ wìy a fèr e wón véné, a fèr e wón woné mo mò‑oò tuʼùr wír veé Ejiv, yii viŋgaʼnìn vém vé vinyò aáwuné mvəm, é vèn nèn kìíy ji m dzə̀ á Nyùy Tàr.»

³ Mooser wùn Aaron nèn dù, e sùúy e Farao jii, «Nyùy Tàr wo dzəə̀n Nyùy wìr vee Hibru suuy jii, ‹À wíy tav kitú fó a yunín mo e dù, e meé e le? Màʼtì, é wír vémé du, e fíʼ cù mo.

⁴ Yén ri mbà, aà tèn fó màʼtì áwune, bo m tsə́nsi ŋguùmé e wò wòŋ kibvəə́shí,

⁵ a sí wíy sə virə́ʼ vidzə̀m, é la kirə́ʼ kí yòʼ a yensín, é sí maysi, e kfə̀r vifá vidzə̀m ve mentíy mè yòʼ‑oò lo bìvír, a fə̀m dzə̀ vicí vén ve ví kfə̀n tókirì.

⁶ Sí wíy run e wò ntoʼ, e kfə̀n run e vé saʼ vée lav si, e run lav se wìr veé Ejiv sidzə̀m. Kfə́ə see shooy see ŋguùmé sí dzə̀, a bó atàr vén wùn aàtǎr ram sén sí yòʼ‑oò lo ghàn sìíy yèn, e kèʼ mo vé‑eè dzəən áwune, e wìy, e to lán.› » Mooser màysì, e nèn fəə̀ fo Farao ntoʼ.

⁷ Vé saʼ Faraòo nèn sùúy e wun jii, «Á sà màʼtì ji jwè və̀n wíy kàr woŋ və̀n bèn, e dù, e meé e le á? Bòŋ ji Fòn maʼti, é vilum veé Israyi du, e fíʼ cù Nyùy Tàr woo Nyùy wov. Fòn yóʼ ne sà yèn ji Ejiv sàʼkìr ne a?»

⁸ Farao nèn tòóy Mooser wùn Aaron, e yòŋ aáwune jii, «Vèn du ri, e cù Nyùy Tàr woo Nyùy won. Yii bèy, lo e dù ala fo věn mvəm?»

⁹ Mooser bìnèr jii, «Lo dù vèr à kiŋgoòy kér kí, à ŋgày sé wìr si, à wón vee vilume, à vee vikìyí. Vèr kù li sa nyám sér wùn à bvə́y si, bìʼ fo vèr kér ŋkàʼ wóo cù Nyùy Tàr shó.»

¹⁰ Farao suúy aáwune jii, «Vèn ghán e tíyí é ndzə̀y. A dzə̀ ji m maʼti, é vèn à vikìy, à wón véné du, bo Nyùy Tàr tíy rú e věn kitu.

¹¹ Àáy, mo shií won kì dzəə̀n ji á du, e cù a dzə̀ Nyùy Tàr, bo du vilum.» Wù suúy bey, á nèn jùm Mooser wùn Aaron fo fòn si.

¹² Nyùy Tàr yiì lò, e sùúy e Mooser jii, «Nàn kiwó ké ki é kitu ke wòŋ woo Ejiv, é ŋguùmé si gbu, e kfə̀r vifá ve teʼèn ví vidzə̀m, ve ví‑iì gòʼòn é wòŋ foo fèy, la mentíy mè yòʼ bìvír.»

¹³ Mooser nèn nàn mbàŋ rə é kitu ke wòŋ Ejiv, Nyùy Tàr yiì, shwéri wáa wìy fo mbìv ye shùy yii tó fo fo, a shaà e wòŋ, e shaà e shùy, e shaà vitsə́ʼə́. Ndzə wáa jàv, a shwér woo shooyi wíy ne e ŋguùmé sí.

¹⁴ Ŋguùmé sí gbù, e rùn woŋ Ejiv, e sə̀ kitúm kìn kidzə̀m. Kfə́ə viròm ve ŋguùmé vee ben vi yòʼ‑oò yiì ne a dzə, a bó ví yòʼ kfə̀n dzəə́ wìy a dzə.

¹⁵ Sí‑iì sùm woŋ woo shooy e dzə̀m, virə́ʼ ví sə́n. Sí kfə́r vifá ve teʼèn ví vidzə̀m, vicí, vikwiíy, à báŋ se vici sí, vifá vidzə̀m ve ví‑iì gòʼòn, la mentíy mè yòʼ bìvír. Bó kicí, kìn kikwiíy ke shoòŋ ki yòʼ‑oò lo gòʼ e Ejiv.

¹⁶ Farao ku nèn gìtì, e tòóy Mooser wùn Aaron, e sùúy jii, «M jày ne kinyo e Nyùy Tàr woo Nyùy won, e kfə̀n jày sá e vèn.

¹⁷ M sí lón ji vèn ku kfə̀n làysìn a jay wom, e bùnrì Nyùy Tàr woo Nyùy won ji wù ku tsə̀ʼ a lòn wo biibí vən fo mǒ kitu.»

¹⁸ Mooser nèn màʼtì Farao, e dù, e bùnrì Nyùy Tàr.

¹⁹ Nyùy Tàr bìnèr kinsəm, kí wìy fo mbìv yee fo shùy yii nəə, e kùúy ŋguùmé siy, e fèér, e dù, e sə̀n é Rìbà Ndzə̀v wo Baar, la ŋgay ŋguùmé yòʼ bèr é wòŋ Ejiv.

²⁰ Yii bèy, Nyùy Tàr ku yiì, Farao kú a tav a dzə̀ kitú, e làa yòʼ màʼtì wír veé Isray ji á wáa dù.

Virom ve ndzə ye sənér

²¹ Nyùy Tàr nèn kfə̀n sùúy e Mooser jii, «Nàn kiwó ké ki é yuv, é woŋ Ejivi kfə́n vitsə́ʼə́, e sə̀n é dzəə ye dzə̀ á yùʼnín.»

²² Mooser ku nèn nàn kiwó e yuv, woŋ Ejivi sə́n, e làŋsìn, vishiíy vitaár.

²³ E mvə̀m vishìíy fóo fèy, bó yòʼ‑oò dzə̀ wìr yèn wùmòʼ, a bó yòʼ‑oò dzə̀ wìr yù fóo shoʼ kiwuú fo wù‑uù dzə́. Yii bèy, a wír veé Israyi kér rán fo áwune‑eè dzə́.

²⁴ Farao toóy Mooser, e sùúy jii, «Vèn du ri, e cù Nyùy Tàr. A dzə̀ vèn lì sá vikìy wùn à wón véné, é vèn áwune du. Yii bèy, a ŋgoo sén sé bvəy wùn à nyám si kér fó gòʼ e bàm.»

²⁵ Mooser bìnèr jii, «Fòn kù kér fó màʼtì, é vèr du vèr à nyám sér sí ji á du, e cù Nyùy Tàr woo Nyùy wor e nyám se seerín sí, à se tonèn sí.

²⁶ Vèr kù du vèr à nyám sér sí, a bó yòʼ dzə̀ yìmòʼ gòʼ é bàm. Vèr kér fó tàr sée cù Nyùy Tàr woo Nyùy wor shó a dzə̀ fó fo, a bó yòʼ dzə̀ vèr kìíy see shó, a bó á meé fó.»

²⁷ Yii bèy, Nyùy Tàr yiì, Farao kú a táv kitú, e làa yòʼ màʼtì wír veé Isray ji á du.

²⁸ Farao nèn lò sùúy e Mooser jii, «Kíŋrí fo mǒ si. Kìm kitú ké ki, la m yòʼ dzəə yèn sí yé, bìʼ fo kishiíy ke m yíi shov wò e si, bo à kpù ne.»

²⁹ Mooser bìnèr ji nyàr, «Fòn suuy a dzə̀ á ke kí dzəə̀n. Fòn yòʼ kfə̀n dzəə́ wìy yen a sí yém.»