Ŋwàʼ Fəə 1 - ŊWÀʼ NYÙY

Á nəʼsì wír veé Isray e Ejiv

¹ Wón Jakov ve wùn áwune, à kfə́ə sév sí‑iì duùn é Ejivi dzə̀ jii,

² Ruben wùn à Simeon, à Levi, à Juda,

³ à Issakar, à Sebulun, à Benjamin,

⁴ à Dan, à Navtali, à Gad, e lì Asher.

⁵ Kfə́ə Jakov e dzə̀m, e lì Joosev wo wù‑uù siìn é Ejivi‑iì dzə̀ wír msaàmbà.

⁶ Ghán sí dù, Joosev wùn aàfə́r vəə́, à ŋgwàʼ yeé ghan fóo fèy nèn kpùkír.

⁷ Yii bèy, rám yév yee wír veé Israyi wáa dzəə́, a kùʼ feyì. Áwune kùʼ, e rùn woŋ woo shooy, a beemé e ŋàáŋàŋ.

⁸ Á nèn wìy kòʼór fon wùmòʼ é wòŋ Ejiv, a bó wù yòʼ kì kinyo kùm Joosev.

⁹ Wù suúy e wír vəə́ jii, «Wír veé Israyi kùʼ ne e ŋàŋ, a beemé vèsən.

¹⁰ Vèsən shwéʼ dzə́ə yée sə̀r fo á wáa kùʼ, e dù, e meé e kiliŋ ke a rə́r sí kì gbù e vèsə́n kitu, áwune tòm aŋgàa vibàn vesən, e fùnèn vèsən, e lèʼ fó wòŋàn.»

¹¹ Mo wù suuyin bey, wùn à wír vəə́ nèn lèm vitú ve lìm ji ví wáa rəʼə́y a wír veé Isray e líme, aá wáa bom ŋkàlaʼ yee Pitom wùn à yee Rameses ji wáa dzə vitáv vé vifa ve yi ve Farao, wun woo fon woó Ejiv.

¹² Mo vé‑eè nəʼsì áwune bey, áwune kù‑uù kuʼ, sə́ fó səə́n. Wír veé Ejivi nèn lò, a fàn áwune fánen,

¹³ e nèn màysì, a nə̀ʼsì áwune, á wáa lìm lim, a sòrkìr.

¹⁴ Wír veé Ejivi‑iì yiì, dzəʼə̀me wáa tav, a ghaʼ áwune, bìʼ lim kishàʼàr wùn à yé nsay ye tsəmén, à lim seé kwaʼ si sidzə̀m. Áwune kú a lìm lim sìn sidzə̀m, a sòrkìr.

¹⁵ Fòn woó Ejiv nèn lò, e sùúy e Shifra wùn Pua, ve yì‑iì dzəə̀n amáŋkooy wìr veé *Hibru jii,

¹⁶ «Vèn lóo koóy wón wìr vee Hibru, yén wán woo lumèn, á yùyrí, yén woo wiíy, á màʼtì e tin.»

¹⁷ Yii bèy, amáŋkooy vìne wáa dzə wír ve vé‑eè fan Nyùy, á nèn a lèm wón vee vilum atin, e làa yòʼ dzə́ə a yiì mo fòn‑eè suuyin.

¹⁸ Á bèy, fòn toóy amáŋkooy vìy, e dzə̀r aáwune jii, «Vèn mùm kee ben a dzə̀ ka? Vèn yèe, e bó a màʼtì wón vee vilum atin?»

¹⁹ Áwune bìnèr e fòn jii, «Vikǐy Hibrùu yòʼ dzə̀ á moo vikìy veé Ejiv bèy. Áwune shwìr á e wan wo dzəə́n féyì. Wiíy yú wán, wù nèn dzə̀ə́ a dzəə́n, é bo máŋkooy wáa wìy.»

²⁰ Nyùy ku nèn a leéy fo amáŋkooy vìyi, wír veé Israyi kú a kùʼ, a ghaʼtí ghaʼtín.

²¹ Bìʼ fan Nyùy ye amáŋkooyi‑iì kérí, Nyùy nèn fò áwune sév see kfəə́.

²² Fòn nèn lò, e fò sáʼ e wír vəə́ adzə̀m jii, «A wìr Hibru dzə̀ə́ wán woo lumèn, vèn màʼày é ndzəv yee Naay, wù dzəə́ woo wiíy, á lèm e tin.»