Ŋgàn 31 - ŊWÀʼ NYÙY

Ntir yée tir fon sho

¹ Kisúŋnìn ke Fòn Lemuel, a dzə̀ ntir ye yè wov‑iì səən fo Nyùy shuù, e tìr wun sho:

² Dzə̀ ká, wan wòm? Dzə̀ ká wan wòm, wán wom woo mǒ vito? Dzə̀ ká wan wom ŋkàʼmé?

³ Lá à yòʼ biìmé, é vikìy reŋer wò. Lá à yòʼ shèm ŋgoo vikìy ve á laar afon.

⁴ Lemuel, bó kí yoʼ ghèén ji fòn wáa baŋrí meluʼ me noón mè, kìn ji atǎr saʼa wáa baŋrí meluʼ me tavkín mè.

⁵ Kí yoʼ ghèén gheéy ji áwune nó, e mèŋ fo á dzəə̀n, e shòʼór nsər, a shii e melùʼ, e fiìnè ghay aàghéʼnceyí.

⁶ Á maʼti meluʼ, é wáa no wír wo wù sí maʼ kfəə̀, a dar bám, e màʼtì, é wáa no wír wo wù yén ŋgeʼ.

⁷ Wù lóo no, é wù wáa làysìn akíghàʼ və́, e làa yòʼ dzə́ə a kuumé nyár ye wù yú.

⁸ Súŋnín, e bìn nsaʼ wìr ve á yòʼ kiìn kisúŋnìne, e kìŋsìn ghay alàntome.

⁹ Ku tìnén kinyo kév kí é nsànloŋ, e siìr gháy vé kitàn wùn aàghéʼnceyí aáwune.

Nsùyrì Nyùy làm wiíy liì wo juŋ

¹⁰ Kí ghàʼ féyì fóo yen wiíy wo wù kér njiìn wo juŋ. Wiíy woo bey dzə̀ féyì, a wù shaà vifá ve sùsù.

¹¹ Lum və kù yoy, tiir a dzə̀ é wùn wó, a wù yòʼ kfə̀n búŋ kifá kímóʼ kí gheéy.

¹² Wù kù yii yii a dzə̀ kinyo ke juŋ ki e lum və, kù bey, kù bey, mo wù béʼri e nsay.

¹³ Wù lo, wù wàa tsəm ndzə̀y seé ghan sé kintòn, a tsəm seé ghan se virə́ʼ ví lumè. Wù kù yii kér shií féyì ji wun wáa lìm kifá e wó rəə́.

¹⁴ Wù lo, wù fəə̀, e dù kwaʼda, e wìy e vifá ve yi vi é lav, moo màkìkoŋ wánlè wày wo wù wiy e vifá ve way ví kwaʼda.

¹⁵ Wù lo, wù lò é yuv, a dzə̀ə́ vitsə́ʼə́ vitsə́ʼə́, e fèr vifá ve yi veé lav, e kfə̀n tsə̀ə́r wón vee vikìy ve á lim e laʼ e ntàʼtìn.

¹⁶ Wiíy və̀n lo, wù lèéy kirə́ʼ, e yùn. Wù lo, wù lì kifá ke wù ndzə̀ʼnìn, e kàv, e bìnèr e súm vitiír vé *vayin.

¹⁷ Dzə̀ wiíy, a wù tàv é ŋàŋ, a bó wù yòʼ lim, yú ŋgòy.

¹⁸ Wù lo, wù kù a mùm ji kifá kfə́ ké way kí koóy séʼ, a wù taʼtìn, a sə́n ndzə.

¹⁹ Wù lo, wù wàa te və́ə woo làv, a ba ndzə̀y sə́ shó.

²⁰ Wù yii kér wó tèéter fo vé kitàne. Rúrú, wù yii sə́ aghéʼncey.

²¹ Wù yòʼ yii fan ji dzə̀ kintòn ki yiì kinyo e kfə́ə rəə́, bìʼ fo kfə́ə rəə́ maʼ ndzə̀y se sí kér kisər.

²² Wù yii fer ndzə̀y se á saŋrì e kikun, wáyri wún və́ e ndzə̀y seé kilùm se rəsìn sí.

²³ Lum və lóo dzə fo atǎr saʼa tínen vinyo veé wòŋ, á wàa ghvəm wun.

²⁴ Wiíy və̀n lo, wù wàa ba ndzə̀y, a fiìnè, a fèr viŋgwav, a fo e wónlě wayí.

²⁵ Vitaáví və́ ví kù sì ji ndzə̀y sə́, ghvə́m ye á ghvə́m wune dzə̀ viwìr və́, a wù leey kibvəə́shí kfə́, yú vijuŋ.

²⁶ Jí se sí fəə́ fo wun shuù sidzə̀m si kér vifií, a ntir sə́ sí dzə̀ se sí wiy e kikoŋnìn ki, rəər wír.

²⁷ Wù yii leey fo wun nsaàlav kijuŋ, a wù yòʼ yii taʼ yíkísáŋ.

²⁸ Wón vəə́ lo, á wàa koʼór wun, a yòŋ ji bòŋ a kfə́. Lum və lo sa, wù wàa burí wun, a yòŋrì, a suúy jii,

²⁹ «Vikìy aníne kér njiìn wo juŋ, yii bèy, aà shaà áwune adzə̀m.»

³⁰ Wiíy tó sí, vijuŋ və́ ví lèvtí wír, a ví kù lo, e ŋeemé, e lày. Yii bèy, a wiíy wo á yíi a burí dzə̀ wò wù ghvə́m Nyùy Tàr.

³¹ Á kú a koʼór yír rə́ bìʼ vinyo ve wù yii, é wìr dzə̀m woó ntèʼ wáa burí lim rə́.