Ŋgàn 30 - ŊWÀʼ NYÙY

Ntir símóʼ sí 30.1–31.31 Kisúŋnìn ke Agur

¹ Kisúŋnìn ke Agur woo wan Jake ki kìne, a dzə̀ kinyo ke kí rə́ʼəy wun. Wù‑uù sùúy e Itiyel wùn Ukal jii:

² «Rúrú, m yùŋsí feyì, e shaà wir dzə̀m. M yòʼ dzə̀ə́ wír, e bó a kiíy jeéyjeéy fó vinyò.

³ M yóʼ ne yèʼéy ye dzə̀ m wàa ker vifií, a bó m yòʼ fə̀m sí kiiy Nyùy, wun woo Ŋgaà wo Ranén.

⁴ Yì‑iì kòʼ ne la é yuv, e dù sə̀y? Yì‑iì bàʼtí ne la shwér, e kfə̀vtí e wun mvə̀m kiwo? Yì‑iì kùr ne la wuú é mbàʼ mo wìr kùr kifá e ndzə̀y? Yì‑iì tùúy ne la vitóŋtóŋ vé ndzə? Yír ŋgaàŋe dzə̀ ji la, yé wan ji la? Suúy e mò, aà fèn kì.

⁵ «Ké jì se Nyùy, sí dzə̀ là kiloʼ sidzə̀m, a Nyùy dzə̀ ŋkeè wìr ve á lir e wun sar.

⁶ Lá à yòʼ dzə̀sì kinyo e wun jì. Lá à yòʼ mùm, fo wù yiì dìn jay wò, áà kfə́n ji ŋgaà kimboʼtì.»

⁷ Éè Nyùy, vinyo vi dzə̀ vibaà ve m lón ji à yii. Lá à yòʼ tèn fóo yiì vinyo vìn e mò, é bo m wáa màʼtì nsay rə̀n.

⁸ Kí dzə̀ jii, kiír lám kisaŋe, à kimboʼtì ki fo mǒ shuù. Kímóʼ kí jii, lá à yòʼ fò mo kitan, lá à yòʼ fò sá vikuʼùy. Ku fò mo vifá ve yi a dzə̀ ve ví gheén mo gheenén.

⁹ Lá à yòʼ fò, é ví kuʼnin, fo m wáa meŋ wò, a suúy ji Nyùy Tàr dzə̀ la? Lá à yòʼ yiì, é m wáa tàn kitan, fo m kfə́n ji shóŋ, e shoór wò woo Nyùy wom.

¹⁰ Lá wìr yòʼ a toy kinyo e kwàné bàm, a bi tàr wov lìm sho. Lá wù yòʼ mùm, fo kwàné tín kàʼ və, é wù gheén.

¹¹ Ŋgwàʼ yìmòʼ dzə̀, a yì kuurì atàr vév, kfə̀n kuurì sa ayìy vév.

¹² Ŋgwàʼ rə̀n yén vitú vév ji á dzə̀ là nsem, yii bèy, aáwune dzə̀ə́ lóm lóm e Nyùy si.

¹³ Ŋgwàʼ rə̀n kù yén vitú vév é ŋàŋ. Á kóʼor wún ji bó wìr yòʼ dzə̀ moo áwune.

¹⁴ Ŋgwàʼ rə̀n kù dzə̀, a sóŋ sév sí dzə̀ ji nyùy sé rər, sóŋ kijèʼe, ashwàʼ ashwàʼ. Áwune ŋeʼrì gheéy, nəʼsì aŋgàa kitàn, laar aghéʼncey fo wírí mvəm.

Ntir se Agur

¹⁵ Bvə̀mkúʼ kér wón vee vikìy abaà, aá tóŋnin ji á fó, á fó. Vifá vi dzə̀ vitaár ve bvəm yéví yòʼ yii kúrí, a ke kí meen ji kweè ki yòʼ yii yoŋ ji bvə́me kùr ne mo.

¹⁶ Vifá vìn vi dzə̀ jii, woŋ aŋkfə, wiíy woo kár, nsay ye yì yòʼ nyóŋ mendzə́v yú, à və́y wo wú yòʼ ton vifá, dóríi.

¹⁷ Wan wo wù woʼòy tàr wov e síi, kfə̀n té lám e yè wov, dzə̀ wo viŋaʼ vi wíy fətí sí rə́, é vilùŋŋgùrúʼ ví kfə́r dzə́n rə́.

¹⁸ Vinyo vi dzə̀ vitaár ve m leeyì, a shúu má mo, a ke kí meen ji kweè ki dzə̀ ke m yòʼ kiiy jeéyjéey və.

¹⁹ Vinyo vìn vi dzə̀ jii, mo lùŋ wo wiy ghán, e bó a feŋ e yuv, mo yò ghán, e bó a son e woʼ, mo màkìkoŋ ghán, e bó a ghan e mvə̀m rìbà ndzə̀v, à mo wánlè nsùm lo, wù ghàn, e bóo gwàr kikoŋnìn wùn wiiy və vinsùm.

²⁰ Ké wiíy viŋkar ki ghàʼ sá feyì. Wù du vishóŋ, wù nèn sòr shuu, kù a suúy jii, «M yoʼ bùʼ kinyo.»

²¹ Vinyo vi dzə̀ vitaár ve ví lóo koóy, ví sə̀ʼsì kitú ke nsay, a kee kweè ki dzə̀ ke kitú ke nsay ki yòʼ koŋ e yu, à yúu shó.

²² Vinyo vìn vi dzə̀ jii, kwàn wo wú loòn, e kfə̀n ji fon, à njìʼ wo wú loòn, e yàm yámén.

²³ Wiíy wo wìr dzə̀m wáa nyàysì, é wù lo, e kòóy lúm, à wan woo wiíy wó a lìm e lav, e lò, e kfə̀n ji wiíy woó lav.

²⁴ Vifá vi dzə̀ é kitu ke nsay vikweè ve ví ŋeerin féyì, yii bèy, a ví fìír e ŋàŋ.

²⁵ Vifá vìn vi dzə̀ jii, vilií ve ví yòʼ kér vitaáví, yii bèy, a ví kù báʼti vifá vév vé yi e ghan sé ŋkav vifa, lem e vitàv.

²⁶ Akùv ve á yòʼ kér vitaáví, yii bèy, aá baʼrì láʼ sév a dzə̀ é woʼ.

²⁷ Ŋguùmé, a sí yòʼ yii kér fon, yii bèy, a sí kù kív, nəə moo mànjòŋ rər.

²⁸ Kibár kí dzə̀, a dzə̀ à koò, a ker e kiwo, yii bèy, a kí ghán, mee e fòn faáy kishiíyí.

²⁹ Vifá vi dzə̀ vitaár ve à leey mo ví gháné, à wàa yu vijuŋ, a vee vikweè vi dzə̀ ve ví lóo shoʼ ntàm yev, à wàa leéy, a kòŋ.

³⁰ Vifá vìn vi dzə̀ jii, bvərə̀ʼ wo wù tavin, e shaà nyám sidzə̀m, a bó wù yòʼ yii bin ndzə̀m e kifá ki.

³¹ Kiyuú ke kí ghán, yúʼti wún, kibév ke ŋgoo bvəy jumrì, à fòn wo wù shemen mbìy wìr və́, a yèŋkìr.

³² A dzə̀ ji wò‑oò yùŋsí, a koʼór wún, kìn wò‑oò báʼti ji à yii kinyo ke bi kí, à mèy kfə̀nkfə́n.

³³ Mo á kar vín, yí wùr ji nyèbàm, tsə́y yúy, bùbùm sàʼ, bo dzə̀ sá réŋréŋ mo á ŋáʼar dòʼshwiíy, wù fə̀ə́r kitáŋnìn.