Ŋgàn 3 - ŊWÀʼ NYÙY

Wìr lóo jùmrì vifií ve ví lo fo Nyùy, Nyùy wàa kòŋ wun, wíri wàa kòŋ sa

¹ Wan wòm, lá à yòʼ ŋwày ntir se mò‑oò tír wò sho. Á lèm ntò sém sé yeʼéy si.

² Sí yíi sə wò, áà wáa ker dzəʼə̀m ye dáa, e sə wò, áà wáa ker dzəʼə̀m ye juŋe.

³ Lá à yòʼ a yàr fó a way wíri e wò wùn, a leéy fo áwune ghán sidzə̀m. Lèm vinyo vìn vi e wò vifií, e wày e wò wùn moo vifá ve sùsù.

⁴ Aà lòo dzə, a yiì bèy, bo Nyùy yíi a kòŋ wò, é wíri wáa kòŋ sa.

⁵ Ku wày shilív shí e Nyùy wùn shidzə̀m, e làa yòʼ a yiì a dzə̀ mo kiìn wò.

⁶ À lóo yiì vinyo ve à yii vidzə̀m, à kù a tiír a dzə̀ Nyùy fo mbìy, é wù wáa naàrì wò.

⁷ Lá à yòʼ a yen kitú ké ji à fìír. Kú a ghvəm Nyùy, a bìn ndzə̀m é yiì ye bií.

⁸ Aà yii bèy, bo liì wò yíi a dzə moo kifú ke kí yíi yiì, é wún wóo wáa dzə kijuŋ, e kfə̀n a dzə kitávín.

⁹ Á sùyrì Nyùy Tàr e bùʼ wò, à vifá ve à kavin fó sum vé mbìy vi.

¹⁰ À yii bèy, é Nyùy rúnér vitáv vé e viyíkìr vi, é meluʼ mè yiì a bvəʼtí vitém vé bvəʼtín.

¹¹ Wan wòm, Nyùy Tàr lóo sə̀r wò, lá à yòʼ a ŋway ŋwayín. Wù lóo saʼ wò, lá à yòʼ a yu nyár.

¹² Nyùy Tàr yii lóo kòŋ wír, wù kù a dìn jay ŋgaàŋ réŋréŋ mo kitàr kí tiir vifií e wǎn wun, kí wàa sə̀r.

Seʼ wìr wo wù jumrì vifií ve ví lo fo Nyùy

¹³ Bòŋ ké wìr wo wù keerin ne vifií ve ví lo fo Nyùy, a wù sí kiiy jeéyjeéy fó vinyò.

¹⁴ Séʼ wo wù lo fo vifii vee ben bòŋ feyì, e shaà wo wù lo fo kishà ke mbàm ke fəvír kí, e kfə̀n shaà wo wù lo fo ke baar kí.

¹⁵ Vifií ví bòŋ, e shaà vifá ve sùsù vidzə̀m, a bó kifá ki yòʼ dzə̀ shó ke wíri yáŋri, ke dzə̀ á fìʼsìn shó.

¹⁶ Vifií ví fó dzəʼə̀m e wìr a dzə̀ ye dáa, buʼ wun e vikuʼùy ví wùn à ghvə́me.

¹⁷ Ví yii, a wìr dzə́ e vijùŋ, kiŋsìn ŋgaàŋ, a wù dzə́ ji nyaáŋ.

¹⁸ Ví dzə̀ rú kicí ke wìr yí, wù kòóy dzəʼə̀m, a bòŋ ké wìr ve á lumen, e kpù shó.

¹⁹ Nyùy Tàr‑iì bòm kitú ke nsay a dzə̀ e vifií və́ ví, e tàm yúv e kiíy rəə́.

²⁰ Wù‑uù jàvsìn ndzə́v ye yí‑iì sùmèn nsay, yímóʼó kfə́n é yuv, mbàʼ si wáa fo ŋweʼ e kitu ke nsay.

²¹ Wan wòm, á tiy e vifii ve ru ví, a kiíy jeéyjeéy fó vinyò. Á yen fo vifií vin ví fəə́ fo wò kitu.

²² Ví yíi a dàrìr dzəʼə̀m yé, e sə wò, áà wáa ker dzəʼə̀m ye juŋe.

²³ Ví yíi a kìŋsìn wò, áà wáa ghan kijuŋ, a bó à yòʼ yíi bàyrìn.

²⁴ Lóo dzə e ŋkuùr, à neemè, é la à yòʼ a fàn. À kù yíi buuné, é yim shinə́n wò.

²⁵ Aá sàsìn, a bemér wò, bo à yòʼ yíi a fàn. Wír ve á méŋ Nyùyi wáa ghiʼ wò e ŋgeʼ si, bo à yòʼ yíi a yàʼ.

²⁶ Nyùy Tàr dzə̀ kóy wó wo tavíné, wù yíi a kìŋsìn wò fo à gbu aáwuné kitam.

Vifií ve ví lo fo Nyùy vi táti wíri

²⁷ A wìr tóŋ kíghàʼ və e wò, lá à yòʼ tèn fó sə wun. Aà kér dzə́ə yée sə wun, lá à yòʼ ŋwèy.

²⁸ Lá à yòʼ yòŋ sho ji wù du, bóo wìy, à bvəə́shi, e fo a kibvəə́shí, yii bèy, aà kérí.

²⁹ Lá à yòʼ a ba menàŋ e fər wò bàm, a wù dzə́ e wò ghaŋ, yoy, tiir a dzə̀ e wò wùn.

³⁰ Lá à yòʼ a sə kóy vèn wìr fo kisáŋ ki, a bó ŋgaàŋ yoʼ tìnsín wò.

³¹ Lá à yòʼ a siimé dzəʼə̀m wìr mensə, kìn à biʼnìn yii yév ye bií.

³² Wìr liì kisaŋ yii kóʼoy fo Nyùy Tàr. Yii bèy, wìr woo tìítiy dzə̀ wo vifií və́ ví yii tíy sho.

³³ Wù yii shóv melav me wìr ve á méŋ wun, buʼ me wìr ve á yúnin wun búʼun.

³⁴ Rúrú, Nyùy Tàr méŋ wír ve á shéʼ wun, yén a dzə̀ vitú vév. Wù leey wír ve á néŋ e wun si, shám áwune.

³⁵ Á kù wíy a ghvəm wír wo wù kér vifií ve ví loòn fo Nyùy, a bó kiyúŋ kí yòʼ wíy a ker kifá, e shaà nshoórmé.