Ŋgàn 29 - ŊWÀʼ NYÙY

Jí se ntir wùn à sé yeʼéy si

¹ Wìr wo á tír wun, a wù ŋwáy ntir, kù yíi sàsìn, e gbù, a bó dzəə̀ lùŋ yòʼ kfə̀n dzə̀.

² Wír ve á yú Nyùyi kóʼ e ntaʼ, wíri wàa sàvnìn. Wír ve á méŋ Nyùyi lóo saʼ, wíri wàa shwemkír.

³ Wàn lóo kòŋ a ker vifií, wù shèʼér kitàr, a wo wù shemen ŋgoo wùn aàsàkìi laar kfə́ kéŋ tàr wov láarin.

⁴ Fòn lóo yiì vinyo e nsànloŋ, kitúm ki wàa tiy kitávín, a wo wù sə́ kòyàr kù bívir kfə́ bívírín.

⁵ A wìr leerì ŋgaà və shweèsí e shúu, bo wù kù tám a dzə̀ lálán wo wù yíi ndzəv wun.

⁶ Ajay ve wìr wo bi jáyíi kù sì kitám kfə́, a wìr wo wù yú Nyùy kù yíi a yòv, a yu vijuŋ.

⁷ Wìr wo wù yú Nyùy yii leey fo vé kitàne, a wìr wo wù méŋ Nyùy yòʼ yii gwarìr kee shooy.

Nyaáŋ woo bìʼ yú ye wìr yú Nyùy

⁸ Aŋgàa jàʼa lo, á wàa màʼ melaà e mvə̀mlaʼ, aàfií kù rəər kév dòʼshwiíy rə́ərin.

⁹ A fiì lò, a bìʼ mbìʼ wùn à kiyúŋ kí, bo kiyúŋ kí kù yíi a shwiíy a dzə̀ kilòŋ, a sheʼ wun shéʼén, a bó kinyo kee réŋ kí yòʼ yíi fəə.

¹⁰ Anjuyrìwìri yòʼ yii koŋ wír woo là nsem, yii bèy, a wír ve á yú Nyùyi kù kiŋsìn dzəʼə̀m ŋgaàŋ.

¹¹ Kiyúŋ kí kù yii din dòʼshwíiy və tèéter, a fiì kfə́men e və́ə kfə́mén.

¹² A taà saʼ yuúri fo vé kimboʼtìi, vé lìm və́ adzə̀me bìr.

¹³ À ŋgaà kitàn, à wìr wo wù nyavrì e wun, kù fó Nyùy dzəʼə̀m aáwune adzə̀m.

¹⁴ Fòn lóo tinén kinyo ke ŋgaà kitàn e nsànloŋ, bo sáʼ rəə́ kù wíy a tiy fo, e dù, e jòʼsì.

¹⁵ Aá sər wán e ŋgwàne, kfə̀n tírí, wù wàa ker vifií. Aà leey leèyín, bo wù kù yíi lò, e shoór yè wov.

A dzə̀ á kù sə̀r kiyúŋsì sə́rin

¹⁶ Wír ve á méŋ Nyùyi kóʼ e ntaʼ, vinyo ve bi ví kùʼ, yii bèy, wír ve á yú Nyùyi kù wíy yen mo sáʼ yéví gbu.

¹⁷ Sə̀r wan wò, é wù yii, é shilív shé shi meeme. Rúrú, é wù yiì yiì, áà wáa yu vijuŋ.

¹⁸ Lóo dzə, a bó Nyùy yoʼ ghèm ndzə, e dìn e wíri, á wàa yiì mo á koó. Yii bèy, a bòŋ ké wìr wo wù yúnin nsər Nyùy, ghán e wun mbòv.

¹⁹ Bó yòʼ dzə̀ á sə̀r kwàn, a dzə̀ e jí si cáʼcáʼ. Fə̀m mo wú yú, bó wú yòʼ yíi a yiì mo à taʼà.

²⁰ À yén wír woo súŋnín, e làa yòʼ mèy shintíy a? A dzə̀ á wàa yòy, a tiír e kiyúŋ kí wùn, e shaà wun.

²¹ A wìr rə̀sí, a geʼsín e kwàné, e kèʼ fo meterí, bo wú wíy jòʼsì, e kfən ji njìlaʼ və.

Lá wìr yòʼ a yiì a dzə̀ mo kiìn wun

²² Wìr lóo shwiíy kilòŋ, wù màʼ melaà, wìr lóo yu shilív, wù wàa bùʼtì vinyo vinín.

²³ Wìr kóʼor wún, wù gbù, li kitú shishàr, á kù wìy a ghvəm wun.

²⁴ A wìr suúsin wùn shòŋ, bo wù ban dzəʼə̀m rə́. Aá fə̀m wày wun e vimfar, bo yòʼ dzə̀ wù mùm fóo toʼ kinyo ke wù kiìn.

²⁵ À lóo fàn wíri, bo à yíi lò, e lì e kitam. Yii bèy, wìr tiir a dzə̀ Nyùy fo mbìy, bo wù yíi a kìŋsìn wun.

²⁶ Kùʼùn wìr kù yii koŋ ji taà saʼ wáa kòŋ áwune, yii bèy, kí kù ghàn kiwó ke Nyùy, é bo á tínén kinyo e nsànloŋ.

²⁷ Wìr wo wù yú Nyùy yòʼ yii tíy e wìr wo wù méŋ Nyùy kinyò, yii bèy, a wìr wo wù méŋ Nyùy nyaysì ké wìr wo wù yú Nyùy, nyáysin.