Ŋgàn 28 - ŊWÀʼ NYÙY

Nsùyrì Nyùy làm ŋgaà saʼ wo juŋ

¹ Wír ve á méŋ Nyùyi nyéŋ là ŋgaà jùm, a ve á yú Nyùyi tíy ji ŋkǐŋ moo bvərə̀ʼ.

² Kitúm ki lóo tsəy kóy, vé saʼa wàa fəəkír, a shaà, lóo ker afií ve á kiiy jeéyjeéy fó vinyò, bo sáʼa tuúy, é nyaáŋ wáa dzə e wòŋ.

³ Ghéʼncey wo wù kóʼ é ntaʼ, e kfə̀n a nyàvrì e vé kitàne, dzə̀ moo kiŋkò ke wuu ke kí kúŋ vifá ve yi là nyaʼ.

⁴ Wír ve á ŋwáy nsəri búri a kù dzə̀ wír ve á méŋ Nyùy, a wír ve á yú nsəri sháʼnin kinyo kév.

⁵ Wír ve bií yòʼ yii kiiy kinyo kee tínén é nsànloŋ, yii bèy, a wír ve á ghvə́m Nyùy Tàrí kì kee shooy feyì kidzə̀m.

⁶ Bòŋ ŋgaà kitàn wo wù tíy e wun suuyrú, e shaà ŋgaà mbàm woo ŋgaà kiŋkùvrì.

⁷ Wàn wo wù yúnin nsər dzə̀ woo fií, a wo wù shemen ŋgoo vé kishwaa shoor tàr wov shoórín.

⁸ Wìr wo wù kuʼùr káv və́ a dzə̀ fó seʼ mbóʼmé, kù báʼti a dzə̀ bùʼ wo wìr wo sən yíi lì, e sham ŋgaà kitàn sho.

⁹ A wìr tèn fó a yunín nsər, bo Nyùy yòʼ yíi a kòŋ, e yu bunrì rə́.

¹⁰ A wìr lòo dzə, e yiì, wìr woo là nsem jáy dzə́ə, e nə̀ə́ e kinyò ke bi kí, bo kù yíi gbù wun e wun bii. Yii bèy, a wìr woo là njò kù wíy kav kfə́ a dzə̀ vijuŋ.

¹¹ Ŋgaà mbàm kù yii yén kitú kfə́ ji fií, a ŋgaà kitàn wo wù kiiy jeéyjeéy fo vinyò yíi toʼ kinyè kfə́.

¹² Wìr wo wù yú Nyùy kóʼ e ntaʼ, wíri wàa sàvnìn. Wìr wo wù méŋ Nyùy kóʼó, wíri fəə̀ nsàm.

Nyùy Tàr wùn ŋgaà saʼ

¹³ Wìr lóo lìtì ajay və́ lítin, bo bó yòʼ dzə̀ wù kùy. Wìr tuúne ajay və́, bin ndzə̀m shó, Nyùy shàm mendzən mvə.

¹⁴ Bòŋ ké wìr wo wù ghvə́m Nyùy Tàr ghán sidzə̀m, yii bèy, a wìr wo wù táv a dzə̀ kitú kù yíi jòʼsì kfə́ é ŋgeʼ.

¹⁵ Ŋgaà saʼ wo wù méŋ Nyùy, taá aàŋgàa kitàné kitu kù dzə̀ moo bvərə̀ʼ wo wù nyamkìrì, kìn baá wo jìŋ sòyìn.

¹⁶ Ŋgaà saʼ wo wù tan vifií lo, wù kfə̀n ji gáʼ e wírí kitu, a wo wù ban seʼ mbóʼmé dzə̀ wo wù wíy bonén, e saʼ ntàmda.

¹⁷ Wìr yúyri wír, lóo ghan e lòné wùn, wìr wàa yen fóo sə wun.

¹⁸ Wìr wo wù gharin suuyrú, e kpù shó kù wíy a tiy là kinyo ké a fàn, a ŋgaà yiì ye bií kù wíy lò kfə́, e to toón é bii.

Vikuʼùy ve ru ví wùn à cércer kòóy

¹⁹ Wìr shev súm, wù kùʼ é viyikìr, wìr lóo jùmrì vinyo vee là mvə́m, wù kpù kitan.

²⁰ Wìr lóo suúy kinyo, lóo tiy a dzə̀ e kíwun ki, Nyùy wàa səə̀vì wun. Wìr wáa tàʼ vikuʼùy vee cércér, bo yòʼ dzə̀ wù bòy fó ŋgeʼlàʼ.

²¹ Kí yoʼ bòŋ a dìn medzə̀jeéy é lav nsaʼ, yii bèy, wìr diy shúu yi, wù yiì kinyo kee kintéŋ.

²² Ŋgaà vikaàmè kù yii búʼ kfə́ ji wun kuʼ cér, a bó wù yòʼ kì ji wun kù yíi jòʼsì a dzə̀ é kitàn.

²³ Aà dìn jay wìr, bo wù yíi lò fo bàm, a kòŋ wò, e shaà ké ŋgaà wo wù leerì wun e shúu.

²⁴ Wìr faasì kifá ke tàr wov, kìn ké yè wov, sévti ji bó yòʼ dzə̀ kinyo ke bi kí, bo wù shèm ne ŋgoo kinjuyrìwìr.

Vikuʼùy ve ru ví, à vé vikaàmè ví

²⁵ Bòŋáyimo kù yii taʼ kfə́ a dzə̀ melaà, a vikuʼùy ví kù yii nəə wír wo wù wayin shilív e Nyùy Tǎr wùn nəə́n.

²⁶ A wìr tiir vifií a dzə̀ é kinyò ke kwaʼtì wun, bo ŋgaàŋ dzə̀ kiyúŋ, yii bèy, a wìr tiir kiwuú kfə́ fiʼì, bo wù yíi bàʼàr vishí ve bi ví.

²⁷ Wìr wo wù kér wó rə́ tèéter fo vé kitàne yòʼ wíy a buŋ kifá, yii bèy, aá kù wíy a shov wír wo wù kam fo vé kitàne shóvín.

²⁸ Wìr wo wù méŋ Nyùy kóʼ e ntaʼ, wíri fəə̀ nsàm, wù gbu fo ntaʼ, wír ve á yú Nyùyi lì sáʼ.