Ŋgàn 25 - ŊWÀʼ NYÙY

Ntir si wùn à ŋgàn se Fòn Solomon símóʼ sí 25–29

¹ Ŋgàn se Fòn Solomon símóʼ sí sìne, a dzə̀ se wír Hesekiyàa wayin é ŋwàʼ, Hesekiya woo fon wìr veé Juda.

Á wáa ghvəm Nyùy wùn à fòn

² Vikuʼùy vé Nyùy vi yénsin e vinyò ve wù yii, litì sár kinyò lítin, a vé fòn vi yénsin a dzə̀ é vinyò ve wù sarì, a wíri yéné.

³ Mo yúví duùn, e dù làynìn, loònsay sə́y, e lày, bo kù dzə̀ sá mo shilív shé fòn shi dzəə̀n, a bó yòʼ dzə̀ wìr tàr.

⁴ Tsə̀ʼ kisá kí fó kitu ke kishà ke fəvír kí ke á tònèn, é taà kilàm koóy kifá kée fèr fer sho.

⁵ Tsə̀ʼ atǎr ntoʼ ve bií fo fòn ghaŋ, é sáʼ fòne wáa dù tìítiy.

Ntir sée tir wír ve á dzəə̀n é lav nsaʼ sho

⁶ Lá à yòʼ a gùynìn e fòn si, a tiy fo kì yíi a tiy vibay.

⁷ Bòŋ ke á li wò líin, e kòʼtí sho e fòn ghaŋ, e shaà fo á shoór wò e taà saʼ si. Ké kinyò ke à yenen mo kí kooyì,

⁸ lá à yòʼ a tav a dù sho e lav nsaʼ. A ŋgaà shweèsi wò yiì dù, e shòór wò, à lo fo bàm, áà yée le?

⁹ Vèn ŋgaà shweèsi wò ku sìysì kinyo kén kí ven ven, é la wìr yòʼ fə̀ə́r kilìtì ke wùmòʼ é nsaànsaá.

¹⁰ Là bey, bo a tàm wìr wo kí yíi to e kitùʼùr wó yiì a roòmè wò, áà rán ghvə́m yé ŋkuuŋkùŋ.

Jí se dzə̀ á fò e wír ve á dzəə̀n é lav nsaʼa

¹¹ Ntir yee tír é dzəə yee réŋ bòŋ, moo kifá ke sùsù ke á fèrìn e *kisha ke mbàm ke baar kí, e kfə̀n jùŋ e ke fəvír kí.

¹² Wìr wo wù koŋ ntir shéʼri ŋgaà naàrì və shéʼrín, mo wiíy shèʼrí yèreŋ wo á fèrìn e kisha ke mbàm ke baar kí.

¹³ Wìr woo jwáʼ lo ntum, shilív shé ŋgaà ntum shi rə̀sìn, moo wír wo wù kavin vifá, e ndzə̀ʼnìn, e nò mendzə́v me rəə̀n mè, wúné rə́sín. Wù yii, a shilív shé tàr wov lìm shi rəsìnè.

¹⁴ Wìr wo wù raʼsì wún bìʼ fómo, a wù yoʼ fò, dzə̀ moo mbàʼ wùn à shwéri, yee là wuú.

¹⁵ Jwi lo ji weè, yì bùr kighvə́r, wìr lo ji weè, wù kùvsín kwaʼtì taà saʼ.

Móo màyìr melaà

¹⁶ Aà yèn vilu, à là, é ví gheén gheenén, e shaà fo à lá, e shaàsìn, a màʼ.

¹⁷ Lá à yòʼ a dù kiŋgàn e ŋgaà shweèsi wò lav fó fó, fo wù yiì səə̀sí wò e ŋàŋ, e lò, a bàn wò.

¹⁸ Wìr wo wù tiim vinjen ve kisaŋ vi e ŋgaà shweèsí və́ bàm dzə̀ kpú, réŋréŋ moo kibur, kìn nyùy rə̀r, à mvən ndzəʼə.

¹⁹ Fó a dzə e ŋgeʼ, e kfə̀n a yòy, a tiír e wìr wun, a bó yòʼ dzə̀ wír jwáʼ, kù dzə̀ moo sóŋ ye yí wámé, à kiwuú ke wìr rə̀mèrsìn kí.

²⁰ Luŋ wó a yòv e wìr, a wù dzə̀ é nsòvkìtuu, dzə̀ moo ndzə̀y se kintòn ki koó, é wìr shóʼtí fó wùn, à moo kilún kee kám é kileemé.

²¹ A jìŋ yár ŋgaà wò vibàn, à fò vifá ve yi sho, é wù yí. Kilòŋ kí wáa yum wun, à fò mendzə́v shó, é wù nó.

²² À yii bèy, é dzə̀rkìtu koó wun, é Nyùy Tàr wìy laàmé wò.

Mbvəərì wo wù sàsìn, e shùʼùm

²³ Shúu ŋgaà kinsuʼu kù yii wiy e dòʼshwiíy, mo mbàʼ ye sənér kù yii wiy e wuú.

²⁴ Kí bòŋ a dzə e kiŋkfə̀ʼ ke lav, e shaà ké a dzə e lav vèn wiiy kinyàm.

²⁵ Sáʼka wo juŋ wo wù wìyìn kwaʼda, dzə̀ moo mendzə́v me rəə̀n me wìr nó, kilòŋ kí rə̀sìn.

²⁶ Wìr wo wù yú Nyùy lóo tatí wo wù méŋ Nyùy, bo dzə̀ moo ndzə́v ye juŋe ye yí bìnkìn é kiluu, kìn yé kishàʼàrí.

²⁷ Vilu vee lá, e tònén vi yoʼ bòŋ, réŋréŋ mo nsùyrì wo wìr suyrì kitú kfə́ yoʼ bòŋ.

²⁸ Wìr wo bó wù yòʼ kfə́men e wun dòʼshwiíy, dzə̀ moo ŋkàlaʼ ye á bvəʼən ne, e nə̀ə́ sho, a bó yì yòʼ kfə̀n dzəə́ kér kay ye yí kiŋsìnè.