Ŋgàn 24 - ŊWÀʼ NYÙY

Ntir yee 19

¹ Lá à yòʼ a yu nyár wìr ve á yii vinyo ve bi ví, kìn ji à wáa ker shií ji vèn áwune wáa dzə.

² Áwune kù kér a dzə̀ melaà aáwuné kwàʼtì, a kinyo ke kí fəə́ fo áwuné shuù ki kù dzə̀ ji á gheʼ wír.

Ntir yee 20

³ Fóo bom lav dzə̀ vifií, a fóo bàʼrì, é yì wáa tiy ji ŋkǐŋ dzə̀ kiíy.

⁴ Wìr kiiy vinyo, wù wàyrí lav rə, e tìír vifá veé kilùm ve ví kiʼ vijuujùŋ sho.

Ntir yee 21

⁵ À fiirì, bo à sì ntav. À kiiy vinyo, vitaáví vé vi kùy kúyín,

⁶ a dzə̀ á kù lì a dzə̀ ntir fiì, e bóo baʼtí rə́r. Vé ntiri lóo dzə anín, bo nsiì dzə̀ é kiwo.

Ntir yee 22

⁷ Vifií ví tàv é ŋàŋ fo kiyúŋ kí kiíy, a bó yòʼ dzə̀ kiyúŋ kí mvə̀ʼ shuu fo á yii tínen nsaʼ.

Ntir yee 23

⁸ Wìr wo wù táŋ kinyo ke bi kí dzə̀ wo á yíi a yòŋ ji ŋgaà menàŋ.

⁹ Antaŋ kiyuŋé kù dzə̀ ji kinyo ke bi kí, a wìr wo wù jaʼ Nyùy yii kóʼoy wíri koʼoyín.

Ntir yee 24

¹⁰ Aà bùú shilív é ghan sé ŋgeʼ, bo mbòví yòʼ dzə̀ e wò.

Ntir yee 25

¹¹ Ku bòyìr wír ve á gòvìn, e lì, a dù sho e kisəə́. Wìr tó e vé kinjuyrìi wo, à faàsì, fo dzəʼə̀m rəə́ lay.

¹² Aà lò, a sù njò yè jii, «Rúrú, vèr yòʼ kì fó kinyò fèn,» bo bó Nyùy wo wù tar shilív shé wìr dzə̀m yòʼ kù yéné à? Bó ŋgaàŋ wo wù kíy dzəʼə̀m yé yòʼ kù kì kidzə̀m à? Wù yòʼ kù wíy a làʼ wír a dzə̀ mo lim rəə́ dzəə̀n a?

Ntir yee 26

¹³ Wan wòm, á la vilu vi, bìʼ fo ví dzəə̀n vijuŋ, ghám vilù, a yí nyom, kfə̀n rəʼtìnè e wò shuù.

¹⁴ Kù dzə̀ réŋréŋ mo kiíyi dzəə̀n e wò dzə̀ʼə̀m, aà keèrí, bo kibvəə́shí ké ki sí yiì a tiy fo, a bó yòʼ dzə̀ wìr bvə̀ə́r vifií vé fo kinyò ke à tiirin shó.

Ntir yee 27

¹⁵ Éè wò woo wír wo bi, lá à yòʼ làáy, a teʼ wír wo wù yú Nyùy, a taŋ láʼ rə́. Lá à yòʼ mùm ji à faasi e vitaáví ví.

¹⁶ A wìr wo wù yú Nyùy fə̀m gbù, e dù meé e le, bo wù kù yíi nànèn, a wír ve á méŋ Nyùyi dzə̀ kév, a ŋgeʼ yíi màʼ áwune máʼan.

Ntir yee 28

¹⁷ Ŋgaà wò vibàn gbu, lá à yòʼ a sheʼrí. Wù bayrìnè, lá à yòʼ a yu vijuŋ.

¹⁸ Lá à mùm fo Nyùy Tàr kiíy, a yu nyár, e tsə̀ʼ dòʼshwíiy və fo ŋgaàŋ wùn.

Ntir yee 29

¹⁹ Lá à yòʼ a yu ntéŋ bìʼ wír ve á buʼtì vinyo. Lá à yòʼ a siimé vijuŋ ve wìr ve á méŋ Nyùy.

²⁰ Kibvəə́shí ké wìr wo bi kí yòʼ dzə̀, a kikaʼày ké wìr wo wù méŋ Nyùy ki kù wíy ndzəmén.

Ntir yee 30

²¹ Wan wòm, á ghvəm Nyùy Tàr, e kfə̀n a ghvəm sa fon. Lá à yòʼ tèn fóo yunín sáʼ Nyùy Tàr, à yé fòne.

²² Dòʼshwíiy wov kù sí lo, e ŋaʼáy lèn lèn, a kì la ŋgeʼ se dzə̀ áwune wìy shó?

Ntir símóʼ sí

²³ Ntir se afiì símóʼ sí sìne. Kí yoʼ bòŋ, e dìn medzə̀jeéy é ghan sé nsaʼ.

²⁴ Wìr wo wù suuy e ŋgaà jay jii, «À dzə̀ là njò,» wíri yíi a shov wun, vitúm vi yíi a nyàysì wun nyáysin.

²⁵ Yii bèy, á yíi a sheʼrí wír ve á tínen kév nsaʼ ŋgaà jay ji wù gbù nsaʼ. Áwune kù wíy a ker kisəəvì ke kuʼùn kí.

²⁶ Wìr fó binèr ye ruú, kí wàa dzə mo wìr baàmé ŋkar rə, a nyòʼtì.

²⁷ Báʼtí súm wóo, e lìm, e wày ŋgoòy se vifa sho, fo bàm, à nèn bàʼrì lav yè.

²⁸ Lá à yòʼ tìím vinjen ve kisaŋ vi e ŋgaà shweèsi wò bàm. Lá à yòʼ bòʼtí kimboʼtì.

²⁹ Lá à yòʼ a suúy ji m yíi yiì e wìr mo wù yiìn e mò, m kù yíi siìr ŋkfə́tír.

³⁰ Mò‑oò shaà e njoó ghaa súm vitiír vé *vayin. Kù dzə̀ féyì súm wìr woo là vifií.

³¹ Mò‑oò yèn, a kinyáʼnyaʼ kí sə́ ne súm e dzə̀m, a kikwiíy kí ghámsín ne sa fo, a kay ye vé‑eè bomen e tíyí, e gìm shoo keésí ne.

³² M yén, e keèrí kwaʼtì, kí yéʼéy mo kinyo.

³³ Aà yèn ji wò‑óò neem, e yòyrì shishàr, e shòy shimbuùné, a jiíy e wóo ji à meemè,

³⁴ bo kitan ki kù‑úù sasin, e sùm wò moo shóŋ, é kíghàʼ ghíʼ wò moo wir kimfaàsì.