Ŋgàn 22 - ŊWÀʼ NYÙY

Vikuʼùy, à ntir liì wo wìr wáa ker

¹ Bòŋ kée shoʼ yír ye juŋe, e shaà vikuʼùy veé ŋàŋ. Bòŋ keé shoʼ koŋ ye wíri wáa kòŋ wò, e shaà mbàm.

² Ŋgaà mbàm wùn ŋgaà kitàn, á kù kér kiyoy a dzə̀ kee shó. A kù dzə̀ Nyùy Tàr wo wù bomen áwune adzə̀m.

³ Wìr fiirì, wù bàʼàr kileémé, kiyúŋ kí nə̀ə́ shó nəə́n, a yen ŋgeʼ.

⁴ A wìr kfə́menè, ghvə́m Nyùy Tàr, bo vilaʼày və́ ví dzə̀ vikuʼùy, ghvə́m, wùn à dzəʼə̀m ye dáa.

⁵ Dzə́ə sé ayìíkum sí dzə̀ vitám vitám, a dzə njoŋ njoŋ, wìr kim kitú kfə́, wù bàʼàr.

⁶ Ku mèrìr wán a dzə̀ e liì wo juŋ, wù wíy kúyí, é la wù yòʼ màʼtì liì woo shooy.

⁷ Mo ŋgaà mbàm kù yii kóʼ ŋgaà kitàn kóʼón, bo kù dzə̀ sá réŋréŋ mo ŋgaà mfoòmé kù dzəə̀n sá kwǎn ŋgaà foòr.

⁸ A wìr wày kinshwìv, bo wù kù wíy kav a dzə̀ lòn, é táy ye wù táy wírií nèn mày.

⁹ Wìr lóo ker wó rə́ tèéter, Nyùy wàa səə̀vì wun, bìʼ fo wù jav vifá ve yi e vé kitàne.

¹⁰ Aà jùm ŋgaà jàʼ, bo à jùm ne kitáŋnìn, kinyam wùn à liy si nèn sèéy.

¹¹ A wìr kér shilív she juŋ shi, shám wíri, bo dzə̀ fòn koò wun e viŋkar.

¹² Nyùy Tàr yii shiy wir dzə̀m wo wù kér vifií, bvəər antaŋ vé kimboʼtìi.

¹³ Wìr njoó, wù gòʼ ji bvərə̀ʼ dzə̀ é ndzə, a m fəə̀ é dzəə, é wù yúyrí mo.

¹⁴ Jí se wiiy viŋkar si dzə̀ bií ntùr, a wìr wo wù nyárir shilív shé Nyùy Tàr yíi gbù sho.

¹⁵ Kiyúŋ kí rùn ne e wǎn kitu, aá kù yíi sə̀r e ŋgwàne, é kí du kwaʼda.

¹⁶ Aà nyavrì e ŋgaà kitàn ji à dzəsi káv wó, kìn à fó fómo e ŋgaà mbàm, bo à kù yíi a ghiy ghiyín.

Ntir se afiì ámóʼó 22.17–24.34 Ntir see mtaár

¹⁷ Fó vituʼùr ví, e yuùrí jí se afiì sí, e tìír vifií ví e mǒ yeʼéy.

¹⁸ À yíi a yu vijuŋ ji à kìíy ne jí sìn, aà fey kìíy mó a yòŋ fo kitu.

¹⁹ M sí yéʼey wò lán ji à fíʼ a yu a dzə̀ fo Nyùy Tàr.

²⁰ M sàŋ ne vinyo mtaár, e fò e wò. Kù dzə̀ jí se ntir wùn à sé vifii sí sidzə̀m.

²¹ A m sàŋ ji à fiʼ kìíy a kinyo ke dzəə̀n ke ru kí, kiiy feyì kijuŋ, áà fiʼ kfə̀n fo wìr wo wù tumen wò, e naàrì vinyo ve réŋ ví shó.

Ntir mbìy

²² Lá à yòʼ shwìv ŋgaà kitàn ji bìʼ fo wù tanè, kìn ji à nyavrì e ghéʼncey é lav nsaʼ.

²³ Nyùy Tàr yíi sə nsaʼ yev, e saʼ, e nyàvrì e wír ve á nyavrì aáwuneé.

Ntir yee 2

²⁴ Lá à yòʼ shèm ŋgoo vèn wìr wo wù shwiiy kilòŋ, kìn ji à shém ŋgoo vèn wìr wo wù yòʼ kúʼti dòʼshwiíy.

²⁵ Ku bàʼàr ŋgaàŋ, fóo bìʼnìn liì və, e to e kitam.

Ntir yee 3

²⁶ Lá à yòʼ kàʼ ŋkàʼmé, e tìím mbìy ji wìr foo kifá.

²⁷ A kí wìy kòóy ji á búŋ kifá kée làʼ kaá rə́ shó, bo á yíi koo kifá ké kidzə̀m, à kikún kí shó.

Ntir yee 4

²⁸ Lá à yòʼ kùvsín bìíy ŋgvən, kù dzə̀ bìíy mo atàr vée‑eè sanen fó yàŋgùʼ.

Ntir yee 5

²⁹ À yén wír wo wù kiìn lim rə́ á? Wù wíy a lìm a dzə̀ fo afone, wù yòʼ wíy a lìm fo wír vee víyi.