Ŋgàn 21 - ŊWÀʼ NYÙY

Nyùy kù kíy shilív shé fòn

¹ Shilív shé fòn shi dzə̀ e Nyùy Tǎr kiwo, a wù danèr moo ndzə́v ye wù yii, a yí léŋ du fo wù koŋè.

² Wìr lo, wù wàa yen ji wun tíy kfə́ tìítiy, yii bèy, a kù tar Nyùy Tàr shilív shé wìr.

³ Yii yee réŋé wùn à kinyo kee tínén é nsànloŋ, kí boŋ fo Nyùy Tàr, e shaà cu.

Koóyi bívir dzəʼə̀m wíri

⁴ Wìr wo wù méŋ Nyùy kù yén a dzə̀ kitú kfə́, ghaŋghàŋè. A vinyo və́ vidzə̀m vi dzə̀ ve bi ví.

⁵ Wìr báʼti ji weè, lim kitávín, wù tò é bùʼ, girì, wù tò a dzə̀ é kitàn.

⁶ Vikuʼùy vee shwìv kinshwìv, e kòóy, vi dzə̀ moo mbàʼŋkfəə́mé ye yì lo, yì ŋeèmé, e lày, a dzə̀ kitám ke wìr ve á jum kpú yév.

⁷ Melaà me wìr ve bií mè kù wíy laàr áwune, bì fo á tén fó a yiì kinyo ke réŋ kí.

⁸ Ŋgaà jay kù yii ghán kfə́, a dzə̀ é dzəə yee kintéŋ, a lànjò yii kfə́ kinyo, a dzə̀ kee tìítiy.

⁹ Kí bòŋ a dzə e kiŋkfə̀ʼ ke lav, e shaà fó a dzə e lav vèn wiiy kinyàm.

Wír ve á yú Nyùyi neer kóy wìr ve á méŋ wun e nsay

¹⁰ Wìr wo wù méŋ Nyùy kù yii kér shií a dzə̀ é kinyò ke bi kí, a bó wù yòʼ yii rə́r mendzən me fər və.

¹¹ Á maʼ ŋgeʼlàʼ e ŋgaà jàʼ kitu, anjìʼi yèʼéy kinyo fo fo, naarì ŋgaà kìíy, wù keèrí vifií.

¹² Nyùy kù yén kinyo ke kí kooy e wìr wo wù méŋ wun lav, a wun woo ŋgaà yiì yee réŋ kù yíi yiì, é lòné shóv wír ve á méŋ wun.

¹³ Wìr səmrì vituʼùr fóo yu tóŋ ŋgaà kitàn, Nyùy sə̀mrì sá fóo yu rə́.

¹⁴ Fómo woó kilìtì yii rəər dòʼshwiíy, a woo bámbám rəər dòʼshwiíy wo tavín.

¹⁵ Á tínen kinyo e nsànloŋ, wír ve á yú Nyùyi wàa sheʼrí sheʼrín, ve á méŋ wune kù a seèmè seèmèn.

¹⁶ A wìr ŋwáy yéʼéy ye yí fó vifií, bo wù kù wíy jòʼsì a dzə̀ wùn à kpúu.

¹⁷ Wìr wo wù koŋ a yi a dzə̀ kitu, wíy jòʼsì e kitàn, wìr wáa kòŋ meluʼ, a dìy ji shúu wáa fom, bo wù wíy kpu kitan.

¹⁸ Á wíy lì wír ve á méŋ Nyùy, e tin ve á koŋ wun sho, e lì ve á yoʼ biìmé Nyùy, e tin ve á dzəə̀n tìítiy sho.

¹⁹ A sì ké a dzə e lav vèn wiíy wo wù nyamè, waʼrì, shwiiy kilòŋ, bòŋ keé bàʼrì, a dzə e kirə̀ʼ ké woʼ.

Wír ve á yú Nyùyi kúr tím, a kpúu li ve á méŋ wun

²⁰ Fiì yii kér vifá veé kilùm veé shií é lav, a kiyúŋ kí jaar kfə́ və́ jaarín.

²¹ Wìr lóo jùmrì kinyo ke Nyùy taʼà, lóo sham wíri, bo wù yíi a ker dzəʼə̀m ye dáa, é Nyùy wáa binsí wun, aá wáa ghvəm wun.

²² À dzə̀ fiì nə̀ə́ rə́r áàntaví ŋkàlaʼ, e sàʼtì virə́ʼ ve tavkín ve áwune tiir vifií shó.

²³ Wìr kim shuu və́, wù bòy fó melaà.

²⁴ Ŋgaà kiŋkoʼòrwùn, à ŋgaà kiràʼsìwùn, yírí kù dzə̀ ŋgaà jàʼ, njiìn və e dzə̀m kù dzə̀ wùn à kiŋkoʼòrwùn kí.

²⁵ Shií wo njoó kér fo vifa yíi yuyrí wun, bìʼ fo wó rəə́ jiiyì.

²⁶ Wìr wo wù méŋ Nyùy kù siíme a dzə̀ kinsiimè, a wìr wo wù yú Nyùy fó fómo, e làa yòʼ a gimtí.

²⁷ Nyùy ban cu wìr ve á méŋ wun, bo taaka ye wìr yii wùn à kwaʼtì ye bií.

²⁸ Á kù yíi sə̀r njen kimboʼtì sə́rin, e fo ghay e wo wù kaʼày kinyo kijuŋ, é wù bónén, e sùŋnín.

²⁹ Wìr wo wù méŋ Nyùy kù yii fə́ti a dzə̀ sí, a wìr woo tìítiy ku yii sayrì dzəʼə̀m rə́.

³⁰ A wìr fə̀m fìír e le, a kiíy jeéyjeéy fó vinyò, a tir wíri é le, bo bó yòʼ dzə̀ wù ghàʼ Nyùy Tàr.

³¹ Aá fə̀m bàʼtí nyám se ŋkoʼ e le, e taàmé rə́r shó, bo kù yíi yiì Nyùy Tàr, é bo á tám é shùu rər.