Ŋgàn 20 - ŊWÀʼ NYÙY

¹ Meluʼ mè dzə̀ ŋgaà jàʼ a me tavín mè dzə̀ ŋgaà melaà, a wìr wo wù nó, a mè koó, dzə̀ kiyúŋ.

Fon wo wù yú Nyùy e viyúŋ ví mvəm

² Dòʼshwiiy fòn dzə̀ moo tóŋ bvərə̀ʼ ye wù tóŋé, virə́ʼ ví beèmé, a wìr tínsin wun, bo ŋgaàŋ kpù ne.

³ Wìr lóo bàʼàr kinyam, bo wù ghvə́m kitú kfə́, yii bèy, a dzə̀ kù kèʼ kiyúŋ kitáŋnìn.

⁴ Wìr njoó fóo shèv súm e lùm, á wíy lóo kav vifá, wù bùŋ vifá vée kav.

⁵ Antaŋ ve á dzəə̀n e wìr kwàʼtìi dzə̀ moo ndzə́v ye yí shoon, a kù dzə̀ wír wo wù kér vifií, wo a dzə̀ wù sòvìr, e fə̀ə́r.

⁶ Wìr lo, wù kù sùúy ji m dzə̀ wir jwáʼ, yii bèy, a dzə̀ á yèn wir jwáʼ e fèé?

⁷ Wìr wo wù yú Nyùy yii ghvə́m kitú kfə́ e njiìn və, a Nyùy səəvì wón və́ bìʼ wun.

⁸ Fòn kóʼ e kàvàʼ ji wun tínen nsaʼ, lóo tàr kinyo, wù kìíy kíwun.

⁹ A dzə̀ dzə̀v la nsaŋ jii, «M sù ne shilív shém, a m dzə̀ là jay.»

¹⁰ Mfìʼ vidzəə̀sì mbóʼmé, à mfìʼ yee kintéŋ, sidzə̀m si dzə̀ réŋréŋ, a Nyùy Tàr banè.

¹¹ Á yii kiiy wán a dzə̀ fó kinyò ke wù yii, wù sà kér liì wo juŋ, suuy suuyrú á?

Kisuŋnìn kee jaár é kirə̀ʼ ké way

¹² À vituʼùr ví, à síi, bòm Nyùy Tàr, ku nèn yiì sa wun, bo á wáa yen virə́ʼ, a yu vinyo.

¹³ Lá à yòʼ a kòŋ mbuùné, fóo yiì kpu kitan. Lò é yuv, a lìm kitávín, áà yiì a ker vifá ve yi nyanyày.

¹⁴ Njun lo, wù kù gòʼ ji kí yoʼ bòŋ, kí yoʼ bòŋ, lóo bìn ndzə̀m, wù wàa dzə̀v nsaŋ ji m dzə̀ a m bóʼ.

¹⁵ *Kisha ke mbàm ke baar kí dzə̀, a vifá ve sùsù vi dzə̀, yii bèy, a jì fiì bòŋ, e shaà vifá ve sùsù vidzə̀m.

¹⁶ A wìr tiim mbìy ji kiŋgwìy ki foo mbàm, wù kù tìír ndzə̀y sə́. Wù wáa tiím mbìy ji foo á wiíy viŋkar kifá, bo wù kù tiir kitú kfə́.

¹⁷ Wìr lóo yi vifá ve yi ve shwivìn ví, ví wàa nyòm, e bǎm shintàm, ví nèn kfə̀n mo wù wày a dzə̀ waár é shuù.

¹⁸ Á tír wír, wù bà ntaŋ wo juŋ, tírí, é bo wù kiíy móo taŋ rə́r.

¹⁹ Ŋgaà viduu yii tóʼti vilìtì ve vinyò. Lá à yòʼ shèm ŋgoo wìr wo wù yav lám.

Kilíŋ ke atàr, à ké Nyùy ki

²⁰ A wìr tìn kàʼ tàr wov, kìn wo yè wov, bo wù kù‑úù kpú kpuún, e dù e kimbàŋnsay.

²¹ A wìr gìtì, e yì vitsə́ʼ, a bó yòʼ sì ghán, bo kí yòʼ wíy dù réŋ.

²² Lá à yòʼ a sevtí ji m kù yíi siìr ŋkfə́tír, màʼtì, é tóm Nyùy Tàr ghay wó.

²³ Nyùy Tàr ban mfìʼ se mbóʼmé, a mfìʼ se vidzəə̀sì sé mbóʼmé si yoʼ bòŋ.

²⁴ Mo kù danèr Nyùy Tàr wir msòŋ, bo a dzə̀ wù ghàn é le, e bóo kiíy kibvəə́shí kfə́.

²⁵ Wìr wáa yen fó gìtì, e kàʼ cu e Nyùy Tàr. A wù lò, a rə̀m ntéŋ fó bàm, bo wù wày ne kitú kfə́ é kitam.

Kilíŋ ke fòn

²⁶ Fòn woo fií yii tar woŋ, fəər aŋgàa yiì ye bií, maʼ ŋgeʼ aáwuné kitu là mendzən.

²⁷ Shilív shé wìr shi dzə̀ kikaʼày ké Nyùy Tàr, a shí kaʼày sár vito wìr dzə̀m.

²⁸ A fòn rə́r mendzən, suuy suuyrú, bo kí yíi dàrìr sáʼ rə́. Wù wáa ker wíri kijuŋ, bo sáʼ rəə́ wíy dù, e jòʼsì.

²⁹ Vijuŋ ve wàʼbìn vi dzə̀ vitaáví vév, a viwìr ve ŋgày sé wìr vi dzə̀ fúv.

³⁰ Á dzəv wír, lémerì, wù màʼtì yii ye bií, shóʼ virə́ʼ e ŋgwàne, wù kùvsín kwaʼtì rə́.