Ŋgàn 2 - ŊWÀʼ NYÙY

Kisəəvì ké wìr wo wù jumrì vifií ve ví lo fo Nyùy

¹ Wan wòm, ku yù jí sém sí, e lèm ntò sém sé yeʼéy si.

² Ku mvə̀ʼtì vituʼùr vé vi, e yuùrí jí se sí fó wò vifií sí. Yuúrí yéʼéy ye afií yéʼey wò shoo, a mùm ji à kiíy nsàv.

³ Ku lòn vifií vé a kiíy jeéyjeéy fó vinyò vi, kú a lon, a sə̀ntì.

⁴ Kú a tàʼ feyì mo wìr jùm mbàm, a tàʼ moo bùʼ wo wù dzəə̀n é kilìtì.

⁵ Aà yii bèy, bo à yíi kiíy mo dzə̀ á wàa yunín Nyùy Tàr, e kfə̀n kiíy kijuŋ mo Nyùy dzəə̀n.

⁶ Rúrú, kù fó Nyùy Tàr vifií ve ru ví. Kù yii jí sə́, é bo wìr wáa kiíy vinyo, e kfə̀n a gwàrìr vinyo kijuŋ.

⁷ Wù fó kiíy e wír vee là nseme, a dzə̀ wun ŋkeè wìr ve á yii vinyo ve ru ví.

⁸ Wù kiŋsìn wír ve á tínen vinyo e nsànloŋ, bávti dzəʼə̀m wìr ve á tíy e wun wùn.

⁹ Aà jùmrì vifií ve ví lo fo Nyùy, bo à yíi kiíy mó a tiír kiwuú ké, a fìʼ ghán sidzə̀m. À yíi a kiíy vinyo ve dzəə̀n ve ru ví. À yíi a kiíy mó a tinén vinyo e nsànloŋ, là kiloʼ.

¹⁰ À yíi a ker vifií ve ru ví, é vinyo ve à kiiyin ví yii, áà wáa yu vijuŋ.

¹¹ Kiíy ye à kiìn móo tàr kinyóo yíi a shìy wò. Kiíy ye à kiìn jeéyjeéy fó vinyòo yíi a kìŋsìn wò.

¹² Vifií vé vi yíi a bòyìr wò fo ayìíkumé wo, ví yíi a bòyìr wò fo aŋgaà lám bàá wo,

¹³ áà boy fo wír ve á bìnèn ne ndzə̀m é yiì yee réŋé, wír ve á ghán a dzə̀ é ndzə vitsə̀ʼ.

¹⁴ Áwune yú vijuŋ e vinyò ve á buʼtì, tiir vifií a dzə̀ é vinyò vee yiì e kúmé.

¹⁵ Á ghán ghán a dzə̀ yé kisaŋe, kér liì a dzə̀ wo bi.

¹⁶ Vifií ve ví lo fo Nyùy vi yíi teér wò fo wiíy wo wù ghán viŋkar kitam, áà boy fo wun kilayláy ke juŋ ki.

¹⁷ Dzə̀ wiíy wo a dzə̀ wù kù màʼtì lúm və viŋgòn, e làysìn *mensaŋ me áwune‑eè gwàrìn e Nyùy si.

¹⁸ A wìr du e wun lav, bo ŋgaàŋ kpú, yéné. Du yee wun lavi dzə̀ dzə́ə ye yì li wír, du sho aàŋkfəə́ wòŋ.

¹⁹ Bó wìr yòʼ‑oo bvə́n ne kitú, e nə̀ə́ viŋkar e lav wo, e kfə̀n fəə̀. Bó wìr yòʼ‑oo dú ne, e ghàr kóy fo fo, e kfə̀n lùŋ.

²⁰ Aà jumrì vifií ve ví lo fo Nyùy, bo à yíi a ghan e dzəə ye wír ve juŋe tiir kiwuú kév shó, bo à yíi a dzə dzəʼə̀m yee là nsem.

²¹ Á bèy, wír vee là nseme wíy a dzə e nsay fèn, wír ve á kér liì wo juŋe kù wíy a dzə fo.

²² Yii bèy, á wíy fəə́r wír ve á méŋ Nyùy fo fo, e dzəʼə́r ve á ŋwáy wun fo nsay adzə̀m.