Ŋgàn 13 - ŊWÀʼ NYÙY

Ntir wàn, mo dzə̀ wù wàa tiír kiwuú, a fìʼ

¹ Wan wo wù kér vifií, kù yii yúnin ntir tàr wov, a wan wo wù ŋaʼà, ŋwáy ntir ŋwáyín.

² Wìr wo juŋ yú vijuŋ, bìʼ kisúŋnìn kfə́ ke juŋ ki, a ŋgaà menàŋ kù yáŋri kfə́ a dzə̀ melaà.

³ Wìr kim shúu və́, wù kìm kitú kfə́, wìr mvəʼ shuu, lem e rə́, wù màʼày kitú máʼayin.

⁴ Njoó diy vifá, kù kpú e kitàn, a ntav kù yii kér vifá ve wù diyì vidzə̀m.

⁵ Wìr yú Nyùy, wù wàa bàn kimboʼtì, wìr méŋ Nyùy, wù wàa yiì joonè, a shoór kitú.

⁶ Yíi lànjòó kiŋsìn wun, a njiìn wìr wo bi kù maʼ wun máʼan.

⁷ Wír ámóʼó li vitú vév ji vé kavi, a bó á yòʼ kér kifá, aámóʼó li vitú vév ji vé kitàne, aá kér bùʼ nyanyày.

⁸ Ŋgaà bùʼ lo, wù fò káv və́ e dzə̀m ji wun fiʼ tìn kitú kfə́, a ŋgaà kitàn dzə̀ kfə́, a bó wìr yòʼ fə̀m bémer wun.

⁹ Wìr yúnin Nyùy, wù wàa dzə moo kikaʼày ke kí bán kijuujùŋ, a wo wù méŋ Nyùy dzə̀ kfə́ moo kikaʼày ke kí sí ndzə́menè.

¹⁰ Kiŋkoʼòrwùn kí fəər a dzə̀ kitáŋnìn, a wìr wo wù kér vifií dzə̀ wo wù yú ntir.

¹¹ Wìr wo wù gìrìn gírin, e bóo koóy káv, káv vəə́ kù wíy taʼrí, e lày, a wìr wo wù báʼti kfə́ kéŋ ji weè weè dzə̀ wo wù wíy a ker káv.

Wìr yú ntir, wù yèn dzə́ə, ŋwáy ntir, wù sə̀tí dzə́ə sə́

¹² Wìr lóo yaŋrí kifá, kí lóo ndzə̀y, wù wàa rəə́y, kooyì, wù wàa sàvnìn.

¹³ Wìr ŋwáy ntir, wù nə̀ə́ é ŋgeʼ, wìr yú ntò se yeʼéy, wù wàa dzə kijuŋ.

¹⁴ Ntir fiì dzə̀ moo ntoò ndzə̀v ye wìr nó, wù lùŋ, a yì kiŋsìn wír fo kpúu.

¹⁵ Wìr lóo yiì vinyo ve ví kér vifií, wíri wàa ghvəm wun, wìr wáa tùʼtìn kfə́ túʼtin, bo vinyo və́ ví kù yíi a bvəərí bvəərín.

¹⁶ Fiì yii kinyo moo fií, a kiyúŋ kí kù din kfə́ kiyúŋsì kfə́ dínen.

¹⁷ Jívlày lo ntum, wù tò a dzə̀ é kinyò, ŋgaà ntum woo jwáʼ du, wù màʼ kfə́ a dzə̀ kimán.

¹⁸ Wìr ŋwáy ntir, wù tò é kitàn, a woomé, wìr yú ntir, á wàa ghvəm wun.

¹⁹ Wìr yáŋri kifá, kooyì, kí ghèén wun, a bó yòʼ dzə̀ kiyúŋ kí yàr fó a yaŋrí ji wun buʼ á kinyo.

Vijuŋ ve wan woo fií, à kilày ke wan woo kiyúŋ

²⁰ Wìr shém ŋgoo afiì, wù kfə̀n ji fií, shém ye viyùŋ, wù bìvír kitú kfə́.

²¹ Ŋgeʼ si kù jumrì wir yiì ye bií, a ké wìr ve á yú Nyùy ki dzə̀ vikuʼùy ve ví nəə áwune.

²² Wìr wo juŋ kù yíi a ker kéŋ yée lèm ji vitsə́ʼ e rám rəə́, a bùʼ ŋgaà yiì ye bií wíy dù a dzə̀ e wír ve á yú Nyùyi.

²³ A dzə̀ súm see là lim si fò vifá ve yi e vé kitàne nyanyày, yii bèy, vé yìikisaŋe jívír, e kìm fo á lim.

²⁴ Wìr kim ŋgwàn fo wàn, wù bìvír wán, wìr lóo kòŋ wán, wù wàa sə̀r.

²⁵ Wìr lóo yu Nyùy, wù wàa yikír, a kur. Wìr méŋ Nyùy, wù kpù jíŋ.