Ŋgaà Tàrvìnyò 9 - ŊWÀʼ NYÙY

Kpúu kù li wir dzə̀m

¹ Á bèy, m tàr ne vinyo vìn vidzə̀m, e yèn jii, à wìr wo wù yúnin Nyùy, à wo wù fiirin, à lim yéví e dzə̀m, kidzə̀m ki kù dzə̀ a dzə̀ e Nyùy kiwo. Kìn wíy a dzə kikoŋnìn, kìn vibàn, bo bó wìr yòʼ kì ke kí wíy a neŋ e wun mbìy,

² a kimaysì ké kifa kidzə̀m ki kù dzə̀ kpú. Kpúu kù li wír wo wù yú Nyùy, li wo wù méŋ wun. Yí li wír wo juŋ, li wo bi, li wír woo là *kifàn, li ŋgaà kifàn, li wír wo wù cu Nyùy, li wo wù yòʼ cu. Kinyo ke kí kooy wír wo juŋ ki kù dzə̀ ke kí kooy ŋgaà yiì ye bií. Ke kí kooy wír wo wù kaʼ Nyùy e cu yee jeéyí kù dzə̀ ke kí kooy wír wo wù yòʼ kaʼà.

³ Á kinyo ke bi ke kí dzəə̀n é vinyò ve ví kooy e sar shùy fèn. Kpúu kù li wir dzə̀m. Fə̀m mo yí li, á lóo dzə atin, melív mev mè kù tíy a dzə̀ é yiì ye bií, a kwaʼtì yéví kù dzə̀ kiyúŋsì, kù bey, kù bey, e dù meé mo á lo, e kpukír.

⁴ Yii bèy, wìr lóo dzə a wù dzə̀ə́ e tin, wù kù yòʼ a tiír vifií fó mbìy, réŋréŋ mo á yii maʼ ŋgàn jii, «Jwi ye yì ŋeʼè kù dzəə́ kér kilíŋ, e shaà bvərə̀ʼ wo wù kpuun ne.»

⁵ Rúrú, wír ve á dzəə̀n atine kì ji á wíy kpu, a bó aŋkfəsàyi yòʼ kfə̀n kì kinyo kímóʼ kí gheéy. Áwune yòʼ kfə̀n dzəə́ kér vilaámé vímóʼ ví, a bó wìr yòʼ kfə̀n dzəə́ kuúme kinyo ke áwune‑eè yii.

⁶ Vinyo ve vé‑eè yii vi kù lày ne láyin. Fə̀m mo wíri‑iì koŋnìnè, bannìnè, siíme kinsiimè, vinyo vìn vi kù sèéy ne bèn ŋkuuŋkùŋ, a bó áwune yòʼ dzəə́ kér kilíŋ e kinyò kímóʼ kí ke á yii e sar shùy fèn.

⁷ Kí nén a dzə jii, kú a yi viyíkìr vé vi, a yu vijuŋ vi, a no meluʼ mè, é wúné wáa bòŋ wò, bìʼ fo kin ki dzə̀ kinyo ke Nyùy kù yenen ji dzə̀ à wàa yiì.

⁸ Kú a bvə̀tì vishí vé vi, a ŋwàŋkìr ghán sidzə̀m.

⁹ Á bvəʼ dzəʼə̀me vèn wiiy wò wo à wayin é shilív, a yu vijuŋ vishiíy vidzə̀m ve Nyùy foon ji à béʼrí é ndzə fèn, fə̀m mo dzəə̀n ndzə ye mvə̀m yòʼ dzəə̀n shó. Vijuŋ vìn vi kù dzə̀ ye yee mbìv ye Nyùy foon ji à wáa yu, kù mo à sorkìr e lìm ye à lim e sar shùy fèn.

¹⁰ Kifá kidzə̀m ke à yuun fó a lìm, à kù a lìm vèn à shilív shé shi shidzə̀m, a lìm, a kiíy jii, aàŋkfəə́ wòŋ fo à du, bó á yòʼ yii lim lim fo, a bó wìr yòʼ kfə̀n kwaʼtì kinyo fo, a bó wìr yòʼ kiiy kinyo fo, é bo wìr wáa ker vifií fó.

¹¹ M kfən kàʼày, e yèn kinyo kímóʼ kí é sar shùy fèn, a kí dzə̀ jii, kileʼ ki yòʼ dzə̀ə́ cáʼ a dzə̀ ké wìr wo wù nyéŋ e ŋàŋ, a bó yòʼ dzə̀ cáʼ ji a rə́r sí maʼà, kù tòn ntav wír, a bó viyíkìr vi yòʼ kù jòʼsì a dzə̀ áàfií, kìn ji vikuʼùy ví kù jòʼsì e wír ve á kiiy jeéyjeéy fó vinyòo, a bó á yòʼ géʼsin e wír ve á kiìn vinyóo jeéy. A dzə̀ vishí vi lo, ví bìr wír, a fə̀m dzə̀ la.

¹² Wìr yòʼ yii kiiy ghán se kinyo ki lo, e gbù. Mo lálán lo, wù koò sə́, kitám ki koò shinə́n, kù dzə̀ sá réŋréŋ mo kinyo ki lo, kí sàsìn, e gbù, e lì wír, a wù yòʼ kì kí.

Mo vifií ví tavin, à fo ví seeyin

¹³ M kfən lèéy vinyo veé sar shùy fèn, e yèn kimfìʼsìn kee kùm vifií kímóʼ kí, a kí bóŋ mo é ŋàŋ.

¹⁴ A kí dzə̀ jii, shintèʼ shímóʼ shí‑iì dzə̀, a shí kér wír ashàr. Kintav ke fòn wùmòʼ kí nèn wìy wìy, e gìŋ fó e rə́r sí, e bàʼrì vifá e wǔn kày yeé ŋkàlaʼ ji á kóʼ, e nə̀ə́, e tòn fó.

¹⁵ Kí‑iì kooy bèy, a ŋgaà kitàn woo fií wùmòʼ dzə̀ fó, wù kív dzə́ə e vifií və́ ví, la á yòʼ dzəə tòn fó. Yii bèy, fo bàm, la wìr yòʼ kfə̀n dzəə kuùmé wun gheéy.

¹⁶ M leéy bey, e yòŋ kém jii, «Fə̀m mo á yòʼ‑oò yén ŋgaà kitàn woo fií və̀n, wáy vifií e wun ntir, yii bèy, kee ji wìr fiír kí bòŋ, e shaà fo wìr wáa ker vitaáví.»

¹⁷ Kí bòŋ ji à yuúrí kinyo ke fiì suuy e jì yee weè, e shaà fó a yuurí shirəə́ she taà saʼ, a wù dzə́ e vé wòŋé mvəm, a dzə̀ viyúŋ.

¹⁸ Vifií ví bòŋ, e shaà vifá ve rər, yii bèy, wìr yúŋsi, jáy kinyo, kí bìvír vinyo vinín.