Ŋgaà Tàrvìnyò 8 - ŊWÀʼ NYÙY

¹ Dzə̀ la moo fií? Dzə̀ kìíy la móo toʼtí nsàv se vinyò? À yén fií, à kìíy fo wun vishi ve bvərkìn ví, à fo wun rər se sí kúvsinè.

Mo dzə̀ á wàa yunín fon

² M tír wò jii, «Kú a yu sáʼ fòne, bìʼ fo à yiin kilìʼ ji à wíy a yunín wun.

³ Lá à yòʼ lò fo fòn si, a bó à yoʼ sə̀ʼə́m kijuŋ. Baàmè kinyo ke kisaŋ ki, bìʼ fo dzə̀ fòn yiì kinyo ke wù koŋè e wò.

⁴ Jì fòn kér vitaáví. A dzə̀ wàa sòv la vinyo ve wù yii?

⁵ Wìr wo wù yúnin sáʼ yeé ntoʼ, yòʼ dzə̀ wù kfə̀n nə̀ə́ e ŋgeʼ. Wìr wo wù kér vifií kù kì ghán sée yiì kinyo, e kìíy dzə́ə yee réŋ yée yiì sho.»

⁶ Kinyo kidzə̀m ki kù kér ghán sə́, kér dzə́ə ye á yii sho, a dzəʼə̀m wìri fə̀m tàv moó le.

⁷ Wìr yòʼ kì kibvəə́shí, a bó wìr yòʼ dzə̀ shó wo dzə̀ wù sùúy kinyo ke kí wíy koóy wun.

⁸ Wìr yòʼ kér vitaáví vée siìr kiyoy ke wìr e bàm, kìn vitaáví vée kuvsín kishiíy kfə́ ké kpu. Wìr lóo dzə e shùu rər, bo bó yòʼ dzə̀ wù kfə̀n fó laʼ, kù dzə̀ sá réŋréŋ mo bó yòʼ dzə̀ ŋgaà yiì ye bií lì kinyo ke bi kí, e tìn kitú kfə́ shó.

Dzəʼə̀m wìr ve á méŋ Nyùy wùn à ve á yú wune

⁹ M kàʼày vinyo ve ví kooy e sar shùy fèn vidzə̀m, a wíri lo, á wàa taa aámóʼó kitu, a nyàvrì aáwune.

¹⁰ Rúrú, m yèn ne fo á dzəəmè wír ve bií wùn à ghvə́me, a kù dzə̀ áwune vin ve vé‑eè shiiy shiìyín é lav cù, a wíri kù búri áwune búrín é ntèʼ fo vé‑eè buʼtì vinyo. Kee shooy ki kù dzə̀ sá kisáŋ ke kinyò.

¹¹ Mo bó á yòʼ táv maʼ ŋgeʼ e vé yiì ye bií kitu, wíri nen kù shaà fo mbìy e yii ye bií.

¹² A fə̀m dzə̀ mo wìr buʼtì vinyo e ŋàŋ, kù shiiy, kóŋri, yii bèy, bo m kì kém ji ké wìr ve á yúnin Nyùy, néŋ e wun si ki wíy bòŋ, e shaà kév.

¹³ Ké wìr ve á méŋ Nyùy ki dzə̀ jii, bó yòʼ dzə̀ féyì vinyo vév ví wàa dù kijuŋ. Dzəʼə̀m yéví kù dzə̀ ji kindzə̀ə́ndzəm. Áwune yòʼ yíi ndzə̀ytì, bìʼ fo á yòʼ yúnin Nyùy.

¹⁴ Ku yèn búʼú kinyo ke kisaŋ kímóʼ kí ke kí lo, kí wàa koóy e sar shùy ki. Á li kinyo ke juŋ ke á kì yíi yiì a dzə̀ e wìr wo wù yú Nyùy, á yiì a dzə̀ e wo wù méŋ Nyùy, li ke á kì yíi yiì e wo wù méŋ Nyùy, á yiì a dzə̀ e wo wù yú Nyùy. A dzə̀ á wàa suúy jii, «Kidzə̀m ki kù dzə̀ kinyo kisáŋ.»

¹⁵ A m shu kém ji kí bòŋ é wìr wáa yu vijuŋ və́ vé dzə̀ʼə̀m, bìʼ fo kifá ke kí bòŋèn é sar shùy fèn, e shaà ji wìr wáa yi, a no, a yu vijuŋ ki yòʼ dzə̀. Á kinyo ke a dzə̀ kí tòm wír e mvə̀m kàtìr ye wù katìrì, a wù béʼri vishiíy ve Nyùy foon e wun e nsay fèn.

¹⁶ M lò, e wày féyì, e kàʼày ji mo‑óò kiíy vifií, e kiíy ntàʼtìn wo wù shaa e kitu ke nsay wo wìr gísin sho, shiiy là mbuùné.

¹⁷ M leéy lim ye Nyùy lim e dzə̀m, e yèn ji bó yòʼ dzə̀ wìr kìíy mo kinyo keé sar shùy fèn ki dzəə̀n. A kòŋ wìr shoòshí ji wun kiíy é le, bo bó yòʼ dzə̀ féyì wù kìíy. A fiì fə̀m lò, a tàr ji wun kiíy é le, bo bó yòʼ dzə̀ wù kìíy.