Ŋgaà Tàrvìnyò 5 - ŊWÀʼ NYÙY

Wìr kú a rə̀tì, a fàn Nyùy

¹ À lóo nəə́ e lav cù, à wàa səʼə́m, a dzə kibáʼtín móo yunín. Kee shooy ki bòŋ, e shaà cu ye viyúŋ ví yii, aá yòʼ fə̀m kì ji á yii a dzə̀ á kinyo kee kintéŋ.

² À lóo suŋnín, à rə̀tì kijuŋ. Lá shilív shí yòʼ a buʼ wò ji à ku sùúy kinyo e Nyùy, bìʼ fo Nyùy dzəə̀n é yuv, aà dzə̀ ké e nsay. Lá à yòʼ a kàʼ kinyo ke à yòʼ yíi yiì.

³ Wìr lóo yaŋyáŋ e ŋàŋ, njèm se bi sí wàa shi wun, lóo suŋnín e ŋàŋ, wù wàa suŋnín kiyúŋ kiyúŋ.

⁴ Aà kàʼ Nyùy, à kù mùm ji à yii kinyo ke à kàʼàn. Nyùy yòʼ yii yú vijuŋ ve wìr wo wù yúŋsi, kaʼ kinyo kisáŋ. À kaʼ ŋkàʼmé, à yiì kíwun.

⁵ Kí bòŋ ji lá à yòʼ kàʼ ŋkàʼmé, e shaà fóo kàʼ, e làa yòʼ yiì.

⁶ Lá à yòʼ biìmé ji shuu wóo yii, áà jáy kinyo, fo à yiì lò, a tunrí e ŋgaà lìm Nyùy ji à kì jày jáyín, e bóo kàʼ. Kí yoʼ ghèén é shuu wóo yii, é Nyùy shwiíy kilòŋ, e bìvír kifá kidzə̀m ke à lìmèn.

⁷ A wìr lò, a yaŋrí ji wun ku yiì kinyo mo shí njèm wun, e nèn lò, a suŋnín, a tonén, bo wù yíi fəə́r kinyo kee kisáŋ. Wìr kú a rə̀tì, a fàn Nyùy.

Bùʼ yòʼ dzə̀ kifá ke kí tíytiyì

⁸ Aà yèn, a vé saʼa nyavrì aàghéʼnceyí, tén fó a tinén kinyo kév é nsànloŋ, kù shwiv áwune shwívin, lá kí yòʼ a ma shuu wó, bìʼ fo wìr wo kuʼùn lóo dzə, wùmòʼ kù a dzə wo wù kùʼùn, e shaà wun, wo wù kiʼ kifá fo wun. Aámóʼó kfə̀n dzə̀ə́ ve á kùʼkìn áàntaʼ, aá kiʼ sa vee shooy.

⁹ Adzə̀me kù taʼ ji á koóy á séʼ wo wù fəə́ fo wòŋ, a fòn kitú kfə́ kù kooy sa séʼ a dzə̀ bìʼ nsay ye á limè.

¹⁰ Wìr lóo ker shií é mbàm e ŋàŋ, la mbàm si yòʼ a gheén wun, a kù dzə̀ sá réŋréŋ mo wìr lóo kòŋ vikuʼùy, la kifá ke kí nəə wun ki yòʼ fə̀m a gheén wun. Kin ki kù dzə̀ sá kinyo kisáŋ.

¹¹ Mo vifá vi kuʼù, bo kù dzə̀ réŋréŋ mo vé yii kuʼù. Bo seʼ ŋgaà vifa dzə̀ ka, e shaà ji wù kú a yen vifá vee shooy yénén?

¹² Kìn wánlè lìm yíkir shishàr, kìn wú yíkir e ŋàŋ, bo wù kù yíi buuné, é yim shinə́n wun. Yii bèy, a vikuʼùy vé ŋgaà bùʼ vi yòʼ biíme ji wù bóŋ shimbuùné.

¹³ M lèéy, e yèn kinyo ke bi kímóʼ kí ke kí kooy e sar shùy fèn, a kí dzə̀ jii, ŋgaà mbàm lo, wù wàa bonén, a lèm mbàm sə́, a sí lo, e nèn fo wun a dzə̀ nyár.

¹⁴ Vishí vi bír wun, kávi mày. A wù kér wán, la wù yòʼ kfə̀n a ker vitsə́ʼ vée màʼtì sho.

¹⁵ Kù dzə̀ jii, wìr fəə́ fo yè wóv bvə̀m, a wù yòʼ kér kifá, a wù wíy lòo kpu, e làa yòʼ lì kifá. Wù yòʼ wíy lì kifá fo vifa ve wù‑uù ndzə̀ʼnìn, e kàv.

¹⁶ Kin ki dzə̀ kinyo ke biibí kí féyì, bìʼ fo dzəə̀ ye wìr‑iì wìyìn shó e nsay fèn, kù dzə̀ yìwun ye wù wíy kfən sho. Bo seʼ sòrkìr ye wìr sorkìrìi dzə̀ ka, a wù jum a dzə̀ shwér.

¹⁷ Wù kù sí dzə́, a ndzə sə́n e wun kitu, shwiiy kilòŋ é ŋàŋ, yú nyár, a tímé kù ndzə́ʼ wun ndzə́ʼə́n.

¹⁸ Ke m yenen kém kí dzə̀ jii, kí bòŋ ji wìr wáa yinín, e kfə̀n a nonín, a yu vijuŋ ve lìm rə́ ye wù lìmèn é sar shùy fèn, e kù a yu bèy, e bǎm vishiíy vee vishàr ve Nyùy lèmèn wun sho, bìʼ fo kee shooy ki dzə̀ və́ vee vilaámé ve Nyùy foon.

¹⁹ A Nyùy fò wír káv, e fò wun bùʼ, e yiì ji wù wáa yu vijuŋ ve vifa vìn, a yu sa vé lìm rə́, bòŋ é wù wáa yu, bìʼ fo kee shooy ki dzəə̀n fómo Nyùy.

²⁰ Nyùy yii, wìr lóo yu vijuŋ, la wù yòʼ dzə́ə a leéy dzəʼə̀m rə́, a rə̀m ntéŋ, bìʼ fo Nyùy yiìn ne, vijuŋ vi rún e wun shiliv.