Ŋgaà Tàrvìnyò 3 - ŊWÀʼ NYÙY

Kù lèm Nyùy ghán sé kinyò kidzə̀m

¹ Á bèy, kinyo kidzə̀m ki kù kér ghán sə́, a kifá kidzə̀m ke vèsən yii ki kù kér ghán sə́ se gheenén sí.

² Ghán se á dzəə wír si dzə̀, a sé kpu si dzə̀. Ghán se á wáy vifá si dzə̀, a sé kav si dzə̀.

³ Ghán se á yúyri wír si dzə̀, a se á fer si dzə̀. Ghán se á saʼtì si dzə̀, a se á baʼrì si dzə̀.

⁴ Ghán sé toŋ si dzə̀, a sé sheʼ si dzə̀. Ghán sé dìy si dzə̀, a sé kidzən si dzə̀.

⁵ Ghán sée taʼár tíy sí dzə̀, a sée baʼtí si dzə̀. Ghán se wìr baámé wír si dzə̀, a sée màʼtì si dzə̀.

⁶ Ghán se á taʼ kifá ke kí làyìn sí dzə̀, a sée yàr si dzə̀. Ghán see lèm kifá si dzə̀, a sée màʼày si dzə̀.

⁷ Ghán sée sàʼtì ndzə̀y sí dzə̀, a sée tsəmrí si dzə̀. Ghán sée gòʼ kisə́sə si dzə̀, a sé kisuŋnìn si dzə̀.

⁸ Ghán sé a kòŋnìn si dzə̀, a sé a bànnìn si dzə̀. Ghán sé rər sí dzə̀, a sé kiman si dzə̀.

⁹ Séʼ wo a dzə̀ wìr kòóy fó lìm ye wù lìmèn dzə̀ ka?

¹⁰ M tàr ne, e yèn lim ye Nyùy foon e wìr msòŋ ji wù wáa lìm.

¹¹ Kinyo kidzə̀m ki kù dzə̀ ben, a Nyùy yiì ne, kí wáa dzə kijuŋ e ghan se gheenén sí. Wù kfən yiì, wìr msòŋ wáa ker kwaʼtì kùm vinyo ve ví dzə̀ə́ fo mbìy. Yii bèy, a bó yòʼ dzə̀ wìr kìíy mo lím Nyùyi dzəə̀n, e kèʼ fo kèʼ, e du, e jòʼsì.

¹² M kì féyì jii, kinyo ke kí bòŋèn, e shaà ji wìr wáa sheʼrí, a yu vijuŋ e vishiíy ve wù béʼri e nsay fèn ki yòʼ dzə̀.

¹³ Kí kfə́n a dzə kijuŋ ji wìr dzə̀m kú a yinín, a nonín, a yu vijuŋ ve lìm ye wù lìmèn, bìʼ fo kù dzəə̀n fómo Nyùy.

¹⁴ Rúrú, m kì ji lim ye Nyùy lìmèn é ndzə e dzə̀me kù wíy a tiy fo, e dù, e jòʼsì, a bó yòʼ dzə̀ wìr dzə̀sì kifá sho, a bó yòʼ dzə̀ wù shòʼ. Nyùy yii vinyo vìn bèn ji wíri wáa yen, a ghvəm wun.

¹⁵ Ke kí dzəə̀n kí kù dzə̀ ke kí‑iì siìn, a ke kí dzəə́ wìy a dzə ki kù dzə̀ ke kí‑iì kooyin ne. Kù dzə̀ bey, bìʼ fo Nyùy yii ji vinyo vi wáa koóy a kù dzə̀ mo ví‑iì kooyin ne.

Sáʼ yee là kiloʼo dzə̀ á?

¹⁶ Kímóʼ kí jii, m lèéy kinyo ke kí kooy e sar shùy fèn, e yèn a kiloʼ ki lí ne kilíŋ ke kinyò ke ru kí, liì kisaŋ lí ké kinyò ke réŋ kí.

¹⁷ M nén a ghay wún jii, «Nyùy kù wíy tinén nsaʼ wìr dzə̀m, ve á yú wun, à ve á méŋ wune. Wù lèm ne ghán sé vinyò vidzə̀m, e lèm ghán se wù wíy yiì lim rə́.»

¹⁸ M nen yèn jii, fo késən kee wir msòŋ kí, Nyùy kù mumrì vèsən múmrin, aá fiʼ kìíy ji a kì jòʼsì ji vèsən, bo á yòʼ dzə̀ jeéy fo nyám si.

¹⁹ Kinyo ke kí kooy wír ki kù dzə̀ ke kí kooy nyám. Mo wìr kpú, kù dzə̀ sá mo nyàm kpú, à wìr, à nyàm, á kù yoy kiyoy kee shó kimòʼón, e bó a kpukír réŋréŋ. A dzə̀ á yèn ji kee shooy ki kù dzə̀ sá kisáŋ.

²⁰ À wìr, à nyàm, kidzə̀m ki kù dzə̀ nyam nsay. Wìr dzə̀m‑eè lò fó nsay, a wìr dzə̀m kù wíy kfən e nsay.

²¹ Dzə̀ la wo a dzə̀ wù kìíy rúrú ji kiyoy ke wìr ki du e yuv, a ké nyàm ki goʼ e nsay?

²² Á bèy, m nen yèn kém jii, kinyo ke kí bòŋèn, e shaà kee ji wìr wáa yu vijuŋ ve lìm rə́ kí yòʼ dzə̀. Kee shooy ki kù dzə̀ vilaámé və́ bey. Bó wìr yòʼ kì kinyo ke wìr yíi kpu, é kí wáa dzə fo mbìy.