Ŋgaà Tàrvìnyò 2 - ŊWÀʼ NYÙY

Bùʼ wo wìr báʼti kù dzə̀ lím kisaŋe

¹ M kù kér e mǒ kwàʼtì jii, «Ké lèn ki m kù‑úù mum á vijuŋ, e yèn ó ji sà bòŋ ka shó a?» Rúrú, m múm, e yèn ji vijuŋ vi kù dzə̀ sá bèn, a dzə̀ kifá kisáŋ.

² M yén ji a wìr jum a dzə̀ kishéʼrì, bo kee shooy ki dzə̀ kiyúŋsì. A dzə̀ ji wìr kú a yi a dzə̀ kitú, kí fə̀ə́r ka?

³ Mò‑oò wày vifií é melùʼ me noón mè, e dù e kiyuŋ. Nó bèy, yén ji m dzəsì a vifií dzə́sin. Mò‑oò taʼ, e yen ji sà dzə̀ ŋkeŋ ye juŋ ye dzə̀ wìr wàa jùm e vishiíy ve wù béʼri e nsay fèn a?

⁴ M kfə̀n‑eè bàʼrì lav sém, e mvə̀ʼtì súm sé vitiír vé *vayin. Wíri kiíy mo adzə̀m bìʼ lim se ghaʼtín se mò‑oò lìmèn.

⁵ M lím kiboó kém, e bìy kfəə́ se vici se sí koom sho sidzə̀m,

⁶ e tùŋ bií wóm mendzə̀v wó a setí mendzə́v fó fo, a wayrí e vici ve m bìyìn.

⁷ M kfən yùn vé lìm vee vikìy wùn à vee vilume, e kfə̀n a ker vé lìm ve á dzəən a dzə̀ e mǒ laʼ, a m kfə̀n kér sa nyám si wùn à bvə́y si, é ŋgoo sí ŋgoo si, e shaà afon adzə̀m ve vé‑eè saʼan ne Jerusalem, é bo m wìy a dzə.

⁸ M kfən bàʼtí visha vém vé mbàm, ve fəvír ví wùn à ve baar ví, aàfon wùn à vé saʼa kù fó nshwì a dzə̀ e mò. M báʼtí vé yòv vee vilum wùn à vee vikìyí, e kfə̀n a ker vikìy ve ceméné agháʼán ve á yii, a m yú vijuŋ ve a fə̀m kì dzə̀ la, wù kù a yu.

⁹ Á bèy, m nén a dzə wír wo kuʼùn, e shaà afon adzə̀m ve vé‑eè saʼan ne e Jerusalem, é bo m wìy a dzə, a vifií vém ví kúy ne.

¹⁰ M kù‑uù keèrí kifá kidzə̀m ke mò‑oò kér shií shó. M yòʼ‑oò lo tèn fó a yu vijuŋ ve kifa kímóʼ kí gheéy. Rúrú, mò‑oò túy shwín bìʼ lim ye mò‑oò lìmèn, kiiy ji vijuŋ ve mò‑oò yú vi kù‑uù sì vilaámé vé lìm ye mò‑oò gisin, e lìm.

¹¹ Yii bèy, m ló, e sə̀ʼə́m, e lèéy lim se mò‑oò lìmèn e wó yémé sidzə̀m, e lèéy vitaáví ve mò‑oò wayin shó, e yèn ji kù dzə̀ á kifá kisáŋ. Kù dzə̀ ntàʼtìn kisaŋ moo wír wo wù mum ji wun bám shwér, a bó ndzə̀né yòʼ dzə̀ é kinyò ke wìr katìr, yii e sar shùy.

Ŋgaà vifiì wùn ŋgaà kiyuŋsì kù joʼsì réŋréŋ

¹² M ló, e sə̀ʼə́m, e kàʼày kinyo kee kùm vifií, e kàʼày ké kijìŋ wùn à kiyúŋsì ki, a ghay ji a dzə̀ wír, a wù wíy yi vifon, wù kfə̀n yiì ka, e shaà ke vé‑eè yiìn ne.

¹³ M káʼáy, e yèn jii, vifií ví bòŋ, e shaà kiyúŋsì, réŋréŋ mo ráné bòŋèn, e shaà ndzə ye sənér.

¹⁴ Fiì yii kiiy fo wù du, a kiyúŋ kí ghán, fəy fə̀yìn é mvə̀m ndzə ye sənér. Yii bèy, a kinjòʼsì kév kidzə̀m ki kù dzə̀ kpú.

¹⁵ Á bèy, m nen kù kwàʼtì jii, «Mo kpú ye yí li kiyúŋé kù li sa mo, bo shií wo mò‑oò dzəə̀n fií dzə̀ wo gha?» M tár, e yèn ji kinyo kìn kidzə̀m ki kù dzə̀ sá lím kisaŋe.

¹⁶ Bó á yòʼ yii kuúme fií, kìn kiyúŋ du, joʼsì, réŋréŋ mo á yòʼ yii kuúme sa kiyúŋ. Bìʼ fo, mo ghán si du, dzə̀ mo á laysìn áwune adzə̀m. Kpúu kù yíi lì fií réŋréŋ mo yí li kiyúŋ.

¹⁷ Bìʼ bey, m nen ŋwày dzəʼə̀m bìʼ fo lim e dzə̀m ye á lim e sar shùy fène yii, a m yú nyár. A vidzə̀m vi kù dzə̀ kisáŋ fo kisáŋ ki. A dzə̀ mo wìr wáa mùm ji wun bám shwér.

Kéŋ ye wìr gisin, e kèŋé kù dzə̀ lím kisaŋe

¹⁸ M yòʼ‑oò dzəə́ kér shií é kifa ke mò‑oò gisin, e kèŋ é sar shùy fèn, bìʼ fo mò‑oò kiiyin ne ji m wíy màʼtì kéŋ yee shooy e njìlaʼ wom.

¹⁹ Dzə̀ kìíy la mo wù wíy a dzə? Kìn wù wíy a dzə fií, kìn kiyúŋ. Kù sí wìy yòv wun kéŋ yém ye mò‑oò wayin vifií, e gìsín, e kèŋ é nsay fèn. Kin ki kù dzə̀ sá lím kisaŋe.

²⁰ Bìʼ bey, m nen bùú shií, e fə̀ə́r shilív shém fó kifa kidzə̀m ke mò‑oò keŋen é sar shùy fèn.

²¹ Wìr lim lim e vifií və́ ví wùn à kiíy rəə́ kijuujùŋ, wù kù màʼtì a dzə̀ e wìr wo bó wù yòʼ‑oò lo ndzə̀ʼnìn sho. Kin ki kù dzə̀ lím kisaŋe, a dzə̀ kinyo ke biibí kí féyì.

²² Rúrú, ké wìr ki dzə̀ ka lèn fo lìm ye wù ndzəʼnìn, lim e sar shùy fèn?

²³ Wù kù sí yú a dzə̀ nyár kishiíy ké ndzə kidzə̀m. Lim rəə́ tínsin wun tínsín, fə̀m vitsə́ʼə́, bó wù yòʼ kér meemè. Kin ki kù dzə̀ kinyo kisáŋ.

²⁴ M yén ji kinyo ke juŋ ke a dzə̀ wìr yiì kí yòʼ dzə̀, e shaà ji wù wáa yi, a no, e kfə̀n a yu vijuŋ ve lìm rə́. A m yén ji kù dzə̀ á fómo Nyùy bèn.

²⁵ A là bìʼ Nyùy, wàa yi la ka, e bó a yu vijuŋ sho?

²⁶ Nyùy yii fó vifií, fó kiíy wùn à vijuŋ vi e wìr wo wù yú wun. Yii bèy, lóo dzə wír wo wù ŋwáy wun, Nyùy nèn fò kfə́ ji wù wáa gisín, a baʼtí bùʼ, é ku yiì yòv wír wo wù yú Nyùy. Kin ki kù dzə̀ sá lím kisaŋe, a dzə̀ moo wír wo wù mum ji wun bám shwér.