Ŋgaà Tàrvìnyò 1 - ŊWÀʼ NYÙY

Dzəʼə̀me kù dzə̀ kifá kisáŋ

¹ Vinyo veé ŋwàʼ fèn vi dzə̀ ve Ŋgaà Tàrvìnyò woo wan Davir‑iì yòŋèn, a wù‑uù dzə̀ fon e Jerusalem.

² Ŋgaà Tàrvìnyò‑oò yòŋ ji ke a dzə̀ wìr wàa suúy ki dzə̀ á jii: «Kisáŋ fo kisáŋ ki, kinyo kidzə̀m ki kù dzə̀ kisáŋ.»

³ Lim ye wìr tur, lim e sar shùy fèn e dzə̀m, yí wíy fo séʼ e wun a dzə̀ ka?

⁴ Ŋgwàʼ kúy shaa, yìmòʼ kòʼ, a ndzə kù tíy fo mo yì‑iì dzəə̀n.

⁵ Shùy tó, yì nə̀ə́, e kfə̀n fo yì yii tó ji lèév.

⁶ Shwéri shaa, du e mbìv yee tsə́n, wú kàrìr, e kfə̀n é mbìv yee kuy. Wú lo, wú nèn kù a kar bèy, kárí, wú kfə̀n é bàm fo wú kì kèʼèn.

⁷ Ndzə́v sidzə̀m si kù léŋ, nəə e rìbà ndzə̀v, yii bèy, a bó wù yòʼ rúné. Kirə́ʼ ke ndzə́ví fəə́ fo fo, kù dzə̀ fo yí kfə́né.

⁸ Vinyo vidzə̀m vi kù ghán mo ví yii gháné. A bó yòʼ dzə̀ wìr yù fóo ŋeèvì, e fèr, a bó yòʼ dzə̀ síi yèn virə́ʼ, e rùn, a bó yòʼ dzə̀ vituʼùr ví yuùrí vinyo, e kùr.

⁹ Ké kí‑iì siìn kí dzə̀ ke kí wíy a dzə, a ke vé‑eè yiìn ne ki dzə̀ ke á dzəə́ wìy yiì, a kinyo ke fíy ki yòʼ dzə̀ é ndzə fèn.

¹⁰ Kinyo ki dzə̀ shó ke a dzə̀ wìr sùúy ji kin ki dzə̀ ke fíy ki á? Bo kí kù‑uù sì fó yàŋgùʼ, é bo á wìy a dzəə́ vèsən.

¹¹ Wìr yòʼ kfə̀n yii kuúme ŋgwàʼ ye yì‑iì shaàn ne, a bó ŋgwàʼ ye yì kóʼó yòʼ wíy a kuumé ye yì‑iì siìn aáwuné mbìy.

Vifií vee tàʼ é ŋàŋ ví dzə̀ lím kisaŋe

¹² Mo woo Ŋgaà Tàrvìnyò, m kù‑uù sì fon woó Isray e Jerusalem.

¹³ M nen wày gháŋ ji m bónén, e wày vifií, e tàr vinyo ve á yii e ndzə fèn vidzə̀m. M tár, e yèn, a dzəʼə̀m ye Nyùy foon e wíri rə́ne dzə̀, a yí tàrír feyì.

¹⁴ M lèéy ne vinyo vidzə̀m ve wíri yii e sar shùy fèn, e yèn rúrú, a dzə̀ kifá kisáŋ feyì. Kù dzə̀ lím kisaŋe réŋréŋ moo wír wo wù mum ji wun bám shwér.

¹⁵ Yòʼ dzə̀ á naàrì kifá ke kí goomen ne, a bó yòʼ dzə̀ á tàŋ kifá, a bó kí yòʼ dzə̀.

¹⁶ M kù kér e mǒ kwàʼtì jii, «Vifií vém ví kùy ne, e shaà vé afòn ve vé‑eè saʼan ne Jerusalem, é bo m wìy yì vifon. A m keèrí ne vifií é ŋàŋ, e kfə̀n kìíy jeéyjeéy fó vinyò.»

¹⁷ Á bèy, m nen wày gháŋ ji m kiíy kinyo ke dzəə̀n vifií, a kiíy ke dzəə̀n kijiŋ wùn à kiyúŋsì ki. M káʼáy, e yèn a kù dzə̀ lím kisaŋe moo wír wo wù wáa mùm ji wun bám shwér.

¹⁸ Mo à kiiy e ŋàŋ, dzə̀ mo kí yíi a tinsín wò. Mo à kiiy jeéyjeéy fó kinyò, dzə̀ mo kí dzəsì nyár.