Nehemia 8 - ŊWÀʼ NYÙY

¹ Wìr dzə̀m nèn wìy e Jerusalem, e bàʼtí e maàndzə yeé Shùu Kày woó Dzəə̀ Ndzə̀v ji wír amòʼón. Á nèn sùúy e Esra woo ŋgaà dùŋrì ji wù wiy á e Ŋwàʼ Nsər wo Nyùy Tàr‑iì foon e wír veé Israyi, e shaà fo Mooser.

² Esra wo kfə̀n‑eè dzəə̀n taà cù ku nèn tàʼ Ŋwàʼ Nsər, e wìy sho e màŋgòŋ si, a kù‑uù dzə̀ vilum wùn à vikìy, à wàʼbìn wo yì‑iì dzə̀ wù yù kinyo, e lèm. A kishiíy kin ki kù‑uù dzə̀ ké mbìy ki e ŋwee wo wú meen ji saàmbà.

³ Wù wìy sho, e fəə̀, e tìím, a kìʼ maàndzə yeé Shùu Kày woó Dzəə̀ Ndzə̀v, a yòŋ, e kèʼ fo kijàvndzə, e dù, e bàʼ e ntìntìn shùy, a vilum wùn à vikìy, à wàʼbìn wo yì‑iì dzə̀ wù yù kinyo e lèm tíy, yuúri. Wìr dzə̀m‑eè yuúri vinyo veé Ŋwàʼ Nsər vìn kijuujùŋ.

⁴ A kí‑iì dzə̀ jii, Esra woo ŋgaà dùŋrì‑iì kòʼ, e tìím e kitaàtì ke vé‑eè fèrìn e vicí ví bìʼ ŋkàʼ vən, wír ámóʼó wáa tiy e wun ghaŋ. Ve vé‑eè tíy e wun koy yìyí‑iì dzə̀ jii, Mattitia wùn à Shema, à Anayia, à Uria, à Hilkia, e lì Ma‑Aseyia. Veé koy ŋkoòvìi wáa dzə jii, Pedayia wùn à Mishael, à Malkija, à Hashum, à Hashbaddana, à Sekariya, e lì Meshullam.

⁵ Mo Esra koʼon fó bèy, a wìr dzə̀m yén wun, wù nèn mvə̀ʼ ŋwàʼ. Mo wù mvə̀ʼə̀n, wíri ku nèn nànèn, a tiy e yuv.

⁶ Wù nèn yòŋ jii, «Á wáa burí Nyùy Tàr, woo Nyùy wo kuʼùn.» Wìr dzə̀m nèn nàn wó e yuv, e bìnsí jii, *Amen, Amen, Amen, e nèn gvə̀ʼtí, e làʼ kitú e nsay, e ghvə̀m Nyùy.

⁷ Áwune kú a tiy fo vé‑eè tíyí, a yuurí Ŋwàʼ Nsər, wír veé ram Levìi wáa sə áwune, a toʼtí nsàv, á wáa yu kijuŋ. A wír vìne‑eè dzə̀ Jeshua wùn à Bani, à Sherebia, à Jamin, à Akkuv, à Shabbetay, à Hodia, à Ma‑Aseyia, à Kelita, à Asaria, à Josabad, à Hanan, e lì Pelayia.

⁸ Vé‑eè yoŋ vinyo fo Ŋwàʼ Nsər Nyùy və̀n, tóʼti kfə̀n sánri e làm wo dzə̀ wíri wàa yu, a kiíy kijuujùŋ.

⁹ Wìr dzə̀m yú vinyo veé Ŋwàʼ Nsər, e nèn lò, a toŋnín toŋnín. Taà saʼ woo Nehemia wùn à taà cù woo Esra wo kfə̀n dzəə̀n ŋgaà dùŋrì, à wír veé ram Levi ve vé‑eè yéʼey wírií nèn a suúy e wìr dzə̀m jii, «Lá vèn dzə́ə a dìy, lá vèn dzə́ə a toŋ. Lán dzə̀ kishiíy ké Nyùy Tàr woo Nyùy won, kee jeéy kí.

¹⁰ A dzə̀ lèn vèn dù, a yikír, a no vifá ve nyomèn ví, a fo vímóʼ ví e wír ve bó á yòʼ kéríi. Dzə̀ kishiíy ké Nyùy Tàr kee jeéy kí. Lá vèn yòʼ dzə́ə a dzə e nsòv. Kishéʼrì ke Nyùy Tàr kí ku tàvír ven.»

¹¹ Wír veé ram Levìi ku nèn a səmér wir dzə̀m, a suúy jii, «Vèn sə́sín, lán dzə̀ kishiíy kee jeéy kí, lá wìr dzə́ə a sòv kitú.»

¹² Wìr dzə̀m nèn dù, a yikír, a nonín, a fo vímóʼ ví e wíri. Wìr dzə̀m‑eè yù vijuŋ mo vé‑eè sanrin ŋwàʼ və̀n, áwune yú kijuŋ.

Ŋkǎʼ Tàv sé Ghan

¹³ Wáa dzə e kishiíy ke kí‑iì batin, atǎr kfəə adzə̀m wùn aàtàá cùu, à wír veé ram Levìi nèn dù, e bàʼtí e Esra woo ŋgaà dùŋrì ghaŋ, wùn áwune wáa yeʼéy vinyo veé Ŋwàʼ Nsər.

¹⁴ Áwune nèn lò, e yèn ji á sàŋ á e Ŋwàʼ Nsər wo Nyùy Tàr‑iì foon e shaà fo Mooser a jii, wíy lóo dzə e ghan sé ŋkàʼ wo á yii e ŋwee woo saàmbà, áwune wàa shiíy a dzə̀ á e tàv sí.

¹⁵ Áwune samer, e fò á sáʼ aáwuné ntèʼ sí wùn ǎ Jerusalem e dzə̀m a ji wìr dzə̀m dukir áàgwan, e wìy a e tám se vici vé *oliv wùn à sé oliv kòv sí, à sé *mirtel si, à viyáŋ ve ten ví, e lì tám se vici ve rəŋsìn ví, aá fer táv sí shó mo kí dzəə̀n á kisáŋén.

¹⁶ Á bèy, wíri ku nèn fəə̀, e dù, e wìy e vifá vee shooy vi, e fèr táv sév shó. Aámóʼó fer sév aáwuné vitu ve lav, ámóʼó aáwuné maàndzə, ámóʼó é maàndzə yeé lav cù, ámóʼó é maàndzə yeé Shùu Kày woó Dzəə̀ Ndzə̀v, aámóʼó fer sév é maàndzə yeé Shùu Kày Efrayim.

¹⁷ Màŋgòŋ e dzə̀m wo wù‑uù kfənen é bàm fo vé‑eè koon áwune, e dù sho‑oò fèr táv sí, a dzə sho, a sheʼrí e ŋàŋén. Wír veé Israyi yòʼ‑oò yiì yì ŋkàʼ vən e dzəə foo fèy, e kèʼ fo Joshua woo wan Nun ghan, e wìy, e meé e ghan fen.

¹⁸ Áwune‑eè yiì ŋkàʼ vən kishiíy saàmbà. A kishiíy kidzə̀m, e kèʼ fo kishiíy ké mbìy ki, e dù, e bàʼ e ké bàm kí, Esra kù‑uù yoŋ kinyo fo Ŋwàʼ Nsər Nyùy. Lòo meé e kee waamé kí, màŋgòŋ nèn bàʼtí mo nsər‑iì suuyì, e maàr.