Nehemia 6 - ŊWÀʼ NYÙY

Vé vibàné mum ji á səə́r lim

¹ Á nèn lò, e duù e Sanballat wùn à Tobia, à Geshem woo wir Arab, à kibér ke aŋgaà vér vibàné ji m bàʼrì ne a kay, a bó shintoʼòn shi yoʼ waà dzəə bèr, aá yoŋ bèy, a bó m yóʼ ne fə̀m wàyrí visəŋ e shuù si.

² Sanballat wùn Geshem yú kinyo kìn, e nèn tsə̀nsí ntum ji m wiy, é vèr áwune tár á e ntèʼ yìmòʼ fó ntèʼ seé mboʼ yeé Ono. Yii bèy, aáwune‑eè taʼ a dzə̀ dzə́ə yée sèn mo shó.

³ M nèn tsə̀nsí ntum aáwune ji m yíi a lim e kuʼùn, a bó yòʼ dzə̀ á m sə̀y. A sà dzə̀ m yèe, e bóo màʼtì, é lime tiím ji m sə́y, e yen áwune á?

⁴ Áwune‑eè tsə̀nsí ntum rə̀n e mò, e dù, e meé wuú e kweè, a m kù fó binèr a dzə̀ yíwun.

⁵ Kí wáa meé ji wuú e tàn, Sanballat nèn tsə̀nsí a dzə̀ wir lìm və e ŋwàʼa, a wú dzə̀ e rə́,

⁶ aá sáŋ jii: «Kí sì kikiíyín e vitúm ví mvəm, a Geshem sheŋrì ji dzə̀ á rú, vèn à wír veé Judàa taʼ e sə sáʼ. Á shií wo vèn baʼrì kay. Kí din ji à taʼ e yiì a dzə a fon wov.

⁷ Aà kfə̀n lèmrì ne aŋgàa ntum, á wáa fìʼtì kinyo ké e Jerusalem ji fòn sì á e Juda, aá sí lo, e naàrì kinyo kìn e fòn. Bo bòŋ ji à wiy, é vèsən tátí, e tàŋ mo dzə̀ kí wàa dzə.»

⁸ M nèn tsə̀nsí binèr sho jii, «Kinyo ke à naàrìn kin ki yòʼ dzə̀ é kirə̀ʼ. Dzə̀ kinyo, a kwàʼtì wò, a yòŋ.

⁹ Áwune‑eè taʼ e bemér ver bémérín, kér e kwàʼtì ji wó yérí lo, e weèy fo lìm fèn, é yí tiím. Yii bèy, kí ku nèn tàvír mo távírín.»

¹⁰ Wáa dzə e ghan símóʼ sí, m dù ji m yén á Shemayia wo vé‑eè sə̀rìn wun e laʼ, a Shemayia və̀n‑eè dzə̀ wan Delaya woo wan Mehetabel, wù nèn a yòŋ e mò ji vèr wun du, e dzə̀ʼə̀m a dzə̀ á e lav Nyùy, e kirə̀ʼ kee jeéy kí, e sə̀tí fó, bìʼ á fo wíri yíi a wìy ji á yúyrí mo, aá yíi a wìy a dzə̀ á vitsə́ʼə́.

¹¹ M nèn bìnèr jii, «A dzə̀ rú wír moo mo ben, wù wàa leʼ a? A dzə̀ wír moo mo ben, wù wàa dù e lav Nyùy ji wun luŋer kitú kfə́ à? Bó m yòʼ du.»

¹² Mò‑oò kìíy ne ji bó yòʼ tùm á Nyùy wun. Wù lò a dzə̀ á ntum Tobia wùn Sanballat ye á làʼàn wun ji wù tiísí.

¹³ Vé‑eè làʼ wun ji wù bémér á mo, é m yii kinyo kìn, e jày, aáwune fiʼ fò mo yír ye bií, e sèn mo.

¹⁴ Éè Nyùy wom, kuúmé kinyo ke Tobia wùn Sanballat yiìn kí, e màʼ ŋgeʼ aáwuné kitu. Màʼ sá e wiíy woo Noadia kitu, à kibér ke aŋgàa ntum ve wùn áwune taʼ a bemér moó.

Á máysí kimbom ke kày

¹⁵ Á bèy, á nèn màysì kimbom ke kày e kishiíy kee nshòv sitàn e mbaà fó ŋwee woo Elul, aá lím ne kay kishiíy nshòv sibaà e mtàn.

¹⁶ Aŋgàa vibàn vérí yú kinyo kìn, vitúm ve ví kaarin ver vidzə̀m vi yú sá, e nèn a fàn, e yèn vitú vév ji á dzə̀ á là kitar. Áwune‑eè yèn rú ji vèr yii lim rə̀n, a dzə̀ á e Nyùy wór vitaaví.

¹⁷ A yì‑iì dzə̀ é mvə̀m ghàn fóo fèy, a vilìmbìy veé Juda vi rə́si sáŋ aŋwàʼ, tsə́nsi e Tobia, a Tobia sáŋ sa və́ binèr sho.

¹⁸ A kí‑iì dzə̀ jii, wír veé Juda aníne‑eè yiì ne kilìʼ, a tiy e Tobia bàm, bìʼ fo wù‑uù dzəə̀n sə Shekania woo wan Ara, a wan və woo Jehohanan‑eè kér sa wiíy, a dzə̀ wan Meshullam woo wan Berekiya.

¹⁹ Wíri kù‑uù wiy, fèr vinyo ve juŋ ve Tobia yii e mǒ si, nèn kfə̀n du, bí wun vinyo ve m suuyì. Wù ku nèn a saŋ aŋwàʼ, a bemér mo shó.