Nehemia 5 - ŊWÀʼ NYÙY

Nehemia sə́ vé kitàne fó nə̀ʼsì

¹ Wáa dzə e ghan símóʼ sí, vilum wùn à vikìy nèn a toŋ bìʼ kinyo ke afə́r vév vee wír veé Judàa‑aà yii aáwune.

² Ámóʼó‑oò yoŋ jii, «Vèr à wón vér vee vilum wùn à vee vikìyí dzə̀ nyanyày, aá kér shií é vifa ve yi vé a yi, e bó a dzə atin.»

³ Aámóʼó suuy kév jii, «Vèr sí tiir kwáʼ sér wùn à súm sé vitiír vé *vayin si, à lav sér sí, e fíʼ a ker vifá ve yi e ghan sé jiŋ sìn.»

⁴ Aámóʼó kù kfə̀n suuy sa jii, «Vèr‑ii sí foo mbàm fóon, e bó a fo nsùʼ woó ntoʼ, woo bìʼ kwáʼ sér wùn à súm sé vitiír vé vayin si.

⁵ Vèr aàfə́r vérí dzə̀ mensə́ memòʼón, a wón vérí kù dzə̀ ji wón vév. Yii bèy, a vèr kù sí kér fó a fiìnè wón vér ji akwàn. Wón vér vee vikìy ámóʼó sì akwàn, a bó vèr yòʼ dzəə́ kér ghír wóo tin áwune. Kwáʼ sér wùn à súm sé vitiír vé vayin si sì a dzə̀ e wír ve səné.»

⁶ Mo m yuun vinyo vìn, e yù sá mo á tóŋé, kí nyár mo.

⁷ M nèn lèéy kinyo kée yiì. M kùm vilìmbìy wùn à vé saʼa, a roòmè áwune jii, «Vèn jwe, vèn foor afə́r vén mbàm, nyavrì aáwune e séʼ wo vèn shóʼó.» M nèn jàŋ dzəʼə̀m ye kuʼùné bìʼ áwune.

⁸ Á wìy, m suúy aáwune jii, «Vèsən‑eè lo mùm mo mentàsìn mesən mè dzəə̀n, e tìn afə́r vesən veé Juda ve vé‑eè fiìnèn ne e vitúm vi. Lèn və̀n, kù fiinè ven afə́r vén ámóʼó, jòkìnyàʼ, a fiìnè e wír vee vèsə́n mvəmé.» Áwune gòʼ kisə́sə, bìʼ fo á yòʼ‑oò ló a ker kinyo kée suúy.

⁹ M nèn shaà fo mbìy, a suúy jii, «Kinyo ke vèn yii ki yòʼ gheenè. Vèn kì yíi a fàn Nyùy wòsən, a ghan e wun mbòv fo vèsən shoór kitú, é vitúm vee aŋgaà vesə́n vibàné wáa jàʼ vèsən.

¹⁰ Vèr aàfə́r vémé, à vé lìm vémé foor sa wíri mbàm wùn à vifá ve yi vi. Vèsən maʼti séʼ wóo kù a dìy ji á sə́.

¹¹ Vèn siir kwáʼ sév wùn à súm sé vitiír vé vayin si, à sé vici vé *oliv si, à lav sév sí cér. Vèn siir sá séʼ wo vèn səən bìʼ vifá ve vèn foòrìn áwune, kìn dzə̀ mbàm, kìn vifá ve yi, kìn meluʼ, kìn meŋgvə́r.»

¹² Áwune nèn bìnèr jii, «Vèr yíi siìr, a bó vèr yòʼ dzəə́ yiì a leéy kifá fo áwune. Vèr yíi yiì mo à suuyin.» M nèn kùm atàá cù, e yiì, vilìmbìy vi lìʼ ji áwune yíi a yiì a kinyo ke á kàʼàn.

¹³ M kfən bvə̀r kibam fo mǒ mentìntìn, e yàsì, e sùúy jii, «Á mo Nyùy kù wíy yàsì wír wo wù tenen fóo lèm ŋkàʼmé və̀n bèn. Nyùy wíy sù láʼ sén wùn à kéŋ yéné e dzə̀m, e lèm ven e wóo.» Màŋgòŋ e dzə̀m ku nèn bìnsí jii, «*Amen,» e nèn a sùyrì Nyùy Tàr. Wíri nèn dù, a yiì mo vé‑eè kàʼàn.

¹⁴ Kímóʼ kí kfə́n a dzə jii, e kèʼ fo ghan se vé‑eè lèmèn mo ji taà saʼ woó Juda, m sáʼ kiyá nshòv sibaà e ghvə̀m, bó wìr fo vèr à wír vémé yòʼ‑oò yiì yì kifá fo vifa ve vé‑eè yii lo, á wàa fo ji vé taà saʼ. Vé‑eè lem mo, a Fòn Artakerkes sáʼ ne kiyá mbaà, m sáʼ, e dù, e mèé e ghan se wù‑uù saʼan ne ji kiyá nshòv sibaà e mtaár.

¹⁵ Yii bèy, atǎr saʼ ve vé‑eè dzəə̀n e mǒ mbìyi‑iì rə́ʼəy wíri, sə́ mbàm *ashekel mkweè, a dzə̀ see kisha ke mbàm ke fəvír kí, ji mbàm se taà saʼ se viyikìr wùn à sé melùʼ seé kishiíy sí. Aŋgàa lìm véví kfə́n a nə̀ʼsì sa wíri. Fo kém kí, bó m yòʼ yii bèy, bìʼ fo m ghvə́m Nyùy.

¹⁶ Mò‑oò wày wún, a gisín a dzə̀ é kimbom ke kày yeé ŋkàlaʼ, e làa yòʼ a shii ŋgvən. Aŋgaà vém lìme kù‑uù bàʼtí adzə̀m, a lìm sa fo.

¹⁷ Kímóʼ kí sá jii, wír veé Juda wùn à vé lìm bàràʼa kù‑uù yíkir e mǒ nsaàlav wír kishóv mtàn e wiì, e bóo lì wír ve vé‑eè lo, á wìy fó vitum ve ví kaarin ver.

¹⁸ Yì‑iì lóo dzə e kishiíy, m fò nàʼ e mòʼón wùn à bvə́y se juŋ si ntuùfú, à ŋgvəv si, á seè, e nàá. E bǎm kishiíy e ghvə̀m, m fò meluʼ mekuʼùn. Mo kí fə̀m‑eè dzəə̀n ben, bó m yòʼ‑oò ló a dzər mbàm se viyikìr se dzəə̀n ji sé taà saʼ, bìʼ fo vinyo vìn vi‑iì rə́ʼəy wíri é ŋàŋ.

¹⁹ Éè Nyùy wom, á kuumé rì mo e shiliv she juŋ shi, bìʼ kinyo kidzə̀m ke m yiìn e wír vìne.