Nehemia 2 - ŊWÀʼ NYÙY

Nehemia dú é Jerusalem

¹ Wáa dzə e kishiíy kímóʼ kí é ŋwee woo Nisan, a Fòn Artakerkes sí sáʼ ji kiyá mbaà, á wìy e meluʼ mè, e fò shó. M nèn lì, e wàyrí wun sho, a m yii bèy, sə́nri, a bó fòn yòʼ‑oò yiì ne yèn, a m wiy e wun si, sə́nri.

² Fòn dzə́r e mò ji m sà kiʼ ka e rəə́yín ben, a bó m yòʼ joyì a? Kinyo ki kù‑úù wáa dzə a ke kí bír a mo. M nèn a fàn feyì,

³ e bùn fon, e sùúy jii, «Nyàr, fòn kù waà wíy shaàrì, a sà dzə̀ la m yòʼ a sənrí e le, a ŋkàlaʼ yee fo sáy atàr vérí dzəə̀n sì e saʼkìn, a və́yí tón ne shuu se kày a?»

⁴ Á nèn dzə̀r e mò fó ntoʼ ji m sà kì koŋ ji á yée le e mò á? M nèn bùnrì Nyùy woó yuv,

⁵ e fò binèr e fòn jii, «A kí ben ghèén a wun, á leéy kwàn və́, a kòŋ, á tsə̀nsí á mo é Juda, e ŋkàlaʼ yee fo say se atàr vér sí dzəə̀n, é m fiʼ dù, e kfə̀n bàʼrì a fó.»

⁶ Fòn nèn a suŋnín, a yaà dzə́ fo ghaŋ, a dzər ji m sà yíi dzə̀ʼə̀m fo, e meé e le, a kfən e bàm é ghàn ka á? M fó ghán, fòn nèn biìmé ji wun tsə́nsi a mo fó.

⁷ M nèn kfə̀n bùn fon jii, a kí fey ghèén wun, á fò á aŋwàʼ ve m du, e fò á e vé saʼ veé mbìv wòŋ ye á liysin ne Yufreti, ji áwune fiʼ yiì a kìŋsìn a mo, e mee á mo m yíi nəə́ e Juda.

⁸ A dzə̀ á kfə̀n fò sá wúmóʼó wo m du shó, e fò e Asav, wun wo wù leey kóv woó ntoʼ, ji wù yiì fò á vicí ve m wáa fèr shuu se lav ye yì téʼtin lav cù, à sé kày ye yí kaári ŋkàlaʼa shó. Wù fó sáa ve m baʼri lav yee fo m yíi a shiíy. Mo Nyùy wom‑eè tíy e mǒ kitu, fòn ku nèn yiì kinyo kidzə̀m ke mò‑oò lonen.

⁹ Fòn‑eè tsə̀nsí vèr à vitú ve vé rərí, à wír ve vé‑eè koʼon nyám se ŋkoʼo. M dù, e yèn vé saʼ veé mbìv wòŋ ye á liysin ne Yufret, e nèn fò aŋwàʼ ve fòn foon.

¹⁰ Sanballat woo wír woó Horon wùn Tobia woo wir lìm woó Ammon yú ji wìr wìy ne a ji wun sə́ a wír veé Isray, kí nyár áwune é ŋàŋ.

Nehemia ghán, e lèéy Jerusalem

¹¹ M shaà kém, e dù, e mèé e Jerusalem. M meé fó, e dzə̀ʼə̀m vèr mòʼón vishiíy vitaár,

¹² a m yoʼ yòŋ kinyo ke Nyùy wom‑eè wayin e mǒ shiliv ji m yii é Jerusalem e wìr. M nèn lò, e fəə̀ vitsə́ʼ vímóʼ ví vèr à wíri ashàr, la vèr yòʼ lì nyám si, ku mày ye mò‑oò koʼon.

¹³ Mò‑oò fəə̀ vitsə́ʼ vin, e dù dzə́ə fó Shùu Kày woo fó Mboʼ, e lò, e dù e mbìv Dàn Koosàʼ, e kfə̀n dù e mbìv Shùu Kày wo wú kiʼ Róŋ, du bèy, leey virə́v vé kày yeé Jerusalem ye vé‑eè bvəʼtin, à shuu se kày se və́yí‑iì tònèn sí.

¹⁴ M lò, e shaà, e dù, e mèé e Shùu Kày wo wú kiʼ Dàn, a dzə̀ fo Kisə̀m ké Fòn ki‑iì dzəə̀n, la dzəə̀ yòʼ a dzə ye nyàm ye mò‑oò koʼon tósín.

¹⁵ M nèn dù dzə́ə a dzə̀ fó Kiwoóy ké Kidron fo ròŋ, a kù dzə̀ə́ vitsə́ʼə́, a ghan, a leéy kay. M leéy, e siìr ŋkfənèr, e kfə̀n é Shùu Kày woo fó Mboʼ, e bóo wìy, e nəə́ e ŋkàlaʼ.

¹⁶ Vé saʼa yòʼ‑oò lo kìíy fo m duùn, kìn kinyo ke m yii. M yòʼ‑oò ló ne yòŋ kinyo e wír veé Judàa, kìn atàá cù, kìn vilìmbìy, kìn atǎr saʼ, kìn kibér ke wìr ve vé‑eè yíi a yiì lim rə̀n.

¹⁷ M nèn lò, e yòŋ lèn aáwune jii, «Vèn leéy ŋgeʼ se vèsən dzəə̀n shó si, bìʼ Jerusalem wo wù siìn e saʼkìn, a və́yí tón ne shuu se kày sə́. Vèn wiy, é vèsən kfən bòm kay yeé Jerusalem, e tsə̀ʼ woómé sìn fo vèsə́n kitu.»

¹⁸ Mò‑oò naàrì sá aáwune mo Nyùy wom dzəə̀n vèr wun, à kinyo ke fòn‑eè suuyin e mò kí. Áwune nèn bìnsí jii, «Vesən keʼ, a bàʼrì.» Wìr dzə̀m ku nèn bàʼtí, e kèʼ lim ye juŋ rə̀n.

¹⁹ Sanballat woo wir Horon wùn à Tobia woo ŋgaà saʼ woó Ammon, à Geshem woo wir Arab yú kinyo kìn, e nèn a sheʼ ver, a yòŋ jii, «Vèn yii a dzə̀ ka kin? Vèn taʼ a tav kitú vèn à fòn à?»

²⁰ M bìnèr aáwune jii, «Nyùy woó yuv yíi a leéy fo vèr. Ver vee akwàn vəə́ yíi kèʼ, a bàʼrì Jerusalem, yii bèy, a bó vèn yòʼ kér kilíŋ fo. Vèn yòʼ kér ghay e vinyò vee kùm Jerusalem, a bó vèn yòʼ kér vitsə́ʼ vímóʼ ví fó.»