Nehemia 13 - ŊWÀʼ NYÙY

Wír Nyùy wùn à vitúm vi jávsín

¹ Wáa dzə e kishiíy fóo fèy, aá yoŋ Ŋwàʼ Mooser, a wíri yuúri. Á nèn lò, e dù yòŋ kirə́ʼ ke kí‑iì naarì ji lá wìr woó Ammon kìn woó Moav yòʼ wìy nə̀ə́ a e wír Nyùyí kintatì,

² bìʼ fo áwune‑eè ŋweyin vifá ve yi wùn à mendzə́v mè fo wír veé Israyi, e lò, e làʼ a dzə̀ Balaam ji wù roʼ á áwune. Yii bèy, a Nyùy wor‑iì lo bìnèr kinyo kìn ji kisəəvì.

³ Wír veé Israyi yú nsər rə̀n, e nèn fə̀ə́r wir kitum e dzə̀m fo áwuné mvəm.

Nehemia náŋsín vinyo

⁴ Kinyo kìn ki‑iì kooyì, a taà cù woo Eliashiv wo vé‑eè shoʼon, wù wáa leéy vitáv veé lav cù koó ne viŋkar wùn Tobia,

⁵ e fò kitáv ke kuʼùn kí, wù wáa shiíy sho. A kù dzə̀ kitáv fo vé‑eè yii lem cu vifa ve yi wùn à kiláy kee *frankinsen ki, à vifá ve ker vi, à vifá ve á fìʼìn kirə́ʼ e ghvə̀m, e shòʼ kee kimòʼón ki, e wìy sho, a yì‑iì dzə̀ sáŋ wùn à meluʼ mè, à meŋgvə́r mè, a dzə̀ vifá ve Nyùy‑iì yòŋèn ji á wáa fo e wír veé ram Levi wùn à e vé yòvi, à e wír ve vé‑eè leey kayi. Á kfə̀n‑eè lem sa mbìv vifa ye yì‑iì du aàtàá cùu fó.

⁶ Vinyo vìn vi‑iì kooyì, a bó m yòʼ dzə̀ é Jerusalem. Mò‑oò dù fo fòn Artakerkes wùn, e kiya ke kí‑iì meen ne ji nshòv sibaà e mtaár, mo wù‑uù saʼan ne vifon və́ é Babilon. M wìy dzə̀ʼə̀m fo, e nèn lò, e bùn ji fòn ku màʼtì,

⁷ é m kfə́n á e bàm é Jerusalem. M kfə́n, e nèn yèn virim ve Eliashiv kfərin wùn Tobia ji wù wáa shiíy a e kitàv keé lav Nyùy.

⁸ Kí nyár mo é ŋàŋ, m yòŋ, á fəə́r kifá ke Tobia kidzə̀m ke kí‑iì dzəə̀n é lav foo fèy.

⁹ M nèn fò sáʼ, á *kfə́mrí vitáv vee shooy, e siìr vifá veé lav Nyùy fo, wùn à cu vifa ve yii, à kiláy kee *frankinsen ki.

¹⁰ M kfən lò, e yèn ji á yòʼ‑oò dzəə́ fó a mbìv vifa ye yì‑iì dzəə̀n ji ye wìr veé ram Levi. Kí nen yiì, wír veé ram Levi wùn à vé yòv ve vé‑eè lim e lav cùu kfə́nkír aáwuné sum sí.

¹¹ M nèn a saʼ vilìmbìy ji á sà ŋwày lav cù bèn ji ka á? M yiì bèy, e nèn bàʼtí wír veé ram Levi, e kfə̀n lèmrì aáwuné virə̀ʼ vé lìm.

¹² Wír veé Judàa nèn kfə̀n kèʼ, a wìy e nsùʼ e vitàv veé lav cù, nsùʼ wo vé‑eè fiʼ vifá kirə́ʼ e ghvə̀m, á wìy e kee kimòʼón ki, kìn dzə̀ sáŋ, kìn meluʼ, kìn meŋgvə́r.

¹³ M shóʼ taà cù woo Shelemia wùn Tsadok woo ŋgaà saŋ, à Pedayia woo wír woó ram Levi ji vé kitàví, e shòʼ ŋgaà ntom wov, a dzə̀ Hanan woo wan Sakkur, wo yì‑iì dzəə̀n wan Mattania. Wír vìne‑eè dzə̀ vé suuyruú. Lim yéví nèn a dzə ji á wáa jàv a vifá aàfə́r véví.

¹⁴ Éè Nyùy wom, kú a kuumé mo bìʼ vinyo vìn, e làa yòʼ làysìn vinyo ve juŋ ve mò‑oò yii e wò woo Nyùy wóm lav wùn à lim ye mò‑oò limèe.

¹⁵ Wáa dzə e ghan fen, m yén wíri é Juda, aá kám meluʼ e kishiíy ké bam, wiy e vifá ve yi vi, kúr e vimbèʼbìy, wiy sa e meluʼ mè wùn à báŋ se *vayin si, à *fig, à kfəə́ se vifa si sidzə̀m, aá béʼ, wiy sho e Jerusalem e kishiíy ké bam. M kàntì áwune ji á wáa yen a vifá vee fiìnè é kishiíy ké bam.

¹⁶ Wír veé Taya ve vé‑eè dzə́ e Jerusaleme wáa wìy sa e sə́ si wùn à vifá ve way ví kfəə́ e dzə̀m, a fiìnè e Jerusalem, e wír veé Judàa, e vishiíy vé bam.

¹⁷ M nèn a saʼ vilìmbìy veé Juda, a suúy jii, «Dzə̀ liì virìm woó le wo vèn kér və̀n, bívir kishiíy ké bam?

¹⁸ Kí kù dzə̀ mo atàr véné‑eè yiìn ben, é bo Nyùy maʼ ŋgeʼ e vèsən à ŋkàlaʼ rə̀n kitu? Vèn kfə̀n sí bívir kishiíy ké bam, é Nyùy shwiíy kilòŋ, é ŋgeʼ si kfən nə̀ə́, e dzə̀r e Isray.»

¹⁹ M fó sáʼ ji lóo dzə e ŋkuùr kishìíy ke kí fó e kishiíy ké bam ki, á sə̀tí á shuu se kày, a yen a fóo mvə̀ʼ, a bó kishiíy ké bam ki shaá. M yòŋ bèy, e nèn lèmrì vé lìm vém ámóʼó é shuù se kày ji á wáa yen a fo kifá ki nəə́ á kay e kishiíy ké bam.

²⁰ Vé way ve vé‑eè fiinè kfəə́ se vifaa ku siì wìy moo vishiíy vibaà bey, wiyì, á shìíy é ghaa Jerusalem ji á bvəə́shi, e yiì a wáy é kishiíy ké bam.

²¹ M wáa kàntì áwune ji á sà wiy, shiiy e ghaa kày ji ka á? A wìr kfə̀n yiì mùm, bo m ghár a wun, é wù yú. E kèʼ fo ghan see shooy, la wìr yòʼ dzəə mùm wáy woó kishiíy ké bam.

²² M lò, e kfə̀n fò sáʼ ji wír veé ram Levìi kfə́mrí á vitú vév, e dù, a shìy a shuu se kày, é kishiíy ké bam ki fíʼ a dzə a kee jeéy kí. Éè Nyùy wom, kú a kuumé rì sa mo bìʼ kin, a sham mo bìʼ koŋ yé ye ghaʼtíné ye yí tíy fo ghán sidzə̀m.

²³ Kú a dzə e ghan fóo fèy, m yén sá wír veé Juda, aá kér vikìy a dzə̀ wón veé Ashdod wùn à veé Ammon, à veé Moavi,

²⁴ a kintoʼnìn ke won vév kí súŋnin a dzə̀ Lám Ashdod, kìn lám sé vitum vímóʼ ví, a bó á yòʼ kì mó a suŋnín e Lǎm Juda.

²⁵ M sáʼ áwune, e kuùrì, e dzə̀v ámóʼó, e dzə̀n nə́ŋ, e kàn áwune, á yí kilìʼ e Nyùy yir. M yòŋ jii, «Vèn yòʼ dzəə́ wìy a juùr wón vén e wón vitume, a vèn yòʼ dzəə́ wìy a way sa wón vév é lav ji vikǐy won vén, kìn ji vén vee vikìy.

²⁶ Bó yòʼ‑oò yiì vikìy vee vitúm, é bo Fòn Solomon woó Isray jáy a? Fòn kitum woo moo wun yòʼ‑oò dzə̀. Nyùy və‑əə̀ kòŋ wun, e kòʼór ji fon, wù wáa saʼ Isray e dzə̀m, yii bèy, vikìy vee vitúme ku yiì, wù jáy e Nyùy.

²⁷ Kí nén a dzə ji vèr biʼnin ven é liì kisaŋ wo biibí və̀n, e wày vikìy vee vitúm e lav, e bìn ndzə̀m e Nyùy wor a?»

²⁸ Joyiada woo wan Eliashiv woo taà cù wo kuʼùn‑eè kér wán woo lumèn, a wù kér wiíy a dzə̀ wan Sanballat woo wír woó Horon, m nèn jùm Joyiada júmen.

²⁹ Éè Nyùy wom, kuúmé mo wír vìne lovtin e ghay vitàá cùu, e kfə̀n lòvtí e *mensaŋ mè, me vèn aàtàá cù, à wír veé ram Levìi‑iì gwàrìn.

³⁰ Á bèy, m nèn kfə̀mrí áwune fó vinyò ve bvəyrìn ví, e nèn naàrì lim atàá cù wùn à yé wìr veé ram Levìi. Wìr nén a tiy e wun shùu lìm.

³¹ M kfən sìysì sa ji á wáa wìy a e meŋkaʼ mè e ghan se á lèmèn, à cu vifa ve mbìy ve á kavin ví. Éè Nyùy wom, á kuumé rì mo é shiliv she juŋ shi.