Nehemia 12 - ŊWÀʼ NYÙY

Atàá cù wùn à wír veé ram Levìi

¹ Atàá cù wùn à wír veé ram Levi ve vé‑eè kfənen wùn à Serubbabel woo wan Shealtiel, à Jeshua woo taà cù wo kuʼùné vìne. Vé‑eè dzə̀ jii, Serayia wùn à Jeremia, à Esra,

² à Amaria, à Malluk, à Hattush,

³ à Shekania, à Rehum, à Meremot,

⁴ à Iddo, à Ginnetoy, à Abija,

⁵ à Mijamin, à Maadia, à Bilga,

⁶ à Shemayia, à Joyiariv, à Jedayia,

⁷ à Sallu, à Amok, à Hilkia, à wùmòʼ woo Jedayia. Á wír ve yì‑iì dzəə̀n vitú ve atàá cù wùn aàfə́r véví e ghan se Jeshua‑aà dzəə̀n taà cù wo kuʼùn.

⁸ Wír veé ram Levìi wáa dzə jii, Jeshua wùn à Binnuy, à Kadmiel, à Sherebia, à Juda, à Mattania. Wír vìn wùn aàfə́r véví‑iì maʼ luŋ se nsùyrì Nyùy,

⁹ a Bakbukiya wùn à Unni, aàfə́r véví tíy e ŋkìʼnìn, kooyì.

Rám taà cù wo kuʼùn woo Jeshua

¹⁰ Jeshua‑aà dzə̀ tàr à Joyiakim, a Joyiakim dzə̀ tàr à Eliashiv, a Eliashiv dzə̀ tàr à Joyiada,

¹¹ a Joyiada dzə̀ tàr à Jonatan, a Jonatan nèn dzə̀ tàr à Jaddua.

Vitú ve kfəə se Atàá cù

¹² Vitú ve kfəə se atàá cù vee Joyiakim ghan sé saʼ vi dzə̀ jii, Fo kfəə Serayia, yì‑iì dzə̀ Merayia, fo yé Jeremiàa, wáa dzə Hananiya.

¹³ Fo kfəə Esra, wáa dzə Meshullam, fo yé Amaria, wáa dzə Jehohanan.

¹⁴ Fo kfəə Malluki, wáa dzə Jonatan, fo yé Shebaniàa, wáa dzə Joosev.

¹⁵ Fo kfəə Harim, wáa dzə Adna, fo yé Merayioti, wáa dzə Helkay.

¹⁶ Fo kfəə Iddo, wáa dzə Sekariya, fo yé Ginnetone, wáa dzə Meshullam.

¹⁷ Fo kfəə Abija, wáa dzə Sikri, fo yé Miniamin wùn Moadiàa, wáa dzə Piltay.

¹⁸ Fo kfəə Bilga, wáa dzə Shammua, fo yé Shemayiàa, wáa dzə Jehonatan.

¹⁹ Fo kfəə Joyiariv, wáa dzə Mattenay, fo yé Jedayiàa, wáa dzə Ussi.

²⁰ Fo kfəə Sallay, wáa dzə Kallay, fo yé Amoki, wáa dzə Eber.

²¹ Fo kfəə Hilkia, wáa dzə Hashabia, fo yé Jedayiàa, wáa dzə Netanel.

Yír sé kfəə se atàá cù wùn à seé ram Levi si

²² Vé‑eè sàŋ yír sé atǎr kfəə veé ram Levi wùn à yír sé atàá cù si, e lèm e ŋwàʼ, e kèʼ fo ghan se Eliashiv‑iì dzəə̀n ji taà cù wo kuʼùn, e kù a saŋ sa bèy e Joyiada ghan, a saŋ e sé Johanan si, à sé Jaddua si, e dù, e meé e ghan se Darius‑iì sáʼ e Persia.

²³ A vé‑eè sàŋ yír sé atǎr kfəə veé ram Levi e ŋwàʼ, a dzə̀ wo á yii sáŋ vinyo veé wòŋ sho. Á sáŋ bey, e dù, e mèé e ghan se Johanan woo wan Eliashiv‑iì sáʼá.

Á jáv lim e wír veé ram Levìi

²⁴ Vilìmbìy veé ram Levi vee ji Hashabia wùn à Sherebia, à Jeshua woo wan Kadmiel, e lì afə́r vév ve wùn áwune‑eè tíy, kiʼnìnè, vé‑eè suyrì Nyùy, kfə̀n beerì wun, a mbìv yìmòʼ maʼà, a yìmòʼ kooyì, kù mo Davir woo wir Nyùy‑iì saʼan ji á ku yiì.

²⁵ Wír ve vé‑eè leey vitáv veé shuù se kàyi‑iì dzə̀ jii, Mattania wùn à Bakbukiya, à Obadia, à Meshullam, à Talmon, e lì Akkuv.

²⁶ Wír vìne‑eè yii lim yév é ghan se Joyiakim‑eè sáʼá, Joyiakim woo wan Jeshua wo yì‑iì dzəə̀n wan Josadak, aá kfə̀n‑eè yii e ghan se Nehemia‑aà dzəə̀n taà saʼ, e kfə̀n yiì e taà cù woo Esra ghan, Esra wo kfə̀n‑eè dzəə̀n ŋgaà dùŋrì.

Á mvə́ʼ kay yeé Jerusalem

²⁷ Wáa dzə e ghan se vé‑eè yii ŋkàʼ wóo mvə̀ʼ kay yeé Jerusalem, á nèn ghàn e rám Levìí virə̀ʼ vé dzə, e fə̀ə́r áwune, e wìy sho e Jerusalem ji á yí á ŋkàʼ vən e kishéʼrì ki. Lóo yi, á wàa yòv a luŋ si, a kwaʼ vifá ve kwaʼán ví, a kùm lúŋ nshì wùn à yé mbàytìi, a beèrì a Nyùy sho.

²⁸ Wír veé ram Levi, vee vé yòvi nèn wìykìr fo ntèʼ seé ghaa Jerusalem, à fó ntèʼ seé Netofa,

²⁹ à fó Bet‑Gilgal, à fó mbìv wòŋ yee Geba wùn à Asmavet, a kù‑uù dzə̀ virə́ʼ vee fo wír véví‑iì bàʼrìn ntèʼ sév fó ndzə, e kaàrí Jerusalem, e tàr.

³⁰ Atàá cù wùn à wír veé ram Levìi nèn *kfə̀mrí vitú vév, e kfə̀mrí sa wíri, e nèn kfə̀mrí shuu se kày wùn à kayi.

³¹ M nèn bàʼtí vilìmbìy veé Juda, e yiì, á kóʼ é kitu ke kày. M kfən sìysì vé yòvi ŋgoo sibaà sikuʼùn, á wáa yòv, a beèrì Nyùy. Ŋgoo yìmòʼ wáa lev, a dù e koy yìyí e mbìv Shùu Kày wo wú kiʼ róŋ.

³² Hoshayia wáa lev aáwuné bàm, kintoʼnìn ke vilìmbìy veé Juda ki nèn bàtír,

³³ e lì Asaria wùn à Esra, à Meshullam,

³⁴ à Juda, à Benjamin, à Shemayia, à Jeremia,

³⁵ atàá cù ámóʼó ve vé‑eè tóŋ sóŋé nèn sə̀ʼ áwune. Sekariya nèn a jùmrì, Sekariya woo wan Jonatan, wo yì‑iì dzəə̀n wan Shemayia woo wan Mattania, a Mattania‑aà dzə̀ wan Mikayia woo wan Sakkur, wo yì‑iì dzəə̀n wan Asav.

³⁶ Wù wáa jùmrì wùn aàfə́r vəə́, vee Shemayia wùn à Asarel, à Milalay, à Gilalay, à Maay, à Netanel, à Juda, e lì Hanani, aá kér vifá ve yòv vee vé Davir woo wir Nyùy. Áwune wáa lev, a Esra woo ŋgaà dùŋrì du aáwuné mbìy.

³⁷ Á meé é Shùu Kày wo wú kiʼ dàn, e nèn tèém, e kòʼ tìítiy e nsèʼtì seé Ŋkàlaʼ Davir, e kibiʼtí ké kày, e shaà e mbìv kùy ntoʼ Davir, e nèn dù e Shùu Kày woó Dzəə̀ Ndzə̀v, e mbìv yee fo shùy yii tó.

³⁸ Ŋgoo vé yòv yìmòʼ‑oò lò, a dù kév a dzə̀ é koy ŋkoòvìi. Vèr à kintoʼnìn ke wìr ki nèn a jùmrì áwune, a shaà e mbìv kày yeé mbìv kùy Kirùmèn ke Kiy se bomén sí, e dù, e meé fo Kay ye Taʼaméné dzəə̀n,

³⁹ e shaà, e dù e Shùu Kày Efrayim, e dù e Shùu Kày Jeshana, e shaà, e dù e Shùu Kày Sə, e kfə̀n shaà, e dù e Kirùmèn ke Hananel, e shaà, e dù e Kirùmèn kee Wiì, e shaà, e dù e Shùu Kày Njiì, e nèn wìy tìím e Shùu Kày Anshìy.

⁴⁰ Ŋgoo se vé yòv see sibaà se sí‑iì yov, suyrì Nyùy si nèn dù, e tìím aáwuné virə̀ʼ é lav Nyùy. M tiím kém vèr à kintoʼnìn ke vilìmbìy ke vèr áwune kì dzəə̀n kí,

⁴¹ aá dzə̀ wùn aàtàá cù ve vé‑eè tóŋ sóŋé, a vé‑eè dzə̀ ji Eliakim wùn à Ma‑Aseyia, à Miniamin, à Mikayia, à Elionay, à Sekariya, e lì Hananiya,

⁴² e bóo lì Ma‑Aseyia wùn à Shemayia, à Eleasar, à Ussi, à Jehohanan, à Malkija, à Elam, à Eser. Vé yòvi ku nèn a yòv kitávín, a Jesrahia dzə̀ kilìmbìy kév.

⁴³ Á nèn a yiì cu si é kishiíy fen sigháʼán. Wìr dzə̀m wáa yu vijuŋ mo Nyùy yiìn, áwune wáa ker kishéʼrì ke tavín kí. Vikìy wùn à wóné‑eè shéʼri sa. Léŋ kisheʼrìi‑iì kóʼ fo Jerusalem, aá yú kwaʼda.

Wír ve á domsì vinyo veé lav cù

⁴⁴ Wáa dzə e kishiíy fóo fèy, á kfən shòʼtí wír ve á wáa leéy vitáv vee fo á lem afómo wùn à ŋgòn se vifa si, à vifá ve kinshoʼ vi. Vé‑eè yíi a baʼtí vifá ve nsər din ji mbìv atàá cù wùn à ye wìr veé ram Levi, a dzə̀ ve wíri‑iì fó fo kwaʼ se vé‑eè lim e ghaa mvə̀m sé laʼ. A wír veé Judàa‑aà lo yù vijuŋ bìʼ lim ye atàá cù wùn à wír veé ram Levìi‑iì yii.

⁴⁵ Áwune‑eè yii lim Nyùy wov, kfə̀n *kfə́mri wíri. Vé yòv wùn à ve vé‑eè leey kayi wáa yiì sa yév yee lim, a jùmrì vinyo ve Davir wùn wan və woo Solomon‑eè yòŋèn.

⁴⁶ Bìʼ fo, yì‑iì dzə̀ fó ŋgùʼ, e Davir wùn Asav ghan, vilìmbìy ve yòv vi kù‑uù sì, ve ví‑iì danèr luŋ se vé‑eè yov suyrì, kfə̀n beerì Nyùy sho.

⁴⁷ Wáa dzə e Serubbabel ghan wùn à e Nehemia ghan, wìr dzə̀m woó Isray ku nèn a fo mbìv vifa ye yì‑iì du e vé yòvi wùn à e wír ve á leey kayi. Wìr dzə̀m‑eè bar sa mbìv ye yì du e wír veé ram Levi ámóʼó, a wír veé ram Levìi bar sa mbìv ye yì du e rám Aarone.