Nahum 2 - ŊWÀʼ NYÙY

Nyùy Tàr tín kàʼ Nineve

¹ Éè Nineve, á taàmé ne wò. Ntav sì, ŋgǎʼntav wo wù wíy sàʼtì wò. Vèn giŋ ŋkàlaʼ, a kiy dzə́ə, a taamé rə́r.

² Nyùy Tàr bàʼtí ne ji wun siir á vijuŋ ve Jakov. Rúrú, wù yíi siìr vijuŋ ve Isray fo. Vé‑eè lòvtí e nsay yev, e sə̀ʼsí fó, e teè tíŋ sév sé vifa ve á fer *meluʼ sho.

³ Yén shúu rərí mo wú taáme Nineve. Á béʼ aŋkèe rər ve baarí, aá máʼ ndzə̀y sé rər, a sí baŋè. Viténtén vév vé rər ví bavkìr moo və́y. Nyám sév sé ŋkoʼ si kù líynin lìynín.

⁴ *Viténtén vé rər ví shaasìn e màdzəə̀, nyéŋnin, du mbìy, kfə́n e bàm é gwaané ŋkàlaʼ, bán moo kiŋweʼtì, bavkìr moo kishèv.

⁵ Fòn tòóy ataátú rər, aá wiy, bayrìnè, a dzə̀ fan. Aá sí nyoorì kay yeé ŋkàlaʼ, wiy e kibur kée shùʼ sho ki.

⁶ Á mvə̀ʼtì ne vikum ve ndzəv, shúu si wáa tiynín e ŋgèŋgèr, kúŋ kuúy ntoʼ, fóo bvəə́rí.

⁷ Á koò ne Yeèwòŋ, e sòr, e dù sho, ŋgòn sə́ see akwàn sí wáa dìy, diy, moo vibìŋ, sov kitú, dzəvtì vikàkàŋ.

⁸ Wíri sí meékir fo Nineve mo ndzə́ví kìv kikum, aàtaátúu tóŋ jii, mbaà yú ó, mbaà yú ó, a bó kfə́nbàm yòʼ kfə̀n dzə̀.

⁹ Vèn túr *kisha ke mbàm ke fəvír kí túrín, e tùr kisha ke mbàm ke baar kí. Bùʼ tsəətìn tsəə̀tìn é ŋkàlaʼ fèn, kfəə́ e dzə̀m.

¹⁰ Nineve sì é vifə̀m, wù sì é ŋgèŋgèr, a sì kirə́ʼ kisáŋ. Fane shèr ne melív me wíri, ŋkoŋ si shwáʼsín wíri shwáʼsín, vitaáví ví máy, síi sə́n wir dzə̀m sənén.

¹¹ Mbvə̀ʼ bvərə̀ʼ bèé lèn? Láʼ yee fo wù liy wóné, yiirì. Kibeèy kee fo lúm nyàme kaári, wú kfə̀n fó, yeè nyàm kaári, wù kfə̀n fó, a wón nyàme kár fo, là fan.

¹² Bvərə̀ʼ‑əə̀ bóŋ kintàn kfə́, wù kètí, e sàtì e vintin vintin, e tsə̀nsí e yeè nyàm wùn à wóné. Mbvə̀ʼ‑əə̀ lo, yì rùn e vibar ve nyàm vi.

¹³ Nyùy Tàr suuy jii: «Yuúrí, e yù, m bìn ne ndzə̀m e wò. Suuy mo woo Nyùy Tàr woo Taà Mànjòŋ. M yíi tòn viténtén vé ve rər é və̀y, e laàr wón vé e nyùy rə̀r. M yòʼ wíy biimé, áà kfən sə̀ nshwì fo kitúm kímóʼ kí, a bó ŋgaà wò ntum wo wù wíy mvə̀ʼ shuu yòʼ kfə̀n wíy a dzə.»