Mayka 7 - ŊWÀʼ NYÙY

Njiìn wìr veé Isray wo bi

¹ Ŋgeʼ sém féyì! M sì moo ŋgaà vinsíy wo á kavin vifá fo kwaʼ, wù wáa ghan, a siy, a dzə moo wír wo á rèŋèn ruʼ, yí kpú, wù wáa jiysí vileérí. Vifá vìn vi dzə̀ ve m kér shií shó, a bó m yòʼ kér kée bàʼ shuu sho.

² Rúrú, wìr woo ji wù ghán e Nyùy mbòv mày ne fo kitu ke nsay, a bó wìr wo wù yii réŋ yòʼ kfə̀n dzə̀ə́ e wìr msǒŋ mvəm. Wìr dzə̀m kù sí taʼ a dzə̀ dzəə kinjuyrìwìr, tám alálán, jwím a dzə̀ afə́r shó.

³ Áwune kù sí buʼtì a dzə̀ vinyo ve bi ví, aá kì móo bùʼtì feyì. Vé wòŋe kù sə́ a dzə̀ kòyàr. Atǎr saʼa kù diy a dzə̀ shúuyi. Wír ve kuʼkìné kù sí yii mo á taʼà, a wùn à vé saʼa nèn suúsinè, bá menàŋ.

⁴ Wír vìn vee ji á wòvríi kù dzə̀ moo vikwiíy vé njoŋ vi, a woo ji wù yii réŋ kù njím moo njoŋ kifa. Yii bèy, a ghán se Nyùy wíy màʼ ŋgeʼ aáwune sí ghèén ne. Ké lèn ki, áwune sí tuʼtìn tùʼtìn.

⁵ Lá à yòʼ kù a biimé kinyo ke ŋkar yè biímén. Lá à yòʼ a yòy, a tiír e ŋgaà wò ŋgoo wùn. À lóo suúy kinyo, a fə̀m dzə̀ e yeè lav wò, à wàa mèy shintíy.

⁶ Ké lèn ki, wàn woo lumèn sí káy tàr wov káyín, a woo wiíy sə́ kóy wùn yè wov, a wiiy wàn ban yeè lum və. Á bèy, ŋgaà vibàn wìr kù yíi a dzə wír woo wun nsaàlav.

⁷ Yii bèy, fo kém kí, m kù yíi a beè a dzə̀ Nyùy, a shìy a dzə̀ wun wo wù luŋèr mo. Wun woo Nyùy wo m suyrì kù yíi yu tóŋ yém.

Isray kfə̀n wíy nànèn

⁸ Éè aŋgaà vér vibàn, lá vèn yòʼ tàv, a yòv nsiì e věr kitu. A vèr fə̀m gbù, bo vèr kù lo, e ŋaʼáy. A vèr fə̀m dzə̀ʼə̀m fo mesənér, bo Nyùy kù yíi a kàʼày ver.

⁹ Vèr jày ne e Nyùy Tàr, wù wáa shwiíy kilòŋ vèr áwune, a bó yòʼ dzə̀ féyì vèr ŋàʼ shuu. Fo bàm, wù kù wíy nəə́ e věr kinyò, e bìnèr kinyo ke bi kidzə̀m ke á yiìn e vèr e ke juŋ ki. Wù wíy fəə́r ver fó meranén, é vèr kú a dzə sho, a yen mo wù luŋèr wíri.

¹⁰ Kí kooy bèy, áàŋgàa vibàn vérí yén, é woómé si sum áwune ve vé‑eè té lám e věr wùn, té feyì jii, Nyùy Tàr wor woo shó sà bèé á. Vèr kù wíy yen e sí yérí mo á màʼàn aŋgàa vibàn vér é dzəə, a nyèŋ mo á nyèŋ kishaʼàr.

¹¹ Wír veé Jerusalem, ghán se á kfə̀n wíy bàʼrì kay yén sí sí gheenè. Á wíy dzə̀sì bìíy sén é kishiíy fóo fèy.

¹² Wíy lòo dzə e ghan see shooy, é wír véné wáa kfən fo věn wùn vitóŋtóŋ vidzə̀m. Á wíy a wìykìr fo Assiriya, a wìy fo Ejiv. Á wíy a lò virə́ʼ vidzə̀m, e kèʼ fo Ejiv, e dù, e meé e ndzəv yee Yufret. Á wíy a lò fo rìbà ndzə̀v, a dù e wùmòʼ, a lò fo kirùmèn, a liysín e kímóʼ kí.

¹³ Yii bèy, a vitúm vee fó ghaŋ vi wíy dù e vifə̀m, bìʼ njiìn wo bi wo wìr ve á dzə́ fo.

Isray bee Nyùy Tàr

¹⁴ Nyùy Tàr, kú a shìy wír vée. Kú a shìy njiì wò ntay və̀n e mbàŋ yè, njiì wò, a wù bár a dzə̀ é virə̀ʼ vé kòv veé woʼ ví, a virə́ʼ vé jiy ve juŋ vi kaárí áwune, e tàr. Ku yiì, aá du, a yi jíy yeé Bashan, à yeé Gileadi, kù mo vé‑eè rə́si bon e wùn fó ŋgùʼ.

¹⁵ Nyùy Tàr, dìn viŋgaʼnìn ve vinyò vi e vèr. Ku dìn, mo wò‑oò dìnèn é ghan se wò‑oò fəər ver fó Ejiv.

¹⁶ Vitúm vi wíy yen viŋgaʼnìn ve vinyò vìn, fə̀m mo áwune tavkin é ŋàŋ, aá wáa woomé. Á wíy tom wó e shuù, é yí goʼ fó, aá kfə́n áànsəərì.

¹⁷ Á wíy a yi nsay moo abúv, a son e bvə́me moo yó, a fəəkír fo áwuné virə̀ʼ ve tavkín ví, a fàn Nyùy Tàr woo Nyùy wor, é wúné wáa beemé áwune.

¹⁸ Éè Nyùy Tàr, Nyùy woo moo wò dzə̀ vəné? Nyùy wo wù laysìn vinyo ve bi ve wíri yii. À laysìn ajay wìr vé ve á berkin, áwune vee wír vé ntayi. À yoʼ gòʼ, a shwiíy kilòŋ ŋkuuŋkùŋ. À kù yú vijuŋ a dzə̀ vé kòŋ ye à kér fo wír vée.

¹⁹ Rúrú, Nyùy Tàr, à kfə̀n dzəə́ wìy rər mendzə̀n mer. À wíy lì vinyo vér ve bi ví, e koʼrí e kitu wo. À wíy lì ajay vér, e màʼày e sar rìbà ndzə̀v.

²⁰ À wíy dìn e rám Jakovi ji à dzə̀ á wir suuyrú, e dìn e wón Abrahame mo à yii koŋ wír vé, kù mo wò‑oò kàʼàn atàr vér vee fó ŋgùʼ.