Mayka 6 - ŊWÀʼ NYÙY

Nyùy Tàr roomè wír veé Isray

¹ Vèn yuúrí lèn kinyo ke Nyùy Tàr suuy kùm wír veé Isray ki. Wù suuy jii: «Vèn nanen, a saʼ nsaʼ yen, é virùmèn vi tiím vinjen. Agwane ku kfə̀n ji wír ve á yuúri nsaʼ.

² Virùmèn, vèn yuúrí mo Nyùy Tàr sáʼ nsaʼ rə. Vinsə̀ŋ ve nsay, ven ve vèn‑eè siìn fó yàŋgùʼ, vèn yuúrí. Nyùy Tàr kér nsaʼ wùn à wír vəə́. Wù yíi tiír wír veé Isray e kibàʼ ke nsaʼ.

³ Éè wìr vem, m jày ka e vèn? M kfə̀n ji kibeʼèy fo vèn a dzə̀ é dzəə yeé le? Vèn fó mo binèr.

⁴ Dzə̀ mo və̀n wo mò‑oò fəərin ven fó wòŋ woo Ejiv, e bòyìr ven fo vèn wáa rèŋ vikwàn. M tsə́nsí Mooser wùn à Aaron, à Miriam ji vilìmbìy vén.

⁵ Éè wìr vem, vèn ku kuùmé menàŋ me Fòn Balak woó Moav‑iì baan e věn bàm mè. Vèn kuúmé kinyo ke Balaam woo wan Beor‑iì bìnèrìn shó ki. Vèn kuúmé ghán yén yee lò fó Shittim, e dù e Gilgali. Mò‑oò sə́ ven bey ji vèn fiʼ kìíy mo m yii boyìr wír.»

Mo Nyùy Tàr taʼ ji wír vəə́ wáa yiì

⁶ Éè mò, m fèn yíi lòo wìy ji m suyrì Nyùy Tàr woó yuv, a wìy e ka kí vèné? M fèn yíi lòo tsəm e wun woo Taà Ndzə si, a tsəm vèr à ka kí? A dzə̀ rú m lòo koʼtí e wun si, m yiì a dzə̀ cu ye tonèné, mo a dzə̀ m wàa wìy a dzə̀ e wón nyàm vee kiyá kiyáa á?

⁷ A m lòo dzə, e fò viyáʼ ansə̀kì ansə̀kì, e fò mbìʼ sé meŋgvə̀r, a dzə̀ kí bòŋ rú Nyùy Tàr á? A dzə̀ m fò rú wán wom mbìy woo lumèn ji m táŋrí vinyo vém ve bi ví shó a? A dzə̀ rú m fò run yém mbìyi ji m táŋrí kiyoy kém shó a?

⁸ Éè wìr msòŋ, Nyùy Tàr dìn ne kinyo ke juŋ ke dzə̀ à yiì. Kinyo ke wù leey ji à yii kí dzə̀ jii, à kú a yiì vinyo vee réŋ ví, a ker shammèndzə̀n, a ghan e wun woo Nyùy mbòv, a borkír.

Njò wìr veé Isray wùn à ŋgeʼlàʼ yev

⁹ Vèn yuúrí mo Nyùy Tàr fúŋ e ŋkà se laʼ, yíysi jii: «Ven ve vèn baʼtin é Jerusalem, vèn fó vituʼùr, e yuùrí. A wìr ghvə́m Nyùy Tàr, bo ŋgaàŋ dzə̀ fií.

¹⁰ A dzə̀ rú féyì m làysìn bùʼ wo wír ve bií shwìvìn wíri, a ker aáwuné melav a? A dzə̀ rú, m làysìn mfìʼ kinshwìv ye áwune lo, á wàa fìʼ vifá ve wíri shó a?

¹¹ A wónlě wayí bóʼ wíri, fiʼ vifá e mfìʼ ye yì yoʼ ghèén, m tùnér áwune á?

¹² Aŋgàa mbàm vén veé Jerusaleme bóʼ aŋgàa kitàn, a wìr dzə̀m woo fó kù sí bóʼti a dzə̀ kimboʼtì, a shuu wóví kù ŋeʼ ji á bóʼtí wír.

¹³ Bìʼ bey, mo vèn yiìn ne kinyo ke bi kí, bo m kèʼ ne, a màʼ ŋgeʼ e vèn, a laàr ven.

¹⁴ Vèn yíi a yikír, e làa yòʼ a yu. Jìŋ kù yíi a kom vitó vén komén. Vèn wíy a kav vifá, a dù, a lèm, a bó ví yòʼ wíy a tiytíy. Kifá kidzə̀m ke vèn kavin, e lèm e kitàv, é m tsə́nsí rə́r e vèn aŋgaà vén vibàné nsàn, aá laar.

¹⁵ Vèn wíy a way vifá, a bó á yòʼ wíy kav, a nyèŋ meŋgvə́r, a bó yòʼ dzə̀ wìr sòr, e bìy, a nyèŋ báŋ se á fəər meluʼ fo fo, a bó wìr yòʼ wíy no.

¹⁶ Vinyo vìn vi wíy koóy ven, bìʼ fo vèn bìʼnìn liì kisaŋ Fòn Omri, e bìʼnìn sa wo wan və woo Ahav. Vèn kù shaa fo mbìy, yuúri a dzə̀ ntir sév. Bìʼ bey, m yíi laàr kitúm kén, é vitúm vee fó ghaŋ vi wáa kay ven, a wìr dzə̀m wíy a jàʼ ven.»