Mayka 5 - ŊWÀʼ NYÙY

¹ Ké lèn ki, wír veé Jerusalem, vèn ku bàʼtí vé rər véné cér. Á gìŋ ne ver, e tàr. Á sí sánri búbúʼ sé kilìmbìy keé Isray e mbàŋ.

Nyùy káʼ ji wun wíy fo Fon fo Betlehem

² Fo ké ki, wò woo Betlehem Efrata, aà kù dzə̀ shintèntèʼ ben e nsay Juda, yii bèy, a wìr wo wù wíy a saʼ wír veé Isray wíy fəə a dzə̀ fo wò mvəm, wír feyì, a wù kù‑uù sì, e kèʼ fo yàŋgùʼ.

³ Bìʼ bey, Nyùy Tàr wíy way wír veé Isray aàŋgaà vév vibàné wo, e dù, e meé, a kù dzə̀ é ghan se wiíy wíy lum, e dzəə́ wán. Wù dzəə, é bo afə́r və́ ve vé‑eè berin é kwaʼ nsàmé kfə́n é bàm, e kfən, e tatí wír veé Isray ve vé‑eè gòʼòn aáwuné nsay.

⁴ Á kfə́né, é ŋgaà saʼ nèn kèʼ sáʼ rə́, a dànèr áwune mo nshìy dànèr njiì, a dànèr e vitaáví ve Nyùy Tàr foon e wun vi, a dànèr e vikuʼùy ve ghaʼán ví, vikuʼùy vé wun woo Nyùy Tàr woo Nyùy və. Wír vəə́ wíy a dzə dzə́ yee nyaáŋ, là kinyo ké a fàn, bìʼ fo wìr msòŋ e dzə̀m woó kitu ke nsay wíy a binsí sáʼ rə́.

Nyùy Tàr wíy bòyìr wír və́, e màʼ ŋgeʼ aàŋgaà vév vibàné

⁵ Wù kù wíy a yiì, é wóŋe wáa dzə nyaáŋ. A wír veé Assiriyàa wìy a mùm ji á tiír kiwuú kév e věr nsay, a mùm ji á nəə́ virə́ʼ vér ve tavkín ví e rə́r sí, é ver veé Israyi tsə́nsí antav vee vilìmbìy vér, aá tám wùn áwune.

⁶ Áwune wíy tòn woŋ Assiriya, a saʼ e vitaáví vé rər ví. Á wíy a ker nsay ye Nimrod‑iì koon rə̀n e vifá ve rər ví. Wír veé Assiriyàa wíy yaʼáy bìíy yer, tiir kiwuú e věr nsay, áàntav vér víne boyir ver fo áwuné wo.

⁷ Á bèy, kibér ke wìr veé Isray ke kí bòyìn, kí wíy a dzə e vitúm ví mvəm, a dzə moo ŋweʼ ye Nyùy Tàr tsə́nsi, a dzə moo wuú ye yí ŋwaʼrì e viŋgà. A bó áwune yòʼ wíy a shìy wír, aá yòʼ wíy a yeʼtí e vitaaví a dzə̀ vé wìr msòŋ.

⁸ Kibér ke rám Jakov ki wíy a dzə e vitúm ví mvəm moo bvərə̀ʼ, a dzə e màŋgòŋ mvəm moo wan bvərə̀ʼ. Bvərə̀ʼ, wo wù jwím nyám yée koo, e kfər, wan bvərə̀ʼ, wo wù nəən é mvə̀m ŋgoo njiì, a wù lo, wù wàyrí vighiy, a sàʼtì nyám, a bó yòʼ dzə̀ wìr yù fóo faàsì nyám yee shooy fo fo.

⁹ Wír veé Isray, vèn wíy tòn aŋgaà vén vibàn, e laàr áwune, a yòv nsiì aáwuné kitu.

¹⁰ Nyùy Tàr nèn sùúy jii: «Wíy lòo dzə e kishiíy fóo fèy, é m laar nyám se ŋkoʼ se ven veé Israyi maʼ rə́r shó sidzə̀m, e sàʼtì *viténtén vén vé rər.

¹¹ M wíy laàr ŋkà se laʼ see věn nsay sidzə̀m, e kètì tím sén sé virə̀ʼ ve tavkín ví.

¹² M wíy laàr sə́m fo věn mvəm, a bo vé fùú yòʼ dzəə́ wìy a ker kilíŋ e věn nsàn.

¹³ M wíy bvəʼtí mebvə̀m me vèn semen, e bàʼtì sə́y se vèn tuuyin é virə̀ʼ vé anyùy, a bó vèn yòʼ dzəə́ wìy a ghvəm vifá ve vèn fèrìn e wóo vin.

¹⁴ M wíy mèn wúr sé nyùy woo *Ashera, e laàr fo věn mvəm, e kfə̀n laàr ŋkà se laʼ sén sidzə̀m.

¹⁵ M wíy siìr sa ŋkfə́tír e vitúm ve ví tenen fó yunín mo ví, a siìr, a dzə̀ é mvə̀m dòʼshwiíy.»